«ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ»པར་དུ་བསྐྲུན་པ།

        དུས་རབས་གོང་མའི་ལོ་རབས80པ་ནས་བཟུང་། དུས་དེབ«སྦྲང་ཆར»གྱི་གཙོ་སྒྲིག་ཟུར་པ་འགྱུར་མེད་ལགས་ཀྱིས་སྣེ་ཁྲིད་ཅིང་། རྩོམ་སྒྲིག་པ་རྒན་དར་གཞོན་གསུམ་གྱི་བཀའ་དྲིན་ལ་བརྟེན་ནས། དང་པོར་དུང་དཀར་བློ་བཟང་འཕྲིན་ལས་ཚང་གིས་བརྩམས་པའི«སྙན་ངག་ལ་འཇུག་ཚུལ་ཚིག་རྒྱན་རིག་པའི་སྒོ་འབྱེད»པོད1ཅན་དང་། བློ་བཟང་ཆོས་གྲགས་དང་བསོད་ནམས་རྩེ་མོ་རྣམ་གཉིས་ཀྱིས་བསྒྲིགས་པའི«གངས་ལྗོངས་མཁས་དབང་རིམ་བྱོན་གྱི་རྩོམ་ཡིག་གསེར་གྱི་སྦྲམ་བུ»པོད3ཅན་རྩོམ་སྒྲིག་པར་སྐྲུན་གནང་སྟེ། ཕུ་ཆུ་ཡུར་དུ་དྲངས་ཤིང་ཡུར་ཆུ་ཞིང་དུ་དྲངས་པ་ལྟ་བུའི་བྱས་པ་མངོན་ཅན་དུ་བསྟབས་པ་དང་། བར་དུ«བོད་ཀྱི་དེང་རབས་རྩོམ་རིག་དཔེ་ཚོགས»པོད10ཡི་བདག་ཉིད་ཅན་རྩོམ་སྒྲིག་པར་སྐྲུན་མཛད་དེ། རྡོ་ལག་བརྒྱུད་དང་ཆུ་ལམ་བརྒྱུད་ཀྱི་རྣམ་ཐར་ཤིན་ཏུ་མི་དམན་པ་བསྐྱངས། ཕྱིས་སུ«སྦྲང་ཆར»རྩོམ་སྒྲིག་ཁང་གི་གཙོ་སྒྲིག་ལས་ཐོག་པ་སོ་སོ་དང་རྩོམ་སྒྲིག་པ་ཐུན་མོང་གིས་ཀྱང་སྔར་སྲོལ་བཟང་བོ་དམ་འཛིན་སྒོས་རིག་པའི་ཚན་ཁག་འདིའི་ཕྱོགས་གང་ཅིའི་ཐད་ལ་མཐོང་ཆེན་པོ་སྤྲད་ཅིང་། བོད་ཀྱི་རྩོམ་པ་པོ་སྐྱེད་སྲིང་དང་བོད་ཀྱི་དེང་རབས་རྩོམ་རིག་འཕེལ་རྒྱས་སུ་གཏོང་རྒྱུ་དེ་རྩ་བའི་རྩ་དོན་དུ་བཟུང་སྟེ། སྔ་ཕྱིར«སྦྲང་ཆར་ལོ་འཁོར20དཔེ་ཚོགས»པོད8ཅན་དང་། «དུས་རབས21པའི་བོད་ཀྱི་རྩོམ་པ་པོའི་དེབ་ཕྲེང»པོད30ཅན། «ཀྲུང་གོའི་བོད་ཀྱི་དེང་རབས་རྩོམ་རིག་གཅེས་བཏུས»པོད40ཅན་ཕུད། «སྨིན་དྲུག་རྩོམ་རིག་དཔེ་ཚོགས»པོད18ཅན་དང་། དེ་ཡང་ད་དུང་མུ་ནས་མུ་རུ་པར་སྐྲུན་བྱ་འཆར་ཡོད་པ་བཅས་ཀྱིས་མཚོན། ཆུ་རྔ་བྱེ་ཐང་དུ་མི་ཐིམ་ཞིང་ཕ་ཤུལ་བུ་ཆད་དུ་མི་འགྱུར་བའི་ཆོད་སེམས་དམ་པོར་བཅངས་ཐོག བོད་ཀྱི་དེང་རབས་རྩོམ་རིག་གི་རྨང་གཞིའི་འཛུགས་སྐྲུན་ཐད་རང་ནུས་ཅི་ལྕོགས་ངང་སྲི་ཞུ་གང་ལེགས་བསྒྲུབས་དང་སྒྲུབ་བཞིན་པ་འདི་ནི། རྩོམ་རིག་གི་ལས་ཀ་དོན་དུ་གཉེར་བ་ཐམས་ཅད་ལ་སྔར་ནས་གསལ་ཆ་ཆེ་བ་ལྟར་རོ།།         