«གུ་གེ་རྒྱལ་རབས་དར་རྒུད་ཀྱི་ལོ་རྒྱུས་ཞིབ་འཇུག»ཅེས་པ་པར་སྐྲུན་བྱས་པ།

       དེ་ཡང་སྤྱི་ལོ841ལོར་བོད་ཆེན་པོའི་བཙན་པོའི་འུ་དུམ་བརྟན་སྐུ་བཀྲོངས་རྗེས། ཕོ་བྲང་ནང་ཁུལ་དུ་གཅེན་ལ་མ་འཆམ་པར་ཡུམ་བརྟན་དང་འོད་སྲུང་ཕྱོགས་ཁག་གཉིས་སུ་གྱེས་ཤིང་སོ་སོའི་ཕྱོགས་བློན་འབངས་ཐ་དད་ཀྱིས་བཟུང་སྟེ་ཡུམ་བརྟན་གྱིས་དབུ་རུ། འོད་སྲུང་གིས་གཡོ་རུ་བཟུང་ནས་དབུ་གཡོར་འཁྲུག་པར་བྱས། ཡུལ་གྲུ་ཕལ་མོ་ཆེར་ཆེ་སྲིད་དང་ཆུང་སྲིད། མང་ཚན་དང་ཉུང་ཚན། གསེར་པ་དང་གཡུ་པ། ཤ་གཟན་དང་རྩམ་གཟན་ཞེས་སྡེ་གཉིས་གཉིས་སུ་ཆད་དེ་སྟོབས་འབྱོར་མངའ་ཐང་ཕུན་སུམ་ཚོགས་པའི་བོད་བཙན་པོའི་རྒྱལ་རབས་སིལ་བུར་འཐོར་བའི་ངང་ཚུལ་ཡིད་སྐྱོ་བ་དེ་བྱུང་། དེ་དང་མཉམ་དུ་མདོ་སྨད་ནས་དབུས་གཙང་ལ་ཐུག་གི་བར་བོད་ཁམས་ཡོངས་ལ་འབངས་ཁེང་ལོག་བྱུང་སྟེ་ཡུལ་མཐའ་སོ་སྲུང་གི་དམག་དཔོན་རྣམས་ཀྱང་ཕན་ཚུན་འཁྲུག་ལོང་གི་ནང་དུ་ཞུགས་པས་ཕྱིའི་སོ་ཁ་ཤོར་བ་དང་། ནང་དུ་གཅིག་གྱུར་གྱི་སྲིད་དབང་འཛིན་ཐུབ་མཁན་མ་བྱུང་ལ། དར་མའི་སྲས་ཡུམ་བརྟན་དང་འོད་སྲུང་གི་རྒྱུད་པ་དག་གིས་ཀྱང་གཅིག་ཁོངས་གཅིག་ལ་མི་འདུ་བའི་རྒྱལ་ཕྲན་མང་པོ་བཙུགས། དེ་དག་གི་ཁྲོད་ནས་ཁྲི་གནམ་ལྡེ་འོད་སྲུང་གི་རྒྱུད་པས་བཟུང་བ་གུ་གེ་རྒྱལ་རབས་སུ་གྲགས་པ་དེ་ཉིད་ལོ་ངོ་བདུན་བརྒྱར(སྤྱི་ལོ980-1630)ཉེ་བའི་རིང་སྟོད་མངའ་རིས་ཀྱི་ཡུལ་དུ་རྒྱལ་ཐོག་སུམ་ཅུ་ཙམ་འདས་ཤིང་། ཆོས་སྲིད་གང་གི་ཐད་ནས་ཀྱང་བོད་ཀྱི་ལོ་རྒྱུས་སྟེང་གོ་གནས་མི་དམན་པ་བཟུང་མྱོང་བར་མ་ཟད། བོད་ཀྱི་ལོ་རྒྱུས་སྟེང་གི་རྒྱལ་རབས་རིང་ཤོས་སུ་གཏོགས་ཀྱང་། རྒྱུ་རྐྱེན་སྣ་ཚོགས་ཀྱི་དབང་གིས་ལོ་རྒྱུས་དེབ་ཐེར་བྱིངས་སུ་ལ་དྭགས་དང་། གུ་གེ སྤུ་རང་། ཡ་ཙེ་རྣམས་ཀྱི་བྱུང་བ་དག་གཅིག་ཏུ་བསྡུས་ནས་མངའ་རིས་རྒྱལ་རྒྱུད་དམ་ཞང་ཞུང་རྒྱལ་རྒྱུད་ཅེས་རགས་ཙམ་ལས་རྒྱས་པར་བཀོད་པ་མི་འདུག་ལ། ལོ་རྒྱུས་སྨྲ་བ་དག་གིས་ཀྱང་བོད་སིལ་བུའི་དུས་སྐབས་ཀྱི་གནས་སྟངས་ལ་དཔྱད་ཞིབ་མཛད་པ་ཉུང་ཞིང་། ཁྱད་པར་དུ་གུ་གེ་ནི་མཐའི་རྒྱལ་ཕྲན་ཞིག་ཡིན་པས་བཏང་སྙོམས་སུ་བཞག་པར་མཐོང་། སྤྱིར་སྟོད་མངའ་རིས་སྐོར་གསུམ་གྱི་ལྗོངས་འདིར་ངོ་མཚར་ཆེ་བའི་ལོ་རྒྱུས་དང་། རྒྱལ་རབས། ཆོས་འབྱུང་། གནའ་རབས་ཀྱི་རིག་དངོས། དེ་བཞིན་གཏམ་རྒྱུད་སོགས་གསལ་བོར་འཁོད་པའི་ཡིག་ཆ་ཕུན་སུམ་ཚོགས་པ་ཞིག་སྔོན་དུས་ནས་ཡོད་ཀྱང་། སའི་ཐད་ནས་བོད་ཡུལ་སྤྱིའི་ནུབ་མཐར་ཆགས་ཤིང་རྒྱལ་ཁམས་གཞན་དང་ས་མཚམས་འབྲེལ་བའི་རྐྱེན་གྱིས་སྦལ་ཏིའི་དམག་འཁྲུག་དང་། གོར་ཥའི་དམག་འཁྲུག སིང་པའི་དམག་འཁྲུག ཁ་ཆེའི་བཙན་འཛུལ་དམག་འཁྲུག་བཅས་རིམ་པར་བྱུང་བའི་ནང་། གནའ་རབས་ཀྱི་མཁར་རྫོང་དང་། རིག་དངོས། ལོ་རྒྱུས་རྒྱུ་ཆ་བཅས་གྲངས་ལས་འདས་པ་ཞིག་འཕྲོག་བཅོམ་དང་། མེར་བསྲེགས་པ། གཏོར་བཤིག་བཅས་ཉམས་རྒུད་ཚབས་ཆེན་ཕོག་སྟེ་རྩ་སྟོངས་སུ་སོང་བའི་ལྷག་ལུས་ཁ་ཤས་ཤིག་ལས་མེད་པར་གྱུར། དེ་ལྟ་ནའང་། སྤྲོ་འོས་པ་ཞིག་ནི་འཛམ་གླིང་གི་རྒྱལ་ཁབ་གཞན་ནས་འོངས་པའི་ཞིབ་འཇུག་པ་རྣམས་ཀྱིས་གུ་གེའི་སའི་ཆགས་རིམ་དང་། གནམ་གཤིས། རྩི་ཤིང་། སྲོག་ཆགས། གཏེར་ཁ། གནའ་ཤུལ་སོགས་ཕྱོགས་ཡོངས་ནས་ཞིབ་འཇུག་མཛད་པའི་ཚ་རླབས་འཕྱུར་བར་མ་ཟད། གུ་གེའི་རིག་གནས་ཞེས་བོད་ཀྱི་རིག་གནས་ཁྲོད་དུ་རང་མཚན་པ་དང་། རང་སྐྱ་ཐུབ་པ་དང་ཐུན་མོང་མ་ཡིན་པའི་རྒྱུད་མ་ལག་ཅིག་ཚུགས་བཞིན་ཡོད་པ་རེད། དེ་ལ་ཁོ་བོས་ཀྱང་ཞིབ་འཇུག་གི་བྱ་གཞག་འདི་ལ་རྔོ་ཐོགས་ཕྱིར། གུ་གེ་རྒྱལ་རབས་ཚུགས་ཚུལ་དང་། འཕེལ་རྒྱས་བྱུང་ཚུལ། འཇིག་ཚུལ་རྣམས་རང་བློས་ལྕོགས་ཚོད་ཀྱིས་ཅུང་ཟད་སྤྲོ་བར་འདོད་དོ། །