༄༅།།《གངས་ལྗོངས་མཁས་དབང་རིམ་བྱོན་གྱི་རྩོམ་ཡིག་གསེར་གྱི་སྦྲམ་བུ》ཞེས་པའི་དཔེ་དེབ་སྟོད་སྨད་བར་གསུམ་ངོ་སྤྲོད།

《གངས་ལྗོངས་མཁས་དབང་རིམ་བྱོན་གྱི་རྩོམ་ཡིག་གསེར་གྱི་སྦྲམ་བུ》ཞེས་པའི་དཔེ་དེབ་འདིའི་ནང་སྤྱི་ལོའི་དུས་རབས་བདུན་པའི་སྤུར་རྒྱལ་བོད་ཀྱི་རྡོ་རིང་ཡི་གེ་ནས་དུས་རབས་ཉི་ཤུ་བའི་སྨད་ཀྱི་བར།  དུས་རབས་རེ་རེའི་ཁྱད་ཆོས་མངོན་པར་མཚོན་པའི་སྐྱེས་ཆེན་དམ་པ་བདུན་ཅུ་ལྷག་གི་ཕྱག་རྩོམ་བརྒྱ་ཕྲག་གཉིས་ལ་ཉེ་བ་ཞིག་ཕྱོགས་གཅིག་ཏུ་བསྡུས་ཤིང་།  ལོ་ཆུང་གཞོན་ནུ་རྣམས་ཀྱི་བློ་དང་འཚམ་པ་ཞིག་ཡོང་ཆེད་རྩོམ་པ་པོ་རེ་རེའི་ལོ་རྒྱུས་མདོར་བསྡུས་ཙམ་ངོ་སྤྲོད་བྱས་ཡོད་པ་དང་། རྩོམ་ཡིག་ལས་ཅུང་གོ་དཀའ་བའི་ཐ་སྙད་རྣམས་འཕགས་བོད་མཁས་གྲུབ་རྣམས་ཀྱི་གཞུང་འགྲེལ་ལས་བྱུང་བའི་དགོངས་དོན་ལྟར་བཀྲལ་ཏེ་མཆན་འགྲེལ་གྱི་ཚུལ་དུ་བཀོད་ཡོད།
《གངས་ལྗོངས་མཁས་དབང་རིམ་བྱོན་གྱི་རྩོམ་ཡིག་གསེར་གྱི་སྦྲམ་བུ》ཞེས་པའི་དཔེ་དེབ་ཀྱི་མཚན་བྱང་ནི༡༩༨༩ལོར་པཎ་ཆེན་སྐུ་ཕྲེང་བཅུ་པས་ཕྱག་བྲིས་གནང་བ་ཡིན།  དཔེ་དེབ་དེའི་ནང་བོད་རིགས་ཀྱི་ཕུལ་བྱུང་རྩོམ་རིག་བརྩམས་ཆོས་མང་དག་བསྡུ་རུབ་བྱས་ཡོད་པ་མ་ཟད།  བརྩམས་ཆོས་དེ་དག་གི་ཁུངས་འཚོལ་ར་སྤྲོད་དང་མཆན་འགྲེལ་ཡང་བཀོད་ཡོད། དེ་ཡང་བོད་རིགས་ཀྱི་རྩོམ་རིག་འཕེལ་རྒྱས་ཁྲོད་དཔེ་སྐྲུན་བྱས་པའི་རྩོམ་རིག་བརྩམས་ཆོས་ཕྱོགས་བསྒྲིགས་ཐོག་མ་དེ་ཡིན་པས་འོས་སྦྱོར་ཞུས་པ་ཡིན་ནོ།།