ང་ཚོས་ལོ་དེབ་འདི་འདྲ་ཞིག་ལོ་རེ་བཞིན་འཆར་ཅན་དུ་བསྒྲིག་རྒྱུའི་དམིགས་ཡུལ་ནི།  གཅིག་ན་དུས་ཐོག་ཏུ་ཀློག་པ་པོ་རྣམས་ཀྱི་སྤྱན་སྔར་ལོ་རེའི་ལེགས་རྩོམ་ཇི་སྙེད་ཅིག་གཅིག་སྡུད་སྒོས་འབུལ་བ་དང་། གཉིས་སུ་གསར་རྩོམ་ལ་འཇུག་བཞིན་པའི་རྩོམ་པ་པོ་རྣམས་ལ་དཔེ་ལྟའི་ཚུལ་དུ་མཚམས་སྦྱོར་བ། གསུམ་དུ་བོད་ཀྱི་དེང་རབས་རྩོམ་རིག་ལ་ཞིབ་འཇུག་དང་སློབ་ཁྲིད་བྱེད་མཁན་ཚོར་སྟབས་བདེ་སྐྲུན་པ། བཞི་རུ་བོད་ཀྱི་དེང་རབས་རྩོམ་རིག་གི་རིག་ཚན་འཛུགས་སྐྲུན་ཐད་རྨང་གཞིའི་རྒྱུ་ཆ་གསོག་ཉར་བགྱི་བ་བཅས་ཀྱི་ཆེད་དུ་ལགས་སོ། །
        རྩོམ་སྒྲིག་གི་གོ་རིམ་དངོས་ཀྱི་ཁྲོད། ཐོག་མར་བརྩམས་ཆོས་ཕུལ་དུ་བྱུང་བ་དག་བདམས་བསྒྲིགས་བྱ་སླད། དེབ་རེའི་ཡིག་གྲངས་ཁྲི20ལས་མི་བརྒལ་བ་དང་། བར་དུ་རྩོམ་སྒྲིག་གི་ལས་ཀ་གང་བདེར་ཡོང་བའི་ཆེད་དུ་དེབ་རེའི་གདམ་བྱ་དག་དུས་ཀྱི་སྔ་ཕྱི་ལྟར་བཀོད་པ། མཐའ་མར་ལོ་དེབ་ཧྲིལ་པོའི་ཐ་སྙད་སོགས་སྤྱི་ཕྱོགས་ནས་གཅིག་གྱུར་ཡོང་བའི་ཐད། རྩོམ་སྒྲིག་པ་ལྷན་རྒྱས་ཀྱིས་གྲོས་ཁ་ཡང་ཡང་བསྡུར་ཏེ་གཏན་ཁེལ་ཅི་ཐུབ་བྱས་ཡོད།
        ཡིན་ནའང་། གཞན་དབང་གི་དོན་དག་འགའ་རེ་ལྷགས་པ་ནི། ལོ་འདི་གའི་ནང་རྩོམ་སྒྲིག་ཁང་དུ་རྩོམ་སྒྲིག་མི་སྣ་ཉུང་བ་དང་། ལས་ཀའི་འགན་ཁུར་ལྕི་བ། ལོ་དེབ་བསྒྲིགས་པའི་ཉམས་མྱོང་ཞན་པ། འབྲེལ་ཡོད་མི་སྣ་ཡོངས་ལ་བཀའ་འདྲི་ཞུ་མ་ཐུབ་པ་བཅས་ཀྱི་རྐྱེན་ལས། བརྩམས་ཆོས་ལེགས་གྲས་སྐོར་ལས་གདམ་འོས་པ་དག་བདམས་ཐུབ་མེད་པ་དང་། བདམས་པ་དག་ཀྱང་ཕུལ་བྱུང་བརྩམས་ཆོས་སུ་བརྩི་མིན་ཆ་མི་འཚལ་བ། གཞན་ཡང་རྩོམ་སྒྲིག་པར་ཞུའི་ལས་ཀའི་ཁྲོད་འཐུས་ཤོར་བྱུང་བའི་རིགས་བཅས་ཀྱང་ཡོད་ངེས་པས། འདིར་ཤེས་ནས་སྨྲ་བ་རྣམས་ཀྱིས་དགོངས་འཆར་ལྷུག་སྩོལ་གནང་བའི་རེ་བ་དང་བཅས། བགྱི་བ་འདི་ཡང་བོད་ཀྱི་དེང་རབས་རྩོམ་རིག་དར་ཞིང་རྒྱས་པའི་རྒྱུ་རུ་གྱུར་ཅིག་གུ། །