ཁྲིམས་འཛིན་གྱོད་དོན་མྱུལ་ཞིབ་སྐོར་གྱི་སྒྲུང་རིང«མདུད་པ»པར་བསྐྲུན་བྱས་པ།

       ཉེ་སྔོན། མཚོ་སྔོན་ཉེན་རྟོག་དཔོན་སློབ་གླིང་བོད་རྒྱ་སྐད་གཉིས་བཅའ་ཁྲིམས་དང་བདེ་སྐྱོང་དོ་དམ་ཆེད་ལས་ཀྱི་དགེ་རྒན་ཆེན་མོ་གཞོན་པ་བསོད་ནམས་དར་རྒྱས་ལགས་ཀྱིས་བརྩམས་པའི་སྒྲུང་གཏམ་རིང་གྲས«མདུད་པ»ཞེས་པ་མཚོ་སྔོན་མི་རིགས་དཔེ་སྐྲུན་ཁང་གིས་པར་བསྐྲུན་བྱས། སྒྲུང་རིང«མདུད་པ»ཞེས་པ་ནི་ཀྲུང་གོའི་རྩོམ་པ་པོ་མཐུན་ཚོགས་ཀྱིས་གྲངས་ཉུང་མི་རིགས་ཀྱི་རྩོམ་རིག་བརྩམས་ཆོས་གཙོ་བོར་རོགས་སྐྱོར་བྱ་བའི་རྣམ་གྲངས་ཤིག་ཡིན་ཞིང་། བོད་ཡིག་གིས་གསར་རྩོམ་བྱས་པའི་ཁྲིམས་འཛིན་གྱོད་དོན་མྱུལ་ཞིབ་སྐོར་གྱི་སྒྲུང་གཏམ་ཞིག་ཡིན།        ཁྲིམས་བསྟར་ཁྲིམས་འཛིན་གྱི་བྱེད་སྒོ་བྲིས་པ་ཕྱི་རོལ་ཡུལ་གྱི་དོན་དངོས་གཞིར་བཟུང་བ་དང་དངོས་ཡོད་ཀྱི་གནས་ཚུལ་ཇི་བཞིན་འབྲི་བའི་རྩ་དོན་རྒྱུན་འཁྱོངས་བྱས་ཡོད་པས་བདེན་པ་བདེན་ཐུབ་དང་ཚད་མཐུན་ཚད་ལྡན་ཡིན་ལ། ཁྲིམས་ལྟར་བཅོས་སྐྱོང་དང་ཁྲིམས་བསྟར་དྲང་གཞག ཞི་དྲག་གཉིས་མཁས་དང་དམངས་ལ་ཞབས་ཞུ་བྱ་བའི་རུ་ཆེན་དཔོན་བསམ་འགྲུབ་ལྟ་བུ་མི་མང་གི་བློ་གཏོད་ས་དང་ཁ་ཉན་སར་གྱུར་ཡོད་པའི་ཁྲིམས་བསྟར་ཁྲིམས་འཛིན་མི་སྣའི་སྣང་བརྙན་བཞེངས་སྐྲུན་བྱས་པ་བརྒྱུད། ཁོ་ཚོས་ཉེ་རིང་ཆགས་སྡང་བྲལ་ཞིང་དཀའ་བ་ཁྱད་དུ་བསད་དེ་སྤྱི་ཚོགས་བདེ་སྐྱོང་ལམ་ལུགས་སྲུང་འཛིན་གྱིས་མི་དམངས་ཀྱི་རྒྱུ་ནོར་ཚེ་སྲོག་ལ་སྲུང་སྐྱོབ་བྱ་བ། ལེགས་སྤེལ་ཉེས་འགོག་གིས་ཕྱོགས་གཅིག་གི་བདེ་འཇགས་ཁག་ཐེག་བྱ་བའི་བསམ་སྦྱོར་བླ་མེད་ལ་རྗེས་སུ་ཡི་རང་བྱ་བ་དང་། བོད་ཁུལ་གྱི་ཁྲིམས་སྐྱོང་སྤྱི་ཚོགས་འཛུགས་སྐྲུན་ལ་འབད་འབད་དུང་དུང་བྱ་བ་དང་། ལས་འགན་དམ་སྲུང་དང་བློ་བརྟན་འགྱུར་མེད་ཀྱི་ལས་རིགས་སྤྱོད་ལམ་བཟང་པོར་བསྟོད་བསྔགས་བྱས་ཡོད།
