དབུས་ཀྱི་རྩོམ་པ་པོ་གྲགས་ཅན་གཉིས་ཀྱི་བརྩམས་དེབ་པར་སྐྲུན་བྱས་འདུག

       ཉེ་ལམ་དབུས་ཀྱི་རྩོམ་པ་པོ་གྲགས་ཅན་བསམ་ཤོད་པ་དཀོན་ཅོག་ཡོན་ཏན་སྒྲུང་རིང་དེབ་དང་རྒན་གོང་ཨོ་རྒྱན་རྡོ་རྗེའི་སྙན་ངག་དེབ་གཉིས་བོད་ལྗོངས་མི་དམངས་དཔེ་སྐྲུན་ཁང་གིས་པར་སྐྲུན་འགྲེམས་སྤེལ་བྱས་འདུག

       སྒྲུང་རིང«འཁོར་བའི་ཉི་མ»ཞེས་པ་ནི། བོད་ཀྱི་ཞིང་གྲོང་གི་སྐུ་དྲག་སྒེར་པ་གཟིམ་ལྷུན་རབ་པའི་སྲས་སྐུ་བགྲེས་རྡོ་རྗེ་དཔལ་བཟང་དང་། གམ་གཡོག་རྒྱ་དོར་གཉིས་ཀྱི་མི་ཚེའི་བརྒྱུད་རིམ་གསར་རྩོམ་གྱི་གཙོ་ཐིག་གཉིས་སུ་བྱས་ཏེ། ཉེ་རབས་བོད་ཀྱི་སྤྱི་ཚོགས་འཕེལ་རྒྱས་ཀྱི་ལོ་རྒྱུས་ཆུ་རྒྱུན་ཁྲོད་ཐོན་པའི་དབྱིན་འགོག་གཡུལ་འགྱེད་དང་། བཀས་བཀོད་སྤྱི་ཚོགས། ཞི་བའི་བཅིངས་འགྲོལ། ཟིང་འཁྲུག་ཞོད་འཇགས། དམངས་གཙོའི་བཅོས་སྒྱུར། རང་སྲུང་རྒོལ་ལན། སྒྱུར་བཅོས་སྒོ་དབྱེ་སོགས་གལ་ཆེའི་ལོ་རྒྱུས་ཀྱི་དོན་རྐྱེན་རབ་དང་རིམ་པར་གཞི་འཛིན་གྱིས་ཐབས་མཁས་ངང་གཅིག་འཇགས་གཉིས་ལངས་སུ་གྱུར་བའི་མི་སྒེར་གྱི་ཀྱག་ཀྱོག་ལས་དབང་འབྲི་བཞེངས་བྱ་ཐབས་ལ་བརྟེན་ནས་གསོན་ཉམས་དོད་པོས་ཆེ་བ་སྤྱི་ཚོགས་ཀྱི་འཕོ་འགྱུར་དང་ཆུང་བ་ཁྱིམ་རྒྱུད་ཀྱི་དར་རྒུད་མངོན་པར་བྱས་ཡོད། དེ་ཡང་ཕྱོགས་གཅིག་ནས་རྒྱ་ཁྱབ་གཏིང་ཟབ་ཀྱི་སྒོ་ནས་བོད་རྙིང་པའི་བཀས་བཀོད་རྒྱུད་འཛིན་གྱི་ལམ་ལུགས་འོག་མཐོ་རིམ་སྐུ་དྲག་ནང་ཁུལ་དབར་ཕན་ཚུན་མགོ་བདེ་གཡོ་འཕྲུལ་དང་། མངོན་འཛིང་ལྐོག་འཐབ། གོ་གནས་འཕྲོག་རྩོད། ནང་བྲན་ཉོ་ཚོང་། བྲན་མོར་རྡོག་རོལ་སོགས་ཐ་ཤལ་སྐྱུག་བྲོའི་མུན་ནག་གི་སྡིག་ཏོའི་བྱ་ངན་དུ་མ་དམར་རྗེན་དུ་ཐེར་འདོན་བྱས་ཤིང་། ཕྱོགས་གཞན་ཞིག་ནས་རླབས་ཆེན་ཀྲུང་གོ་གུང་ཁྲན་ཏང་གི་འགོ་ཁྲིད་གནང་བའི་སྤྱི་ཚོགས་རིང་ལུགས་ཀྱི་ལམ་ལུགས་འོག་མི་དམངས་བཅིངས་འགྲོལ་དམག་གིས་རྒྱ་ཆེའི་བོད་རིགས་མི་དམངས་ལ་སྣེ་ཁྲིད་ཀྱིས་དམངས་གཙོའི་བཅོས་སྒྱུར་བྱས་པ་བརྒྱུད་རང་ཁྱིམ་རང་བདག་དང་། དེ་བཞིན་སྒྱུར་བཅོས་སྒོ་དབྱེ་དང་བདེ་སྡོད་ལས་བརྩོན་སོགས་བདེ་སྐྱིད་ཀྱི་འོད་སྟོང་འབར་བའི་གསར་སྐྱེས་ལ་བསྔགས་བརྗོད་གནང་འདུག

       བསམ་ཤོད་པ་དཀོན་ཅོག་ཡོན་ཏན་ལགས་ནི། ༡༩༦༡ལོར་ཡར་འབྲོག་སྟག་ལུང་དུ་སྐྱེས། བོད་ལྗོངས་སློབ་ཆེན་བོད་སྐད་ཡིག་རྩོམ་རིག་ཚན་ཁག་ནས་ཐོན། ད་ལྟ་ཀྲུང་གོའི་དམངས་ཁྲོད་རྩོམ་རིག་སྒྱུ་རྩལ་མཁས་པའི་མཐུན་ཚོགས་ཀྱི་ཚོགས་མི་དང་། བོད་ལྗོངས་རྩོམ་པ་པོའི་མཐུན་ཚོགས་དང་བོད་ལྗོངས་དམངས་ཁྲོད་རྩོམ་རིག་སྒྱུ་རྩལ་མཁས་པའི་མཐུན་ཚོགས་ཀྱི་ཚོགས་མི། ལྷོ་ཁའི་རྩོམ་པ་པོ་མཐུན་ཚོགས་ཀྱི་ཀྲུའུ་ཞི་གཞོན་པ། བོད་ལྗོངས་ཚངས་དབྱངས་རྒྱ་མཚོ་རིག་གནས་མཐུན་ཚོགས་ཀྱི་ཚོགས་མི་བཅས་ཡིན། ༡༩༨༠ལོ་ནས་བཟུང་སྔ་རྗེས་སུ་བོད་རྒྱ་ཡིག་རིགས་གཉིས་ཀྱི་ལམ་ནས«ཀྲུང་གོའི་བོད་རིག་པ»དང་། «ཀྲུང་གོའི་བོད་ལྗོངས།» «མི་རིགས་ཀྱི་རྩོམ་རིག» «སྦྲང་ཆར།» «བོད་ཀྱི་རྩོམ་རིག་སྒྱུ་རྩལ།» «སྤང་རྒྱན་མེ་ཏོག» «ལྷོ་ཁའི་རྩོམ་རིག་སྒྱུ་རྩལ»སོགས་དུས་དེབ་དུ་མའི་སྟེང་རྩོམ་རིག་དང་། དམངས་སྲོལ། ཞིབ་འཇུག བསྒྱུར་རྩོམ་སོགས་ཀྱི་བརྩམས་ཆོས༤༠༠ལྷག་ཙམ་སྤེལ། སྔ་ཕྱིར། འཛམ་གླིང་སློབ་གསོའི་གྲགས་རྩོམ«ཁྱེའུ་དུས་སློབ་གསོའི་མན་ངག»བོད་འགྱུར་མ་དང་། རིག་གནས་ལྗོངས་རྒྱུའི་མུ་སྦྲེལ་ལྷུག་རྩོམ་རིང་མོ«ཡར་འབྲོག་གི་ལམ་ཡིག» ལྷུག་རྩོམ་གཅེས་བཏུས«མི་ཡུལ་གྱི་དག་ཞིང»སོགས་པར་སྐྲུན་འགྲེམས་སྤེལ་བྱས། «རླུང་འདྲེན་ཟིན་ཐོ»ཞེས་པར«མི་རིགས་རྩོམ་རིག»གི༢༠༡༩ལོའི་ལོ་འཁོར་བསྒྱུར་རྩོམ་བྱ་དགའ་དང་། «ཡར་འབྲོག་གི་ལམ་ཡིག»ཅེས་པར་ལྷོ་ཁ་གྲོང་ཁྱེར་གྱི་སྐབས་གཉིས་པའི་ཡར་ཀླུང་རྩོམ་རིག་གི་བྱ་དགའ་ཐོབ།
————

       རྒན་གོང་ཨོ་རྒྱན་རྡོ་རྗེ། སྨྱུག་མིང་ལ་ལྗང་གཞོན་དུ་འབོད། བོད་ལྗོངས་ལྷོ་ཁ་གྲ་ནང་རྫོང་ཟར་ཕུ་ཤར་གྲོང་ཚོའི་ཞིང་པའི་དུད་ཁྱིམ་ཞིག་ཏུ་འཁྲུངས། ༡༩༨༢ལོ་ནས་རྩོམ་རིག་གསར་རྩོམ་གྱི་ལམ་དུ་ཞུགས་ཤིང་། ༡༩༨༣ལོར«ལྷོ་ཁའི་རྩོམ་རིག་སྒྱུ་རྩལ»རྩོམ་སྒྲིག་པུའུ་རུ་ལས་བསྒྱུར་གནང་། ཁོང་ལ་སློབ་གྲྭ་ཆེན་མོར་བསྐྱོད་པའི་གོ་སྐབས་མ་བྱུང་ཡང་རང་སྦྱོང་གི་རྐང་ལམ་ཕྲ་མོ་བརྒྱུད་དེ་ད་བར་ཐོན་འབབ་མཐོ་ལ་རྒྱུ་སྤུས་ལེགས་པའི་རྩོམ་རིག་གི་སོ་ནམ་པ་རྩེ་གྲ་ཞིག་ཡིན། ད་ལྟ་ཁོང་ནི་ཀྲུང་གོའི་རྩོམ་པ་པོའི་མཐུན་ཚོགས་ཀྱི་ཚོགས་མི་དང་། ཀྲུང་གོའི་གྲངས་ཉུང་མི་རིགས་རྩོམ་པ་པོའི་སློབ་ཚོགས་ཀྱི་ཚོགས་མི། ཀྲུང་གོའི་དམངས་ཁྲོད་རྩོམ་རིག་མཁས་པའི་མཐུན་ཚོགས་ཀྱི་ཚོགས་མི། བོད་ལྗོངས་རྩོམ་པ་པའི་མཐུན་ཚོགས་ཀྱི་ལས་འཛིན་པ། བོད་ལྗོངས་དམངས་ཁྲོད་རྩོམ་རིག་མཁས་པའི་མཐུན་ཚོགས་ཀྱི་ཚོགས་མི། ལྷོ་ཁའི་རིག་རྩལ་ལྷན་ཚོགས་ཀྱི་ཀྲུའུ་ཞི་གཞོན་པ་སོགས་ཀྱི་འགན་འཁུར་མུས་ཡིན། རྩོམ་རིག་བརྩམས་ཆོས་སུ་རྩོམ་དེབ«མཐོ་སྒང་གི་རླུང»དང་། སྙན་དེབ«ཕ་ས་མྱུལ་བའི་རྣམ་ཤེས་ཕྲ་མོ» «ཀླུང་ཆེན་ཤར་དུ་རྒྱུ» བསྒྱུར་དེབ«ཇ་ཤིང་མེ་ཏོག་མ»དང«སྦལ་པ» མི་སྣའི་ལོ་རྒྱུས«ལྷོ་ཁའི་གྲགས་ཅན་མི་སྣ་རིམ་བྱོན་གྱི་མཚན་མཛོད»སོགས་དཔེ་དེབ་བཅུ་བདུན་ཙམ་དཔེ་སྐྲུན་བྱས་པ་དང་གསར་རྩོམ་དང་བསྒྱུར་རྩོམ་ཁག་ལ་རྒྱལ་ཁབ་དང་ལྗོངས་རིམ་པའི་བྱ་དགའ་ཐེངས་མང་ཐོབ་ཡོད།

ནང་དོན་གྱི་ཡོང་ཁུངས། བོད་ལྗོངས་མི་དམངས་དཔེ་སྐྲུན་ཁང་གི་འཕྲིན་སྟེགས།