༄༅།།《གངས་ལྗོངས་སྨན་རྩིས》ཞེས་པའི་ཏོག་གསར་གློ་ཚད་སྐོར་གྱི་ཆེད་དེབ་དཔེ་སྐྲུན་བྱས།

ཉེ་ལམ། བོད་རང་སྐྱོང་ལྗོངས་སྨན་རྩིས་ཁང་གིས་གཙོ་སྒྲུབ་བྱས་པའི་བོད་ཀྱི་གསོ་རིག་ཞིབ་འཇུག་ཆེད་ལས་ཀྱི་རིག་གཞུང་དུས་དེབ《གངས་ལྗོངས་སྨན་རྩིས》ཏོག་གསར་གློ་ཚད་སྐོར་གྱི་ཆེད་དེབ་དཔེ་སྐྲུན་འགྲེམ་སྤེལ་བྱས་ལ། ཆེད་དེབ་ཁྲོད་བསྡོམས་པས་རིམས་ནད་དང་ཏོག་གསར་གློ་ཚད་སྐོར་གྱི་འབྲེལ་ཡོད་དཔྱད་རྩོམ18ལྷག་བསྡུས་ཡོད།
ངོ་སྤྲོད་བྱས་པ་ལྟར་ན། དུས་དེབ་དེའི་ནང་བསྡུས་པའི་དཔྱད་རྩོམ་གྱི་ནང་དོན་ལ་གཙོ་བོ་རིགས་ཆེན་པོ་གཉིས་སུ་དབྱེ་ཡོད་པ་སྟེ། རིགས་དང་པོ་ནི་སྲོལ་རྒྱུན་གྱི་བོད་ལུགས་གསོ་རིག་གིས་ནད་ཡམས་ལ་ངོས་འཛིན་དང་། རིགས་དབྱེ། ནད་དཔྱད། ཁྱད་ལྡན་སྔོན་འགོག་ཚོད་འཛིན། སྨན་བཅོས་བྱེད་ཐབས་བཅས་དང་། རིམས་ནད་འགོག་བཅོས་ཀྱི་ཉམས་མྱོང་དང་། སྨན་རྫས་སྦྱོར་བཟོ། བོད་སྨན་རིམས་འགོག་གི་ཕན་ནུས་སོགས་ཀྱི་ནང་དོན་ཚུད་ཡོད། རིགས་གཉིས་པ་ནི་གཙོ་བོ་བོད་ལུགས་གསོ་རིག་དང་བོད་སྨན་རིག་པའི་རིགས་པའི་གཞུང་ལུགས་ཀྱི་ངོས་ནས་ཐེངས་འདིའི་རིམས་ནད་ལ་ངོས་འཛིན་བྱ་རྒྱུར་དབྱེ་ཞིབ་དང་ཞིབ་འཇུག་བྱེད་པ་དང་འབྲེལ་ཀྲུང་ལུགས་དང་ཕྱི་ལུགས་གསོ་རིག་གི་ནད་བརྟག་སྨན་བཅོས་ཇུས་གཞི་དང་སྨན་བཅོས་སྨན་རྫས་དང་ཟུང་འབྲེལ་བྱས་ཏེ། འབྲེལ་ཡོད་སྔོན་འགོག་ཚོད་འཛིན་བྱེད་ཐབས་དང་སྨན་བཅོས་བྱེད་ཐབས་དབྱེ་ཞིབ་དང་འོས་སྦྱོར་བྱས་ཡོད་པ་རེད། 
ཆེད་དེབ་ཐོག་བཀོད་པའི་དཔྱད་རྩོམ་ནང་བསྟན་སྲུང་གྲགས་པ་སོགས་བོད་ལུགས་གསོ་རིག་དང་བོད་སྨན་གྱི་ཆེད་མཁས་པ་དང་། བོད་རང་སྐྱོང་ལྗོངས་སྨན་རྩིས་ཁང་། བོད་ལྗོངས་བོད་ལུགས་གསོ་རིག་སློབ་ཆེན་སོགས་ལྗོངས་ནང་ཁུལ་དང་དེ་མིན་མཚོ་སྔོན་དང་སི་ཁྲོན་སོགས་བོད་ལུགས་གསོ་རིག་གི་ནད་ཐོག་སྨན་པ་དཀའ་བཅུ་པ་དང་། སྨན་གཉེར་དཀའ་བཅུ་པ། དགེ་རྒན་ཆེན་མོ། ཞིབ་འཇུག་པ་སོགས་ཆེད་ལས་མི་སྣས་བྲིས་པའི་དཔྱད་རྩོམ17དང་ཀྲུང་ནན་ཧྲན་ཡོན་ཧྲི་ཡིས་སྣེ་ཁྲིད་པའི་ཀྲུང་གོའི་ཏོག་གསར་གློ་ཚད་སྨན་བཅོས་ཆེད་མཁས་པ་ཚོགས་ཆུང་གིས་ཉེ་ཆར་སྤེལ་བའི་དབང་གྲགས་ལྡན་པའི་དཔྱད་རྩོམ(བོད་ཡིག་གི་བསྒྱུར་ཡིག)1བཅས་འདུས་ཡོད་པ་རེད།