བོད་ལྗོངས་མི་དམངས་དཔེ་སྐྲུན་ཁང་གིས《བོན་གྱི་ཤེས་རིག་ཚིག་མཛོད》དངོས་སུ་པར་སྐྲུན་འགྲེམ་སྤེལ་གནང་།
《བོན་གྱི་ཤེས་རིག་ཚིག་མཛོད》དངོས་སུ་པར་བསྐྲུན་འགྲེམ་སྤེལ་གནང་།
《བོན་གྱི་ཤེས་རིག་ཚིག་མཛོད》རྩོམ་བསྒྲིག་བྱེད་རྒྱུ་དེ་ཐོག་མར་བོད་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་རྣམ་གྲངས་ཤིག་ཏུ2008ལོར་གཏན་འཁེལ་བྱུང་བ་དང་ལས་ཁུངས་དེའི་ཆོས་ལུགས་ཞིབ་འཇུག་སྡེ་ཚན་གྱི་ཞིབ་འཇུག་པ་ཆེན་མོ་དོན་གྲུབ་ལྷ་རྒྱལ་གྱིས་རྣམ་གྲངས་དེའི་འགན་འཛིན་གནང་ནས་མི་སྣ་ལྔ་ལས་གྲུབ་པའི་རྩོམ་སྒྲིག་ཚོགས་ཆུང་ཞིག་བཙུགས་ནས་ལས་འགོ་བརྩམས། དེ་ཡང་རྩོམ་སྒྲིག་ཚོགས་ཆུང་གི་ཁོངས་མི་ལྔ་པོ་ནི་བོད་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་པ་ཆེན་མོ་དོན་གྲུབ་ལྷ་རྒྱལ་དང་བསྟན་འཛིན་རྣམ་རྒྱལ། དེ་བཞིན་ཧོར་ཀླུ་ཕུག་དགོན་གྱི་དགེ་བཤེས་གཡུང་དྲུང་གཙུག་ཕུད། གཙང་སྨན་རི་དགོན་གྱི་དགེ་བཤེས་གཡུང་དྲུང་བསྟན་རྒྱལ། པེ་ཅིན་ནང་བསྟན་མཐོ་རིམ་སློབ་གླིང་གི་དགེ་བཤེས་རིན་སྤུངས་ཚུལ་བསྟན་བཅས་རེད། རྩོམ་སྒྲིག་མི་སྣ་རྣམ་པས་ཕྱག་ལས་ཧུར་ཐག་གནང་བ་བརྒྱུད་རྣམ་གྲངས་དེ་ལོ་ངོ་བཞི་ཙམ་སོང་རྗེས་ལེགས་བསྒྲུབ་བྱུང་ཡོད།
《ཚིག་མཛོད》འདི་འདྲ་ཞིག་རྩོམ་བསྒྲིག་བྱེད་པའི་རྩ་དོན་ནི་བོན་གྱི་ཤེས་རིག་མཚོན་པའི་རིགས་སུ་གྱུར་བ་རྣམས་ཕྱོགས་གཅིག་ཏུ་བསྒྲིགས་ནས་《ཚིག་མཛོད》འདི་ཉིད་བརྒྱུད་བོན་གྱི་ཤེས་རིག་ལ་རྒྱུས་མངའ་མེད་པའི་སྐྱེ་བོ་རྣམས་ལ་བོན་གྱི་རྒྱུན་ཤེས་ངོ་སྤྲོད་ཞུ་ཐུབ་པ་དང་། དེ་བཞིན་བོད་ཀྱི་རིག་གཞུང་ལ་དོ་སྣང་ཡོད་མཁན་གྱི་སྐྱེ་བོ་རྣམས་ཀྱིས་བོན་གྱི་ཤེས་རིག་དེ་བོད་སྤྱིའི་ཤེས་རིག་གི་གྲུབ་ཆ་མེད་དུ་མི་རུང་བ་ཞིག་ཡིན་པ་གསལ་རྟོགས་ཡོང་བ་དང་བོད་ཀྱི་ཤེས་རིག་ལ་ཞིབ་འཇུག་གནང་མཁན་གྱི་ཞིབ་འཇིག་མི་སྣ་རྣམས་ལ་དཔྱད་ཡིག་དག་པོ་ཞིག་ངོ་སྤྲོད་བྱེད་ཐུབ་རྒྱུ་བཅས་ཡིན།
《ཚིག་མཛོད》འདིས་ནང་དོན་ཕྱོགས་ལྔ་ཡི་སྒོ་ནས་བོན་གྱི་ཤེས་རིག་གི་ནང་དོན་གཙོ་བོ་རྣམས་མངོན་ཐུབ་པ་བྱས་ཡོད་པ་སྟེ། དང་པོ་བོན་གྱི་ལོ་རྒྱུས་ཐོག་བྱོན་མྱོང་ཞིང་བོན་གྱི་ཤེས་རིག་འཛིན་སྐྱོང་སྤེལ་གསུམ་གྱི་བྱ་བཞག་ལ་ལེགས་སྐྱེས་ཕུལ་མྱོང་བའི་སྐྱེས་བུ་དམ་པ་རྣམས་ཀྱི་མཛད་རྣམ་མདོར་བསྡུས་སྐོར་དང་། གཉིས་པ་བོན་གྱི་གྲགས་ཅན་དགོན་སྡེ་དང་གནས་ཆེན་ཁག་ཅིག་གི་བྱུང་བ་མདོ་ཙམ་ངོ་སྤྲོད་དང་། གསུམ་པ་མཚན་ཉིད་དང་གཞུང་ལུགས་ཀྱི་སྐོར་དཔེར་ན་བོན་གྱི་ཐེག་པ་རིམ་དགུའི་རྩ་པའི་ནང་དོན་གནད་བསྡུས་དང་དེ་བཞིན་རྫོགས་པ་ཆེན་པོའི་ལྟ་སྤྱོད་དང་བོན་གྱི་མཚན་ཉིད་རིག་གཞུང་སྐོར་དང་། བཞི་པ་བོན་གྱི་ཡི་དམ་སྲུང་མའི་སྐོར་ལ་དང་། ལྔ་པ་ཆོ་ག་ཕྱག་ལེན་གྱི་སྐོར་བཅས་ཡིན།
《བོན་གྱི་ཤེས་རིག་ཚིག་མཛོད》ཀྱི་རྩོམ་སྒྲིག་ཚོགས་ཆུང་།
རྩོམ་སྒྲིག་མི་སྣ་ལྔ་པོའི་ཤེས་ཡོན་གྱི་གྲུབ་ཆའི་ཁྱད་པར་གྱིས་སོ་སོའི་རྩོམ་སྒྲིག་ནང་དོན་དེ་ལ་དེ་བསྟུན་གྱིས་ཤེས་བྱའི་ཁྱབ་ཁོངས་ཁག་བགོས་ཀྱིས་རྩོམ་སྒྲིག་བྱས་ཡོད་དེ། དང་པོ་ལོ་རྒྱུས་མི་སྣའི་སྐོར་རྣམས་དོན་གྲུབ་ལྷ་རྒྱལ་གྱིས་འགན་འཁུར་བ་དང་། གཉིས་པ་དགོན་སྡེའི་ལོ་རྒྱུས་གྱི་སྐོར་བསྟན་འཛིན་རྣམ་རྒྱལ་གྱིས་འགན་འཁུར། མཚན་ཉིད་གཞུང་ལུགས་ཀྱི་སྐོར་དགེ་བཤེས་གཡུང་དྲུང་གཙུག་ཕུད་ཀྱིས་འགན་འཁུར། ཡི་དམ་སྲུང་མའི་སྐོར་དགེ་བཤེས་གཡུང་དྲུང་བསྟན་རྒྱལ་གྱིས་འགན་འཁུར། ཆོ་ག་ཕྱག་ལེན་གྱི་སྐོར་དགེ་བཤེས་རིན་སྤུངས་ཚུལ་བསྟན་གྱིས་འགན་བཞེས་ནས་རྩོམ་སྒྲིག་གནང་ཡོད།
《ཚིག་མཛོད》འདི་ཉིད་ཀྱི་ངོ་བོ་ནི་ཤེས་རིག་ཚིག་མཛོད་ཅེས་པ་དེ་ཡིན་པས་ཐ་སྙད་རྐྱང་པའམ་མིང་ཚིག་རིགས་ལ་འབྲུ་འགྲེལ་མང་པོ་མེད་པར་གཙོ་བོ་ནང་དོན་དང་གོ་རིམ་སོགས་ངོ་སྤྲོད་ཞུས་པ་མང་། དེའི་དམིགས་ཡུལ་གཙོ་བོ་ནི་བོན་གྱི་དམིགས་བསལ་རིག་གཞུང་དེ་ངོ་སྤྲོད་ཞུ་རྒྱུ་དང《ཚིག་མཛོད》འདི་ཉིད་བརྒྱུད་ནས་སྐྱེ་བོ་རྣམས་ཀྱིས་བོན་གྱི་ཤེས་རིག་ལ་དོ་སྣང་དང་ཐ་ན་ཞིབ་འཇུག་གི་ལས་ལ་ཞུགས་རྒྱུའི་འདུན་པ་སྤྲོད་ཐུབ་པ་བྱེད་རྒྱུ་དེ་ཡིན། ལྷད་མེད་ཀྱི་དམིགས་ཡུལ་དེ་འགྲུབ་ཆེད་རྩོམ་སྒྲིག་མི་སྣས་བོན་གྱི་བཀའ་བརྟེན་གཞུང་ལུགས་གྲངས་ལས་འདས་པ་བལྟ་ཀློག་གནང་བ་དང་འབྲེལ་ཡོད་དཔྱད་ཡིག་ལག་སོན་བྱུང་རིགས་ཚང་མ་དཔྱད་བསྡུར་འཐུས་ཚང་བྱས་ནས་བོན་གྱི་ཤེས་རིག་ཚིག་མཛོད་འདི་རྩོམ་སྒྲིག་ཞུས་ཡོད།
