༄༅། །རྒྱལ་སྨན་རྒྱ་ཡེ་ཉི་མ་ལགས་ཀྱི་«སྨན་གྱི་འཁྲུངས་དཔེ»དང་«སྨན་གྱི་འདུལ་སྦྱོང་»པར་དུ་བསྐྲུན་པའི་འཕྲིན་བཟང་།

        སྤྱིར་ན་བོད་ཀྱི་གསོ་བ་རིག་པ་ལས་སྦྱར་བྱ་སྨན་གྱི་ངོ་བོ་དང་ངོས་འཛིན། ཆོ་ག་ཕྱག་ལེན། འདུལ་ལུགས་སོགས་སུ་སྦྱངས་གོམས་མེད་ཚེ་གཡུལ་ངོར་ཞུགས་པའི་དཔའ་བོར་མཚོན་ཆ་མེད་པ་ནང་བཞིན་སྨན་པའི་བྱ་བ་མཐའ་དག་ངལ་བ་དོན་མེད་དུ་འགྱུར་ཉེན་ཆེ་བ་ཀུན་གྱིས་མཁྱེན་གསལ་ལྟར་། ཁོང་གིས་ཞན་ཞིང་མ་ཁྱོགས་པ་དེ་དག་གི་དོན་ལ་ཐུགས་གཞིགས་ཡང་ཡང་བྱས་ཏེ་ཆད་པ་བསབ་ཅིང་གབ་པ་དབྱུངས་པའི་ཚུལ་གྱིས་བསྟན་བཅོས་འདི་དག་ང་ཚོའི་མིག་གི་དགའ་སྟོན་ཏུ་བསྩལ་བ་ཡིན་པས་ཕྱོགས་ཡོངས་ཆུད་པ་ཞིག་གིས་ཀློག་འགྲེལ་དང་དཔྱད་ཞིབ་བགྱིས་ན་ཡིད་ཀྱི་སྨན་དུ་ཐེབས་ངེས་པ་ནི་གོར་མ་ཆག ང་ཚོས་ཡིག་ཟིན་ཕྱོགས་བསྒྲིགས་ཀྱི་སྐབས་སུ་སློབ་སྦྱོང་དང་ཞིབ་པར་བརྟག་ན་ཁོང་གིས་ལུང་ལ་གཏུགས། རིགས་པས་དཔྱད། མྱོང་བས་བདེན་པ་སྤྲད་དེ་གཞན་དང་མི་མཚུངས་པར་གནད་ཐོན་པར་བྱས་ཡོད་པ་ནི་དེབ་འདིའི་ཁྱད་ཆོས་གཙོ་བོ་ཞིག་ཏུ་འདོད་ཡོད། ཆེད་དུ་ཞུ་དགོས་པ་ཞིག་ལ་བསྡུ་སྒྲིག་གི་སྔ་རྗེས་ཀུན་ཏུ་རྒྱལ་སྨན་སློབ་དཔོན་ཆེན་མོ་ཉི་མའི་ཕྱག་ལེན་རྒྱུད་འཛིན་ཁང་གི་ཁོངས་མི་ཀླུ་བྱམས་རྒྱལ་དང་པདྨ་རབ་བརྟན། དབང་ཆེན་ཚེ་བརྟན། རིག་འཛིན་རྡོ་རྗེ། པདྨ་ཐར། གནུབས་དོན་གྲུབ་ཚེ་རིང་། གཡང་འབུམ་བཀྲ་ཤིས། སྟག་འབྲུག་ཚེ་རིང་། པདྨ་རིན་ཆེན། ཕག་མོ་དོན་གྲུབ། དོན་གྲུབ་ཚེ་རིང་། འབྲུག་རྒྱལ་ཐར། སེང་ཆེན་ཚེ་རིང་། བདེ་མཆོག་རྒྱལ། ཤེས་རབ། སྒོམ་པ་ཚེ་རིང་། དབང་གྲགས་མཚོ་སོགས་ཀྱིས་རང་འཁྲིའི་བྱ་ལས་མང་པོའི་ཞོར་ཏུ་སྔ་དགོང་གི་དུས་ཚོད་མང་པོ་བེད་སྤྱད་དེ་རྒྱུ་ཆ་འཚོལ་བསྡུ་དང་ངོ་བཤུས་དག་བསྒྲིགས། དཔྱད་ཡིག་བསྡུར་དཔྱོད་སོགས་གང་ལའང་ཤུགས་ཆེན་པོས་རྒྱབ་སྐྱོར་རོགས་རམ་བྱས་པ་ལ་སྙིང་ཐག་པ་ནས་བཀའ་དྲིན་ཆེ་ཞུ་བ་ཡིན། མཐར་གསོ་བ་རིག་པའི་བསྟན་པ་ཡར་ངོས་ཟླ་ལྟར་འཕེལ་ཞིང་རྒྱལ་སྨན་སློབ་དཔོན་ཆེན་མོའི་སྐུ་ཚེ་རྒྱལ་མཚན་ལྟར་བརྟན་པར་སྨོན་ལམ་ཡང་ཡང་འདེབས།