༄༅།།《ཧི་མ་ལ་ཡ་བརྒལ་བ།—ཧི་མ་ལ་ཡའི་ལྷོ་རྒྱུད་རི་ཁུལ་མྱུལ་བའི་རིག་གཞུང་རྟོག་ཞིབ་ཟིན་ཐོ》དཔེ་སྐྲུན་འགྲེམ་སྤེལ་བྱས།

གློ་བོའི་ཡུལ་གྱི་རྣམ་རྒྱལ་ཆོས་སྡེ།

བྱང་ཆུབ་ཤིང་དྲུང་དུ་པྲ་ཀྲི་ཏའི་སྐད་ཀྱིས་ཆོས་གསུང་བཞིན་པ།

     དེབ་འདི་ནི་རིག་གཞུང་ཞིབ་འཇུག་གི་ཆེད་དེབ་རྐྱང་བ་ཞིག་མ་ཡིན་ཡང་། ཁོ་བོ་རང་ཉིད་ལོ་ངོ་འགའི་རིང་སྔ་ཕྱིར་ཐེངས་གཉིས་ཡུལ་དངོས་སུ་ཕྱིན་ཏེ་བརྟག་དཔྱད་བྱས་ཁུལ་གྱི་ཟིན་བྲིས་ཤིག་ལགས་པས། རིག་གཞུང་དཔྱད་ཞིབ་ཀྱི་ཟླར་འགྲོ་ཞིང་། མ་འོངས་པར་འདིའི་ཐད་ལ་དོ་སྣང་དང་ལྷག་པར་ཉམས་ཞིབ་བྱེད་མཁན་གྱི་བོད་མི་རེ་གཉིས་འབྱུང་བ་ལ་ཕྱར་བ་གྲུ་འདེགས་ཀྱི་ནུས་པ་འདོན་པ་ལ་ཐང་མེད་སྙམ་པའི་ཀུན་སློང་གིས། འདི་ཀོ་རིག་གཞུང་བརྟག་དཔྱད་ཀྱི་ཟིན་བྲིས་དེབ་ཆུང་པར་རིས་དང་བཅས་ཏེ་རིགས་མཐུན་གྲོས་མཉམ་དག་གི་གཟིགས་མོར་ཕུལ་བ་ཡིན། དོན་དངོས་སྟེང་། དེབ་འདིའི་ནང་རིག་གཞུང་གི་བྲོ་བ་ཅུང་ཟད་མངའ་བའི་ཡི་གེའང་རབ་ཅིག་ཡོད་ཅིང་། མང་མང་ལ་དམིགས་པའི་རྟོག་ཞིབ་ཟིན་ཐོ་ཡིན་པའི་ཆ་ནས་རིག་གཞུང་གི་ཁྱད་ཆོས་ཆེ་རུ་བསྐྱེད་དྲགས་ན་མི་འགྲིག་མོད། དེས་ཁོ་བོ་མ་གཞི་ནས་རིག་གཞུང་ལས་གཉེར་བ་ཞིག་ཡིན་པའི་ཚུལ་མཚོན་བཞིན་ཡོད། རྒྱུ་མཚན་དེའི་དབང་གིས། དེབ་འདིར་རིག་གཞུང་གི་རྣམ་པ་ཨེན་ཙམ་འཛོམས་པར་བྱས་ཏེ་དཔེ་ཀློག་གི་རིག་གཞུང་རང་བཞིན་ཆེ་རུ་བསྐྱེད་ཡོད་པ་དང་། ཡུལ་དུས་ཀྱི་དངོས་མཐོང་རྣམ་པ་ཇི་བཞིན་ཞིབ་བརྗོད་བྱས་པའི་ཞར་ལ། མཚམས་རེར་བབ་བཞིན་དཔྱད་པ་འགྲིག་མོ་རེ་ཡང་ཁ་སྐོང་གི་ཟོལ་དུ་བཞག་ཡོད། དེ་བཞིན་ཧི་མ་ལ་ཡའི་ལྷོ་རྒྱུད་ཡུལ་ལུང་འདི་ཉིད་ས་ཁོངས་རྒྱ་ཆེ་བ་ཞིག་ཡིན་འདུག་མོད། ཁོ་བོ་དངོས་སྐྱོད་བརྟག་དཔྱད་བྱས་པའི་ས་ཆར་ཚད་ཡོད་པའི་སྟབས་ཀྱིས། དེབ་འདིར་ཧི་མ་ལ་ཡའི་ལྷོ་རྒྱུད་ཡུལ་གྲུའི་བོད་གཏོགས་མི་རིགས་དང་བོད་འབྲེལ་མི་རིགས་ཁག་གི་ས་ཁུལ་རྫོགས་པར་འགོད་ཐུབ་མེད་པ་དང་། ཡུལ་གཙོ་བོ་ཁག་ཅིག་ལའང་འགྲོ་སྟབས་མ་བདེ་བ་བཅས། རང་ཉིད་དངོས་སུ་སོང་མྱོང་བའི་གནས་ཚུལ་ཇི་ལྟ་བ་བཞིན་འགོད་རྒྱུ་ལས་འོས་མེད་པར་གྱུར་ཅིང་། དེས་ཀློག་མཁན་དག་གི་འདོད་པ་མ་ཚིམས་པ་བྱུང་ན་མཐོལ་ལོ་བཤགས་སོ། །

རྩོམ་པ་པོས་བལ་བོའི་སྟོན་པའི་རྗེས་དྲན་ཁང་གི་མདུན་དུ་བསྐྱོན་པའི་འདྲ་པར།