གསར་པར་དཔེ་དེབ་འོས་སྦྱོར།

       འདིར་རྫོང་སར་བློ་གྲོས་བོད་སྨན་ཞིབ་འཇུག་ཁང་གིས་བསྒྲིགས་པའི་གཡུ་ཐོག་བེའུ་བུམ་མམ་གཡུ་ཐོག་སྙིང་ཐིག་སྐོར་གྱི་དཔེ་ཚོགས་འདི་ཉིད་པོད་བཞི་ཡིས་གྲུབ་ཡོད་དེ།
       པོད་དང་པོ་ཐོག་མར་རྣམ་ཐར་ལོ་རྒྱུས་སྐོར་ལ། བླ་མ་བརྒྱུད་པའི་རྣམ་ཐར་གཡུ་ཐོག་གསར་རྙིང་གི་རྣམ་ཐར་དབུས་པར་དང་སྡེ་དགེའི་ཤིང་པར་སྔར་ཡོད་གློག་ཀླད་དུ་འབྲུ་ལེན་ཞུས་ཏེ་དཔེ་བསྡུར་གང་ལེགས་གནང་ཞིང་། དེ་ནས་སུམ་སྟོན་ཡེ་ཤེས་གཟུངས་ནས་རྫོང་སར་བོད་སྨན་ཞིབ་འཇུག་ཁང་དུ་བརྒྱུད་པའི་བར་གྱི་བླ་མ་ལྔ་བཅུ་ལྷག་གི་རྣམ་ཐར་མདོར་བསྡུས་རེ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱི་བླ་བརྒྱུད་གསོལ་འདེབས་ལ་གཞིར་བྱས་ཏེ་གསར་དུ་བསྒྲིགས་ཡོད།
       པོད་གཉིས་པ་གཡུ་ཐོག་བེའུ་བུམ་རྩ་གཞུང་སྡེ་དགེའི་ཤིང་པར་སོར་བཞག་བྱས་ཡོད་ལ། ཤིང་པར་དེར་མ་དག་པ་མང་ཚུལ་འཇམ་དབྱངས་མཁྱེན་བརྩེའི་དབང་པོ་ནས་དཔེ་མཚོན་དང་བཅས་གསུངས་པ་བཞིན་གང་དཔོག་འབྲུ་བཅོས་ཕྲན་བུ་རེ་ཞུས་ཤིང་དབུས་པར་ལའང་གཏུགས་ཡོད།
       པོད་གསུམ་པ་ཆོག་སྒྲིག་སྐོར་ལ་རང་རང་གི་ལུགས་སྲོལ་འགའ་ཙམ་མཆིས་པ་ལས་འདིར་འཇམ་མགོན་མཁྱེན་ཀོང་རྣམ་གཉིས་ཀྱིས་ཆོག་སྒྲིག་མཛད་པ་གཞིར་བཞག་བྱས་ཡོད་ཅིང་། དེ་ལ་དེང་དུས་བསྙེན་སྒྲུབ་བྱེད་པོ་ལས་དང་པོ་བ་རྣམས་ལ་མཁོ་ཕྱིར་འཇམ་མགོན་བླ་སྒྲུབ་ཟིན་བྲིས་ལ་ངག་འདོན་ནག་འགྲོས་སུ་བྱས་པ་དང་། སྒྲུབ་པ་དང་སྒྲུབ་ཆེན་སྐབས་ཉེར་མཁོ་གསང་སྒྲུབ་ཀྱི་བཟླས་དམིགས་དང་དངོས་གྲུབ་ལེན་ཆོག་ནག་འགྲོས་སུ་སྦྱར་པའི་ཟུར་འཕྱངས། གཡུ་ཐོག་སྙིང་གི་ཐིག་ལེའི་སྒྲུབ་པ་ཆེན་པོའི་ཁོག་དབུབ། གཡུ་ཐོག་སྙིང་གི་ཐིག་ལེའི་ཕྲིན་ལས་བསྡུས་པ་རྒྱུན་ཁྱེར་བཅས་དང་། ཟབ་ཁྲིད་འཆད་ཐབས་བཅས་གསར་དུ་བྲིས་ཤིང་། ཆོ་ག་རྣམས་དེང་དུས་སེར་སྐྱ་ཀུན་མཉམ་དུ་ཚོགས་པ་ལ་སྟབས་བདེའི་ཕྱིར་ནག་འགྲོས་དགོས་པ་རྣམས་ནག་འགྲོས་ཞུས་ཡོད། དེ་མིན་ཟུར་བཀོལ་ལ་དུང་རོལ་འདོན་མཚམས་སོགས་མཆན་བུ་ཡོད་པ་གཅིག་བཅས་པོད་བཞི་ཡིས་གྲུབ།