སྙན་དེབ«གོས་ཆེན་འབྲུག་མ»པར་དུ་བསྐྲུན་པ།

---

       ཉིས་སྟོང་བཅུ་གསུམ་ལོའི་དབྱར་དུས་ཤིག་ལ་ང་རྡོ་གཅལ་ར་བ་ཞིག་ཏུ་བསྡད་ནས་བསམ་བློ་བཏང་བཏང་བའི་མཐར་རང་ལ་རྣམ་པར་རྟོག་པའི་མེ་སོན་ཆུང་ཆུང་ཞིག་རྙེད། དེ་ནི་དུས་ཚོད་ཚད་གཞིར་བཅད་དེ་རྩོམ་འབྲིའི་བྱ་བར་ཞུགས་རྒྱུ་དེའོ། །
       དེ་ལྟར་ངས་སྐབས་རེར་བདུན་ཕྲག་རེར་རྩོམ་དུ་བྱར་རུང་མིན་ཇི་ལྟར་ནའང་ཁ་བྱང་གང་བྱུང་དུ་བཏགས་ཏེ་ཡི་གེའི་ཕུང་པོ་སྣ་ཚོགས་བསྐྲུན་ནས་དེ་དག་ཕྱོགས་གཅིག་ཏུ་སྤུངས་ཏེ་དེབ་གཟུགས་ཤིག་བྱས། ད་ལྟ་དེབ་གཟུགས་དེའི་ཁ་བྱང་སྨྲ་དགོས་ནའང་ཞེ་འཚེར་བ་ཞིག་རེད།
       དེ་ནས་ཉིས་སྟོང་བཅོ་ལྔ་ལོར་བསླར་ཡང་རང་གིས་བྱུང་རྒྱལ་དུ་བྲིས་བྲིས་པའི་ཡིག་འབྲུའི་ཕུང་པོ་དག་ཕྱོགས་གཅིག་ཏུ་བཏུས་ནས«གཤིས་ཀྱི་དབྱངས་རྟ»ཞེས་པའི་དེབ་གཟུགས་ཤིག་བཏོན། དེའང་ད་ལྟར་བལྟས་ན་མིག་ཚེགས་པ་ཞིག་སྟེ། དེ་དུས་རང་ལ་ཡི་གེའི་ཐོབ་ཐང་ཙམ་ཡང་མི་ཤེས་བཞིན་ཧམ་པ་གཡག་རོ་འདྲ་བ་དེ་འདྲ་ཇི་ལྟར་བྱུང་བ་ཡིན་ནམ་སྙམ།
       འདི་ལོ་ནི་ཉིས་སྟོང་ཉེར་གསུམ་སྟེ། ངའི་ཐོག་མའི་ཡི་གེ་འབྲི་བའི་ལས་སུ་ཞུགས་པ་ནས་ད་བར་ལོ་ཡི་འཁོར་མོ་བཅུ་ཏག་ཏག་ཟིན། ཡང་རྒྱུ་རྐྱེན་རྟེན་འབྲེལ་གང་ཞིག་གིས་ངའི་ཡིག་འབྲུའི་ཕོན་པོ་འགའ་ཞིག་བཏུས་ནས«གོས་ཆེན་འབྲུག་མ»ཞེས་པའི་དེབ་ཆུང་གཅིག་སྒོར་འབུད་རྒྱུ་ཁེལ། འདིའང་ཡང་སྙིང་ཅི་ཞིག་ཡིན་ནམ།        མི་ཞིག་གིས་གཞན་གྱིས་འབོད་སྐུལ་ཅི་ཡང་མེད་པར་བྱ་བ་ཞིག་ལོ་ངོ་བཅུ་ཙམ་ལ་རྒྱུན་བསྐྱངས་ན། དེས་གྲུབ་འབྲས་ཆེན་པོ་ཞིག་ལེན་ངེས་ཟེར་ནས་ཕ་རོལ་པོས་བདེན་པའི་མགོ་བོ་ལྕོག་ལྕོག་བྱ་སྲིད་ཀྱང་། དང་ནས་གཤོག་རྩལ་མེད་པའི་བྱིའུ་ཆུང་ཞིག་ཇི་ཙམ་འཕུར་ཡང་རང་ཉིད་འཁོར་སའི་ནགས་ཚལ་ཆུང་ཆུང་དེ་ལས་བརྒལ་མི་ཐུབ་པ་འདྲ།        སྤྱིར་ང་རང་ཉིད་ལའང་འགྱུར་བ་ཅུང་རེ་འགྲོ་གི་ཡོད་པ་འདྲ་སྟེ། ཕ་རོལ་པོ་ལ་ལའི་ངག་ལྟར་བྱས་ན། གོ་རྒྱུ་ཡོད་པ་ནས་མེད་པའི་ཕྱོགས་སུ་སོང་བ་དང་། རིན་ཐང་ཡོད་པ་ནས་མེད་པའི་ངོ་བོར་ཕྱིན་པ། གནས་ལུགས་ཡོད་པ་ནས་གང་བྱུང་སྨྱོ་ལབ་ཀྱི་ཕྱོགས་སུ་ལྷུངས་པའོ། །འོན་ཏེ་རྒྱུ་རྐྱེན་འདི་ཡིན་ཟེར་བ་བཤད་དུ་མེད་ཀྱང་ངས་ནི་སྙན་ངག་ཅེས་པ་དེ་ཤེས་བྱ་སྐམ་པོ་ཅི་ཞིག་ལ་སྡོམ་རྒྱག་པ་དང་། ཚོགས་སྡེ་བྱེ་བྲག་པ་གང་ཞིག་ལ་བསླབ་བྱ་བྱེད་པ། ཡང་ན་སྤྱི་སྒེར་གང་ཞིག་ལ་དགྲ་ལྷ་དཔང་བསྟོད་བྱེད་པའམ་ཁྲོམ་ཆེན་ཟིལ་གྱིས་གནོན་པའི་དབྱངས་རྟ་དེ་འདྲ་རང་ཨེ་ཡིན་སྙམ་པ་བྱུང་།        ཡང་བསྐྱར་རང་ཉིད་ལ་འདང་ཞིག་བརྒྱབ་ན། བྱིས་པ་སྣབས་ལུག་ཅིག་ལམ་དུ་ཆས་པ་དང་དབྱངས་གསལ་སོ་བཞིའི་དབྱངས་རྟ་སྙན་མོ་ཞིག་ངག་ཏུ་ལེན་ཤེས་པར་གྱུར། རིམ་བཞིན་ང་རང་རྩེད་ཆས་ལྟ་བུའི་ཡིག་འབྲུ་དེ་དག་དང་ལྷན་དུ་དགོད་ཞོར་ངུ་ཞོར་བྱས་ནས་ནར་སོན་པས། སྐབས་ཤིག་ནས་ངས་ཡིག་འབྲུ་དེ་དག་ནི་རྩེད་ཆས་ཙམ་མིན་པར་རང་གི་ཕ་མེས་ཡང་མེས་ཚོའི་སྐྱིད་སྡུག་གི་བྱུང་བ་དང་། བསམ་པའི་དཔལ་ཡོན། ལྟ་སྤྱོད་ཀྱི་ཉིང་ཁུ་མཐའ་དག་དེ་རུ་བཅུག་ཡོད་པ་ཤེས་པས། ད་ལྟ་རང་ཉིད་ལམ་གོལ་དུ་མ་ཕྱིན་པའི་ང་རྒྱལ་དང་གདེང་ཚོད་ཅིག་ཡོད་སྣང་སྟེར། དེ་ནི་ཨ་ཕ་ལགས་ཀྱིས་ང་རང་རྟ་ཐོག་ཏུ་བསྐྱོན་ནས་སློབ་གླིང་དུ་བསྐྱལ་བའི་བཀའ་དྲིན་ཡིན།
       ཐོས་བསམ་ནི་དཔྲལ་བ་ལ་ཞག་ཚིལ་ཅུང་ཟད་རེ་མེད་ན་སུ་ཡིན་ཡིན་གྱིས་སྡུག་བསྲན་ཐུབ་པ་དེ་འདྲའང་ཡིན་བཟོ་མི་འདུག་པས། དེ་ལ་དགོས་ངེས་ཀྱི་ཁ་སེམས་དགེ་བས་རྒྱབ་སྐྱོར་བྱེད་མཁན་དང་ལྷག་བསམ་དག་པས་ལམ་སྣ་ཁྲིད་མཁན་རེའང་ངེས་པར་ཡོད་དགོས་འདུག་པས། བདག་ལ་མཚོན་ན་དྲིན་ཆེན་ཨ་མ་ལགས་དང་ཕུ་ནུ་མིང་སྲིང་དག་ནི་རྒྱབ་ནས་སྐྱོར་མཁན་དང་དགེ་བའི་བཤེས་གཉེན་དག་ནི་མདུན་ནས་བསུ་མཁན་ཞིག་ཡིན་པས། འདིར་དྲན་པ་ཉེ་བར་བཞག་སྟེ་ཁོང་ཅག་ལའང་སྙིང་ཐག་པ་ནས་བཀའ་དྲིན་ཞུ་སྙིང་འདོད།
       དེ་བས། རྒྱ་ལ་ངའི་སྒོ་གསུམ་ལྗང་བུའི་རྩེ་མོར་ཡོན་ཏན་གