སློབ་གསོ་བ་གྲགས་ཅན་གཅན་རོང་བསྟན་འཛིན་ལགས་ཀྱི་དེབ་གསར།

གཅིག སློབ་གསོའི་མི་ཚེ་ཞིག
        ཕྲན་སློབ་ཆུང་ནས་མཐར་ཕྱིན་པའི་སྐབས་དེར་ཁུལ་རྫོང་ན་ད་དུང་མི་རིགས་སློབ་འབྲིང་གི་མ་ལག་ཆགས་མེད་སྟབས། སློབ་ཆུང་གི་མཐར་ཕྱིན་སློབ་མ་རེ་གཉིས་ཐད་ཀར་མི་རིགས་སློབ་ཆེན་དང་། འབྲིང་རིམ་དགེ་ཐོན་སློབ་གྲྭའམ་ལས་རིགས་ལག་རྩལ་སློབ་གྲྭ་འགྲིམས་ཐུབ་མིན་ཙམ་ཞིག་རེད། སྟབས་ལེགས་པ་ཞིག་ལ ༡༩༧༦ལོར་ཕྲན་སློབ་ཆུང་ནས་མཐར་ཕྱིན་པ་མཐོ་རྒྱུགས་སླར་གསོའི་ཤར་རླུང་དང་འཕྲད་ནས་རྨ་ལྷོ་མི་རིགས་དགེ་ཐོན་སློབ་གྲྭ་འགྲིམས་པའི་གོ་སྐབས་བྱུང་བ་རེད། སྐབས་དེར་ཆེས་ཐོབ་དཀའ་བའི་གོ་སྐབས་འདིས་ཕྲན་ལ་སློབ་སྦྱོང་གི་གོ་སྐབས་དང་དགེ་ཐོན་སློབ་གསོ་མྱོང་བའི་གོ་སྐབས་ཉིས་འཛོམས་སུ་གནང་བ་ཡིན།
        དེ་ནས་མིག་སྡེབ་དབང་ཙམ་ལ་དགེ་ཐོན་སློབ་གྲྭའི་དམའ་འབྲིང་ཚན་ཁག་ནས་མཐར་ཕྱིན་རྗེས། ཀྲུང་དབྱངས་མི་རིགས་སློབ་ཆེན་འགྲིམས་པའི་གོ་སྐབས་ཁྱིམ་ཚང་དཔལ་འབྱོར་གྱིས་མ་ཐེག་ཀྱང་། མུ་མཐུད་དུ་རྨ་དགེ་སློབ་གྲྭའི་འབྲིང་རིམ་དགེ་ཐོན་འཛིན་གྲྭ་འགྲིམས་ཤིང་། སྤྱི་ལོ༡༩༨༢ལོར་སློབ་མཐར་ཕྱིན་རྗེས་སློབ་གྲྭ་ཆུང་འབྲིང་གི་དགེ་རྒན་བྱས་པ་ནི་མི་ཚེ་འདིའི་སློབ་གསོ་བྱ་བའི་གོམ་པ་ཨང་དང་བོ་ཡིན། དེ་ནས་རྫོང་དམངས་ཆེན་དུ་སློབ་གསོ་ལྟ་སྐུལ་བ་དང་རྫོང་སློབ་གསོ་ཅུའུ་ནས་སློབ་གསོ་དོ་དམ་པ། རྫོང་སྲིད་གཞུང་དུ་སློབ་གསོ་ཇུས་འགོད་པ། ཁུལ་སློབ་གསོ་ཅུའི་སློབ་གསོ་སྣ་འདྲེན་པ་དང་། ཁུལ་ཚན་རྩལ་ཅུའུ་དང་ཁུལ་དབུལ་སྐྱོར་ཅུའུ། ཁུལ་སྲིད་གྲོས་སོགས་ཀྱི་བྱ་བའི