      བརྩམས་ཆོས་ལ་ཡུལ་ཁམས་ཀྱི་ཁྱད་ཆོས་དང་ལས་རིགས་ཀྱི་ཁྱད་ཆོས་མངོན་པར་དོད། བརྗོད་དོན་མངོན་པར་གསལ་བ་དང་ནང་དོན་དཔེ་གསར་ཆེ་བ། རྣམ་པ་གསོན་ཉམས་དོད་པ་དང་མཚོན་ཐབས་སྣ་མང་གཅིག་འདུས་བཅས་ཀྱི་ཁྱད་ཆོས་དུ་མའི་སྒོ་ནས་རང་རྒྱལ་གྱི་ཉེས་དོན་གྱོད་གཞི་ལས་སྒྲུབ་ཀྱི་བྱ་རིམ་མགོ་མཇུག་གསལ་བོར་བསྟན་ཏེ་ཁྲིམས་ལ་རྨོངས་པ་ཚོར་ཁྲིམས་ལུགས་སློབ་གསོ་ཉན་སྐུལ་གྱི་ལག་ཆ་གོ་ནུས་ཅན་ཞིག་ཏུ་སྦྱར་ཡོད། གྱོད་དོན་མྱུལ་ཞིབ་རྩད་གཅོད་བྱ་བ་དང་དོགས་ཡོད་ཉེས་ཅན་ཁྲིམས་ལ་སྦྱོར་བ། ཁྲིམས་རའི་བཤེར་སྦྱང་གི་གནས་ཚུལ་བྲིས་པ་སོགས་ནང་དོན་གཟབ་བརྟན་ཆེ་ཞིང་ཞིབ་ཚགས་ལྡན་ལ། རྗོད་བྱེད་ཚིག་གི་སྦྱོར་བ་ལེགས་ཤིང་སྨྲར་དག་པ་དང་མཚམས་མཚམས་སུ་དཔེ་ཆོས་ལེགས་བཤད་འོས་འཚམ་སྦྱར་ནས་ཀློག་བདེ་ཞིང་སྤྲོ་བ་འཕེལ་བར་བྱས་ཡོད། རྩོམ་སྟངས་ཐད་སྒྲུང་གཏམ་རྩོམ་རིག་གི་དུས་ཀྱི་སྔ་ཕྱི་རིམ་པར་བརྗོད་པ་གཙོར་བྱས་སྐབས་ལ་ལར་གོ་རིམ་ལྡོག་སྟེ་བརྗོད་པ་དང་བར་བཅུག་གི་བརྗོད་པའི་ཐབས་གང་དགར་སྤྱད་ཅིང་། དོན་གྱི་བྱུང་རིམ་སྔ་ཕྱི་འབྲེལ་ཆགས་པ་དང་དོན་སྣ་མང་ཡང་ཁ་མ་འཐོར་བ་དང་འཕྲོས་རྒྱ་ཆེ་ཡང་གྲིམ་མ་ལྷོད་པར་རྒྱས་བསྡུས་འཚམ་པོ་ཡིན། སྒྱུ་རྩལ་མཚོན་ཐབས་ཐད་ཞིབ་བརྗོད་དང་གསལ་བཤད། ཕྱིར་དྲན་དང་བསྡུས་བརྗོད་ཀྱི་མཚོན་ཐབས་སོགས་གང་འཚམ་དུ་སྤྱད་ནས་བོད་ཁུལ་གྱི་གྱོད་དོན་ཞིབ་གཅོད་ཀྱི་གཏམ་རྒྱུད་རང་རྒྱལ་གྱི་ཉེས་དོན་བཅའ་ཁྲིམས་ཀྱི་ནང་དོན་དང་ཁྲིམས་བསྟར་ཁྲིམས་འཛིན་གྱི་སྒྲིག་སྲོལ་ལ་སྦྱར་ནས་བརྗོད་ཡོད་པས། ཀློག་མཁན་ལ་གཏམ་རྒྱུད་ལ་ཉན་པའི་ཁྲོད་དུ་ཁྲིམས་ལུགས་སློབ་སྦྱོང་བྱེད་ཐུབ་པ་དང་གྱོད་དཔེ་དབྱེ་ཞིབ་ལ་བརྟེན་ནས་གོ་བ་གཏིང་ཟབ་ཏུ་ལེན་ཐུབ་པ། གནས་ལུགས་ཞིབ་བརྗོད་ལ་བརྟེན་ནས་གོ་སྐོན་བློ་འགུག་ཐུབ་པ། ཁྲིམས་འཛིན་ལག་ལེན་གྱི་བྱེད་སྒོར་བྱེད་ལུགས་བྱེད་ཐབས་སྟོན་ཐུབ་པའི་ཁྱད་ཆོས་དུ་མ་འཛོམས་པ་ན་རང་བཞིན་དུ་བཅའ་ཁྲིམས་དྲིལ་བསྒྲགས་དང་སློབ་གསོའི་དམིགས་ཡུལ་འགྲུབ་པར་འགྱུར། དེ་དང་ཆབས་ཅིག་མི་རྣམས་ལ་སྤྱི་བའི་སྲོལ་ལུགས་བཟང་པོར་ཕྱོགས་ཏེ་མ་རབས་ལས་ལ་དགག་བཞག་སུན་འབྱིན་བྱ་བ་དང་། དུས་ཀུན་དུ་ཚུལ་བཞིན་སྤྱོད་པའི་བདེ་འཇགས་ལ་གནས་ཏེ་སྤྱོད་བཟང་དར་སྤེལ་གཏོང་བའི་སྤྱི་ཁྱབ་ཀྱི་རིན་ཐང་ལྟ་གྲུབ་མགོ་མཇུག་ཡོངས་སུ་ཁྱབ་པར་བྱས་ཡོད།
       དེང་སྐབས“བརྒྱད་ལྔའི”བཅའ་ཁྲིམས་ཁྱབ་སྤེལ་གྱི་གནད་འགག་གི་དུས་སུ་འཁེལ་ཡོད་ཅིང་། སྤྱི་ཚོགས་མི་སྡེ་ཡོངས་ནས་ཁྲིམས་སྐྱོང་སློབ་གསོའི་བྱ་གཞག་གོང་སྤེལ་ལ་བརྩོན་བཞིན་མཆིས། སྒྲུང་གཏམ་འདི་དུས་རབས་གསར་པའི་བོད་ཁུལ་གྱི་ཁྲིམས་སྐྱོང་སྤྱི་ཚོགས་འཛུགས་སྐྲུན་གྱི་དགོས་མཁོར་རྐང་ཚུགས་ཤིང་དམངས་འཚོའི་དོན་དངོས་གནས་ཚུལ་གཞིར་བྱས་ནས་བྲིས་པ་ཡིན་པས་གསར་རྩོམ་གྱི་དམིགས་ཡུལ་དང་བརྗོད་བྱའི་དོན་སྙིང་། སྙེག་པའི་རིན་ཐང་དང་ཐེར་བཏོན་པའི་གནད་དོན་སོགས་ཀྱང་དེང་གི་བོད་ཁུལ་གྱི་ཁྲིམས་སྐྱོང་སྤྱི་ཚོགས་འཛུགས་སྐྲུན་གྱི་གནས་བབ་དང་དངོས་ཡོད་དགོས་མཁོར་མཐུན་པོ་ཡིན། དུས་སྐབས་གསར་བའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་དགོངས་བཟང་བརྒྱུད་སྒྲོག་བྱ་བ་དང་འཆམ་མཐུན་ཁྲིམས་སྐྱོང་སྤྱི་ཚོགས་འཛུགས་སྐྲུན་བྱ་བའི་ཡར་ཐོན་ཡར་རྒྱས་ལ་སྐུལ་འདེད་གཏོང་བ་དང་ཆབས་ཅིག མང་སེམས་གཅིག་མཐུན་སྒོས་སྲོལ་བཟང་དར་ཁྱབ་གཏོང་བའི་ཁྲིམས་སྐྱོང་གི་ཁམས་ལེགས་པོ་བསྐྲུན་པ་དང་བགྲོད་ལམ་གསར་བར་ཧུར་གྱིས་བསྐྱོད་དེ་དུས་རབས་གསར་བར་བྱས་རྗེས་འཇོག་པའི་རྒྱུ་བཟང་འདུ་བར་བྱས་ཡོད་ཕྱིར། བཅའ་ཁྲིམས་ཁྱབ་སྤེལ་སློབ་གསོ་དང་ཁྲིམས་ལྟར་བཅོས་སྐྱོང་ཕན་ཚུན་མཐུན་སྦྱོར་ཐད་གོ་ནུས་མི་དམན་པ་ཞིག་ཡོད། དེབ་འདི་བདེ་ལེགས་ངང་པར་སྐྲུན་འགྲེམ་སྤེལ་བྱས་པ་ནི“བརྒྱད་ལྔའི”བཅའ་ཁྲིམས་ཁྱབ་སྤེལ་བྱ་གཞག་ལ་ཕུལ་བའི་ལེགས་སྐྱེས་ཤིག་དང་ཁྲིམས་སྐྱོང་སློབ་གསོ་ཉམས་ལེན་གྱི་གྲུབ་འབྲས་གསར་བ་ཞིག་ཡིན་ཏེ། བོད་ཁུལ་གྱི་བཅའ་ཁྲིམས་ཁྱབ་སྤེལ་བྱ་གཞག་ལ་གསོན་ཤུགས་གསར་བ་སྣོན་པ་དང་གཟི་འོད་འབར་བའི་རྒྱུ་བཟང་དུ་འཛིན་རིགས་པར་མ་ཟད། བོད་ཀྱི་རྩོམ་རིག་གསར་རྩོམ་གྱི་ལམ་བུ་རྒྱ་བསྐྱེད་པའི་འཚོལ་ཞིབ་གསར་བ་དང་ཉམས་ལེན་གྱི་གྲུབ་འབྲས་གསར་བ་ཞིག་ཡིན་ལ། བློ་ལྡན་ཡིད་ཀྱི་དང་བ་འདྲེན་པའི་རྩོམ་རིག་གི་ལོངས་སྤྱོད་གསར་བ་དང་དུས་ཀྱི་སོན་བཟང་སྐྱོང་བའི་ངག་རིག་སྒྱུ་རྩལ་གྱི་ཉམས་སྣང་གསར་བ་ཞིག་ཀྱང་ཡིན། །