༄༅།།《བོད་ཀྱི་མཛེས་རྩལ་ཀུན་བཏུས་ལས་རི་མོ་སྒྱུ་རྩལ་སྐོར་གྱི་མཚོ་སྔོན་ལྡེབས་རིས》པོད༢པ་དཔེ་སྐྲུན་བྱས།

      《བོད་ཀྱི་མཛེས་རྩལ་ཀུན་བཏུས》ནི་སི་ཁྲོན་མི་རིགས་དཔེ་སྐྲུན་ཁང་གི་རྒྱལ་ཁབ་དཔེ་སྐྲུན་ཐེབས་རྩའི་རྣམ་གྲངས་ཀྱི་ལས་གཞི་འགངས་ཆེན་ཞིག་ཡིན་ལ། བོད་རྒྱ་ཤན་སྦྱར་དང་བོད་དབྱིན་ཤན་སྦྱར་གྱི་པར་ཡིག་སྦྲགས་མའི་དཔེ་དེབ་སྤུས་ལེགས་པོད་གྲངས་༡༠༠ཡི་བདག་ཉིད་ཅན་ཞིག་ཀྱང་ཡིན། འདིར་བོད་ཀྱི་སྲོལ་རྒྱུན་ཐང་ག་དང་། འཇིམ་བཟོ། བཟོ་བཀོད། ལག་ཤེས་སྒྱུ་རྩལ། ཡིག་གཟུགས་བཅས་ཀྱིས་མཚོན་པའི་སྲོལ་རྒྱུན་བཟོ་རིག་སྒྱུ་རྩལ་གྱི་ཁོངས་གཏོགས་བྲིས་འབུར་ཇི་སྙེད་རྣམ་པར་དབྱེ་ཞིང་ལེགས་པར་བསྒྲིགས་ཏེ་དཔེ་སྐྲུན་བྱེད་ཀྱིན་པ་ལགས་ན། འདི་ནི་བོད་ཀྱི་མཛེས་རྩལ་ལོ་རྒྱུས་ཐོག་མཛེས་རྩལ་གྱི་རིགས་རྣམ་དང་ནང་དོན་གྱི་ཁྱབ་རྒྱ། པར་འདེབས་ཀྱི་རྒྱུ་སྤུས་སོགས་ཕྱོགས་གང་ཐད་ནས་དཔེ་ཚོགས་འཐུས་ཚང་ཤོས་དང་གྲ་རྒྱས་ཤོས། སྤུས་དག་ཤོས་དེ་ཡིན་ནོ།།       དེབ་འདི་ནི《བོད་ཀྱི་མཛེས་རྩལ་ཀུན་བཏུས་ལས་རི་མོ་སྒྱུ་རྩལ་སྐོར་གྱི་མཚོ་སྔོན་ལྡེབས་རིས》པོད༼༢༽པ་ཡིན། དེབ་འདིའི་ནང་དུ་མཚོ་སྔོན་ཡུལ་ཤུལ་གྱི་ལྡེབས་རིས་ལས་ནང་ཆེན་ཟླ་ཉིན་རི་ཆེན་དགོན་ཤུལ་གྱི་ལྡེབས་རིས་དང་། ཁྲི་འདུ་སྨྲྀཏི་ཕུག་གི་ལྡེབས་རིས། རྫ་སྟོད་དཔལ་ངེ་གཞུང་མཆོད་རྟེན་གྱི་ལྡེབས་རིས། ནང་ཆེན་གོ་འཇོ་ཕུག་གི་ལྡེབས་རིས། ཁྲི་འདུ་གུ་ཚ་ལྷ་ཁང་གི་ལྡེབས་རིས། ནང་ཆེན་ན་བུན་ལྷ་ཁང་གི་ལྡེབས་རིས། རྫ་ཆུ་ཁ་འབའ་དྷ་དགོན་གྱི་ལྡེབས་རིས། ནང་ཆེན་པོ་རི་དགོན་གྱི་ལྡེབས་རིས་བཅས་འདུས་ཡོད་དོ།།