༄༅། །«སྙན་སྒྲོན་སྒྱུ་རྩལ་གླེང་བ»ཞེས་པ་པར་སྐྲུན་འགྲེམ་སྤེལ་བྱས།

        འབྲུག་མོ། མིང་འདི་ནི་མཚོ་སྔོན་བོད་སྐད་རླུང་འཕྲིན་ལ་ཉན་པར་གོམས་པའི་མི་ཞིག་ལ་མཚོན་ན། ཤིན་ཏུ་ཆ་རྒྱུས་ཡོད་པའི་མིང་ཞིག་ཡིན་སྲིད། འབྲུག་མོ། མཚོ་སྔོན་རླུང་འཕྲིན་བརྙན་འཕྲིན་ལས་ཁུངས་ཀྱི་མིང་དུ་གྲགས་པའི་དབུ་འཛིན་སྙན་སྒྲོན་པ། ཆེད་རྩོམ་ཕྱོགས་བསྡུས་དཔེ་དེབ་འདིའི་རྩོམ་པ་པོའོ། །
        ལོ་ངོ་སུམ་ཅུའི་ཡར་སྔོན་ལ། འབྲུག་མོས་མཚོ་སྔོན་མི་རིགས་སློབ་གླིང་གི་སློབ་ཐོན་ལག་ཁྱེར་བཟུང་སྟེ། མཚོ་སྔོན་བོད་སྐད་རླུང་འཕྲིན་ལས་ཁུངས་ཀྱི་སྒོ་ཐེམ་བརྒྱུད་ནས་སྤྱི་ཚོགས་སྟེང་གོམ་པ་དང་པོ་སྤོས། མོའི་བཤད་ཚུལ་ལྟར་ན། དེ་ནི་ཆུང་དུས་ཀྱི་རྨི་ལམ་དེའི་འཕྲོ་བསྐྱངས་པ་ཡིན་ལ། མོ་རང་ཤ་ཡི་གསེང་དང་། རུས་པའི་གཏིང་ནས་དགའ་བའི་ཕུགས་བསམ་གྱི་ཆེད་དུ་ལག་ཐོག་དོན་ལ་ཕྱོགས་པ་ནི། རང་ཉིད་ལམ་ལྷོང་ལེགས་འགྲུབ་ཡོང་བའི་གྲོགས་སུ་གྱུར་པ་ཡིན་ཟེར། བདེན་པ་རེད། ཉིན་དེ་ནས་བཟུང་སྟེ། གཟི་བརྗིད་ཀྱི་བཀྲག་མདངས་འཚེར་ཡང་ངོམ་འཕྱར་གྱི་རྫུ་བག་མེད་ལ། དགོས་འཛོམས་ཀྱི་ཤེས་བྱས་བརྟས་ཀྱང་སྟོང་འུད་ཀྱི་ཚུལ་འཆོས་མེད་པ། རྨད་བྱུང་གི་མཛེས་པ་ལྡན་ཡང་རང་ཆེ་ཡི་སྲོལ་བསྟོད་མེད་པ་བཅས། མོར་སྤྲོ་བ་དང་རང་རྟོན་ཚད་མེད་སྟེར་བར་བྱེད་ཅིང་། སེམས་གཏམ་སྲོང་པོར་བརྗོད་ཆོག་པའི་མཚོ་སྔོན་བོད་སྐད་རླུང་འཕྲིན་གྱི་སྙན་སྒྲོན་བྱ་བ་དེ། མོ་རང་ཉིད་ཀྱི་མི་ཚེ་གཅིག་གི་རེ་ལྟོས་སུ་གཏམས་ཤིང་། ཡོད་ཚད་ལས་དོན་དེའི་ཕྱོགས་སུ་ཕངས་མེད་དུ་སྟོབ་པར་བྱ་བའི་གཏན་འདུན་ལ་རྩེ་གཅིག་གིས་གཞོལ་ལོ། །         མཚན་མོར། མ་ཕྱི་བརྩེགས་མ་དེ་ཤོག་ཁུག་ལས་ཕྱུང་སྟེ་བདག་གིས་ཞིབ་ཏུ་ལྟ་མགོ་བརྩམས། ཆེད་རྩོམ་གྱི་མ་ཕྱི་རེ་རེ་བཞིན་བལྟས་པ་དང་བཅས་ཏེ། དཔེར་ན་སོས་ཀའི་རྣང་ཞིང་གྲུ་བཞི་ལས་ཐོན་པའི་ལྗང་མྱུག་གི་སྔོ་དྲི་ཞིམ་པོ་ཞིག་སྣ་སྒོར་ལང་ལོང་གིས་ལྡང་ནས་ཐོན་པ་བཞིན། སྟོན་ཀའི་གསེར་མདོག་གི་རྣམ་པ་ཞིག་མིག་ལམ་ལ་ཤར་མར་འཆར་ནས་ཐོན་པ་བཞིན། གཡུར་དུ་ཟ་བའི་འབྲས་བུ་རེ་རེ་ལྗིད་ཀྱིས་དུད་པའི་དགེ་བའི་མཚན་དུ་མ་ཞིག་གསལ་ལྷང་ལྷང་མངོན་ནས་ཡོང་བ་བཞིན། ཆེད་རྩོམ་རེ་རེ་ནང་མི་གཤིས་ཀྱི་གཟི་མདངས་ཤིག་གིས་ཀུན་ནས་སྤུད་ཅིང་། བུད་མེད་དར་མ་ཞིག་གི་བསམ་པའི་འཕེལ་རིམ་དང་བྱ་བའི་བརྒྱུད་རིམ། ལག་ལེན་ཁྲོད་ཐོབ་པའི་མྱོང་ཚོར་དང་། ཤེས་རྟོགས། ཉམས་མྱོང་སོགས་ཟིན་བྲིས་སུ་བཏབ་ཡོད་པས། འབྲུག་མོས་རིག་གཞུང་ལ་བཅངས་པའི་བརྟན་ནན་གྱི་རྣམ་འགྱུར་དང་། འགྱུར་མེད་ཞེན་འཛིན་གྱི་རང་ཚུགས་གང་ལེགས་ཀྱིས་མཚོན་ཡོད་པར་མ་ཟད། བོད་པའི་བུད་མེད་མཛངས་མ་ཞིག་གི་རིག་གཞུང་ལས་ཐོབ་པའི་ཤེས་རབ་དང་། ལག་ལེན་ལས་འབྱོངས་པའི་བློ་གྲོས་མཐོང་ཐུབ་བོ། །
        མདོར་ན། བོད་ཡིག་གི་མ་ཕྱི་བརྩེགས་མ་འདི་བཀླགས་རྗེས། བདག་ལ་བག་ཆགས་ཟབ་མོ་ཞིག་བཞག་པ་ནི། མི་ལོ་བཅུ་ཤས་རིང་གི་སེམས་ཀྱི་རྩོལ་བ་བརྒྱུད་ནས་བརྩམས་པའི«སྙན་སྒྲོན་སྒྱུ་རྩལ་གླེང་བ»ཞེས་པའི་དཔེ་དེབ་འདིའི་རྩོམ་པ་པོ་ནི། འགན་འཁྲིའི་བསམ་པ་དང་། འགན་ལེན་གྱི་བསམ་པ། ཉམས་ཉེན་གྱི་བསམ་པ་བཅས་ཤུགས་དྲག་ལྡན་ཞིང་། ཆེད་ལས་རིག་གཞུང་གི་རྨང་གཞི་བརྟན་པ་དང་། གསར་གཏོད་ཀྱི་སྙིང་སྟོབས་དང་། སྙན་སྒྲོན་གྱི་ཉམས་མྱོང་ཕུན་སུམ་ཚོགས་པ་བཅས་ཡོད་པའི་འཇོན་མི་ཞིག་ཡིན་ཕྱིར།མོའི་ཆེད་རྩོམ་ཕྱོགས་བསྡུས་དཔེ་དེབ་འདིས། ཀློག་པ་པོ་གང་མང་མང་དང་། སྒོས་སུ་རླུང་འཕྲིན་དང་བརྙན་འཕྲིན་སྡེ་ཁག་གི་གསར་གཞོན་ཆེད་ལས་ཀློག་པ་པོ་རྣམས་ཀྱི་བློ་སྒོ་འབྱེད་པའི་ལྡེ་མིག་དང་། དཔེ་གཞིར་འཛིན་པའི་མེ་ལོང་ལྟ་བུའི་ནུས་པ་འདོན་ཐུབ་ལ་ཐོན་ཐུབ་པའི་སྨོན་འདུན་དང་བཅས་ཏེ། དཔེ་དེབ་འདིའི་རྩོམ་པ་པོ་འབྲུག་མོ་ལགས་ཀྱི་སྙིང་གཏམ་དུམ་བུ་ཞིག་གིས་གླེང་གཞི་འདིའི་མཇུག་བསྡུ་བར་བྱ།
        “རང་ཉིད་མདུན་དུ་འཁྲིད་མཁན་རང་ཉིད་ལས་གུད་ན་མེད་ཅིང་། མི་ཚེ་ཡི་རིན་ཐང་རྔུལ་ཆུ་ཁོ་ནས་བསྐྲུན་དགོས་པས། ང་ཅི་མ་ཡིན་ལ་སྡོད་མི་འདོད་ཅིང་ཅི་མ་ཡིན་ལ་སྡོད་མི་བཟོད། རང་ཉིད་ཀྱི་ཆུ་ཚད་རང་ཉིད་ཀྱིས་ཤེས་ན་ཡང་། རང་ཉིད་ཀྱི་ནང་རྫོང་རང་ཉིད་ལ་གསལ་ན་ཡང་། ངས་རང་ཉིད་ཀྱི་མི་ལོ་སུམ་ཅུ་རིང་གི་སྙན་སྒྲོན་གྱི་ཉམས་མྱོང་ཕྲན་བུ་དག་འདི་ནས་ཅིས་ཀྱང་བརྗོད་པར་འདོད། །” སྒོ་མེ་རྡོ་རྗེ་རིན་ཆེན། མཚོ་སྔོན་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་ཐའེ་ཀྲང་གཞོན་པ་ཟུར་པ།