༄༅། །«གངས་ལྗོངས་ཤེས་རིག་ཉིང་བཅུད་དཔེ་ཚོགས»(དེབ་ཕྲེང་གསུམ་པ)པར་སྐྲུན་འགྲེམ་སྤེལ་བྱས་པ།

        ཉེ་ཆར་མཚོ་སྔོན་མི་རིགས་དཔེ་སྐྲུན་ཁང་གིས«གངས་ལྗོངས་ཤེས་རིག་ཉིང་བཅུད་དཔེ་ཚོགས»(དེབ་ཕྲེང་གསུམ་པ)པར་སྐྲུན་འགྲེམ་སྤེལ་བྱས།

        དཔེ་ཚོགས་འདིའི་ནང་དུ་བོད་ཀྱི་སྲོལ་རྒྱུན་རིག་གནས་ཀྱི་ཉིང་བཅུད་དེ་བསྟན་བཅོས་གྲགས་ཅན་སྐོར་ཞིག་བདམས་ཡོད་དེ། དེབ་གཟུགས་ཆུང་ཞིང་ཀློག་བདེ་བ། སྤྱོད་སྒོ་ཡངས་པའི་ཁྱད་ཆོས་འབུར་དུ་ཐོན་འདུག ཐེངས་འདིའི«གངས་ལྗོངས་ཤེས་རིག་ཉིང་བཅུད་དཔེ་ཚོགས»(དེབ་ཕྲེང་གསུམ་པ)ནང་དུ། ས་པཎ་ཀུན་དགའ་རྒྱལ་མཚན་དང་ས་སྐྱ་ཨ་མྱེས་ཞབས་ཀྱིས་མཛད་པའི«རོལ་མོའི་བསྟན་བཅོས་དང་དེའི་རྣམ་བཤད» སློབ་དཔོན་འཆི་མེད་སེང་གེས་མཛད་པའི«མངོན་བརྗོད་འཆི་མེད་མཛོད» རྗེ་ཙོང་ཁ་པ་སོགས་ཀྱིས་མཛད་པའི«རྒྱན་འཇུག་གཉིས་དང་བསྟོད་ཆེན་བཞིའི་རྩ་བ» སློབ་དཔོན་ཙནྡྲ་གོ་མི་དང་ངག་དབང་བློ་བཟང་མཁས་གྲུབ་ཀྱིས་མཛད་པའི«སློབ་སྤྲིངས་རྩ་འགྲེལ» པྲ་ཏི་རིན་ཆེན་དོན་གྲུབ་ཀྱིས་མཛད་པའི«པྲ་ཏིའི་སུམ་རྟགས་དགོངས་འགྲེལ» དགེ་འདུན་ཆོས་འཕེལ་གྱིས་མཛད་པའི«དེབ་ཐེར་དཀར་པོ» བོད་མཁས་པ་མི་ཕམ་དགེ་ལེགས་རྣམ་རྒྱལ་གྱིས་མཛད་པའི«སྙན་ངག་གི་དོགས་དཔྱོད» ངར་རྒོད་ནམ་མཁའ་སེང་གེས་མཛད་པའི«ནད་རྟགས་གསལ་སྟོན» འདར་སྟོད་དགྲ་འདུལ་དབང་པོས་མཛད་པའི«ཐ་སྙད་རིག་གནས་ལྔའི་བྱུང་ཚུལ» ཀུན་མཁྱེན་འཇམ་དབྱངས་བཞད་པའི་རྡོ་རྗེས་མཛད་པའི«ཀུན་མཁྱེན་བློ་རྟགས»བཅས་ཡོད་དོ། །

        «གངས་ལྗོངས་ཤེས་རིག་ཉིང་བཅུད་དཔེ་ཚོགས»(དེབ་ཕྲེང་དང་པོ) (དེབ་ཕྲེང་གཉིས་པ)པར་སྐྲུན་འགྲེམ་སྤེལ་གནང་རྗེས། ཀློག་པ་པོ་རྣམས་ཀྱི་དགའ་བསུ་ཆེན་པོ་ཐོབ་ཅིང་བསྐྱར་དཔར་ཐེངས་མང་པོ་བྱས་མྱོང་། «གངས་ལྗོངས་ཤེས་རིག་ཉིང་བཅུད་དཔེ་ཚོགས»(དེབ་ཕྲེང་དང་པོ)ནི། «མཁས་པ་འཇུག་པའི་སྒོ» «ཆག་ལོ་ཙཱ་བའི་རྣམ་ཐར» «བྱང་ཆུབ་ལམ་སྒྲོན་གྱི་འགྲེལ་པ» «གྲུབ་མཐའ་རིན་ཆེན་ཕྲེང་བ་དང་ས་ལམ་རྣམ་གཞག» «རྒྱལ་པོ་ར་མ་ཎིའི་གཏམ་རྒྱུད་ཀྱི་འགྲེལ་པ» «མིང་གི་རྣམ་གྲངས» «ཀོང་སྤྲུལ་ཟིན་ཏིག» «རྟེན་འབྲེལ་བསྟོད་པའི་རྩ་འགྲེལ» «ལམ་རིམ་ཚིགས་བཅད་མ» «ཀླུ་སྒྲུབ་དགོངས་རྒྱན»བཅས་དང་། དེབ་ཕྲེང་གཉིས་པ་ནི། «ལྡེའུ་ཆོས་འབྱུང» «སྨྲ་སྒོ་མཚོན་ཆའི་རྩ་འགྲེལ» «དཔེ་ཆོས་དང་བེའུ་བུམ་སྔོན་པོ» «གཅེས་བསྡུས་འཆི་མེད་ནོར་ཕྲེང» «བཟོ་གནས་ཉེར་མཁོ་གཅེས་བསྡུས» «ཐུན་མོང་རིག་གནས་ཀྱི་རྣམ་བཞག» «བཤེས་པའི་སྤྲིངས་ཡིག་གི་རྩ་འགྲེལ» «སྔགས་ཀྱི་བཀླག་ཐབས་གཅེས་བསྡུས» «སྐར་རྩིས་ཀྱི་མན་ངག་རིགས་ལྡན་སྙིང་ཐིག» «མངོན་བརྗོད་ཀྱི་བསྟན་བཅོས་མཁས་པའི་རྣ་རྒྱན»བཅས་སོ། །