༄༅།།ཨ་མདོའི་དམངས་གླུ་ཕྱོགས་བསྒྲིགས་དཔེ་སྐྲུན་འགྲེམ་སྤེལ་བྱས།

ཚང་མས་ཤེས་གསལ་ལྟར། བོད་ཀྱི་དམངས་གླུ་ནི་ཤེས་བྱ་ཀུན་འདུས་ཀྱི་རིག་གནས་ཤིག་ཡིན་པས། དེའི་ནང་དུ་མི་རིགས་རང་གི་ལོ་རྒྱུས་དང་དད་མོས། བསམ་བློ། ཐོན་སྐྱེད། མཛེས་རྟོག་གི་ལྟ་བ། ཡུལ་སྲོལ་གོམས་གཤིས་སོགས་མང་དུ་འདུས་ཡོད། དེའི་ཕྱིར་ང་ཚོས་དུས་དང་རྣམ་པ་ཀུན་ཏུ་དམངས་སྲོལ་རིག་གནས་འདི་སྣང་མེད་དུ་མི་བསྐྱུར་བར་དེ་ལ་ཞིབ་འཇུག་དང་འཚོལ་སྡུད། དག་སྒྲིག དར་སྤེལ་གཏོང་རྒྱུ་ནི་དུས་རབས་འདིའི་འགན་འཁྲི་ཞིག་ཏུ་སེམས།
ཐེངས་འདིར་དམངས་ཁྲོད་ཀྱི་གླུ་བ་གླུ་མ་རྒན་གྲས་ཁག་གི་སྙན་མོ་ངག་ནས་ཐོན་ཞིང་མཚོ་ལྷོ་ཁུལ་མང་ཚོགས་སྒྱུ་རྩལ་ཁང་གིས་དཀའ་བ་དང་དུ་བླངས་ནས་སྡུད་སྒྲིག་མཛད་པའི《ཨ་མདོའི་དམངས་གླུ་ཕྱོགས་བསྒྲིགས》ཞེས་པ་འདི་ནི་ད་ལྟ་ངེད་སི་ཁྲོན་མི་རིགས་དཔེ་སྐྲུན་ཁང་གིས་པར་སྐྲུན་འགྲེམ་སྤེལ་བགྱིས་ཡོད་པས། མི་རིགས་རིག་གནས་ལ་དུངས་བ་ཟབ་པའི་དཔྱོད་ཤེས་བློ་ལྡན་རྣམས་ཀྱིས་བོད་ཀྱི་དམངས་ཁྲོད་རྩོམ་རིག་ལ་ཞིབ་འཇུག་དང་སྔོག་འདོན། རྒྱུས་ལོན་དང་གསར་སྤེལ་བྱེད་པར་རྒྱུ་ཆ་ཡག་པོ་ཞིག་མཁོ་འདོན་བྱས་ཡོད་དོ།།