་ཁྲོད་ནས་སློབ་སྦྱོང་དང་། སློབ་སྦྱོང་གི་ཁྲོད་ནས་བསམ་གཞིགས། བསམ་གཞིགས་ཀྱི་ཁྲོད་ནས་སྤྱི་བསྡོམས་འཐུས་ཚང་བརྒྱུད་དེ་སྔ་ཕྱིར་ཆེད་རྩོམ་དྲུག་ཅུ་ལྷག་དང་ཆེད་དེབ་བཅུ་གཅིག་དཔར་བསྐྲུན་བྱས་པ་ལས་བརྒྱ་ཆའི་གོ་དགུ་སློབ་གསོ་རྐྱང་རྐྱང་ཡིན་ལ།དེ་རིང་ད་དུང་ངལ་གསོའི་ཆུ་ཚོད་བེད་སྤྱད་དེ་དེབ་གསར་འདི་བྲིས་ནས་དཔར་བསྐྲུན་བྱས་པ་འདིས་སློབ་གསོའི་མི་ཚེ་ཞིག་ཡིན་པ་ཡང་བསྐྱར་གསལ་བཤད་བྱས་ཡོད།
གཉིས། བསམ་གཞིགས་ཀྱི་མི་ཚེ་ཞིག         མི་ཚེ་ནི་མྱོང་རོལ་གྱི་ཞིང་ཁམས་དང་ཉམས་མྱོང་གི་གཏེར་མཛོད་ཆེན་པོ་ཞིག་ཡིན་པས། དེབ་ཆུང་འདི་ཉམས་མྱོང་དང་བསླབ་བྱའི་སྐྱིད་དངསྐྱོ་བའི་དབྱངས་རྟ་རེ་རེ་ནས་དགའ་སྐྱོ་ཟུང་དུ་འདྲེས་པའི་མྱོང་རོལ་གྱི་འགྱུར་ཁུག་ངོ་མ་རེ་རེ་ཡིན། ཉམས་མྱོང་དང་བསླབ་བྱའི་རོལ་དབྱངས་ཀྱི་ཁྲོད་ནས་སྤྱི་ཚོགས་སློབ་གསོ་དང་། ཁྱིམ་ཚང་སློབ་གསོ། སློབ་གྲྭའི་སློབ་གསོའི་འགྱུར་ཁུག་རེ་རེ་གསལ་ལྷང་ལྷང་གིས་ཁྱེད་ཅག་གི་སྙན་ལམ་དུ་ཕུལ་ཡོད་པ་ཀློག་པ་པོ་རྣམས་ཀྱི་དབྱངས་རྟའི་མྱོང་རོལ་དང་ཚོར་བའི་རྣོ་བུལ། བསམ་གཞིགས་ཀྱི་གོམས་གཤིས་འདྲ་མིན་ལས་ཕན་འབྲས་འདྲ་མིན་རེ་འབྱུང་བར་ཡིད་ཆེས་ཡོད་ལ། མ་མཐའ་ཡང་གཞི་རིམ་སློབ་གསོའི་ཁྲོད་ན་སློབ་གསོའི་གཏམ་རྒྱུད་དང་། སློབ་ཁྲིད་ཀྱི་གཏམ་རྒྱུད། སློབ་ཞིབ་སློབ་དཔྱོད་ཀྱི་གཏམ་རྒྱུད་ཡིད་འཕྲོག་པ་ཤིན་ཏུ་མང་བོ་ཞིག་ཡོད་པ་ཡིག་ཐོག་ཏུ་བཀོད་པ་ཉིན་མོའི་སྐར་མ་ལྟར་དཀོན་པས་དེའི་དྲན་སྐུལ་ཅིག་ཏུ་གྱུར་ནའང་ཅི་མ་རུང་སྙམ་པའི་ཀུན་སློང་གིས་བྲིས་ནས་གྲོགས་པོ་ཚོར་ཕུལ་བ་ཡིན་ནོ།།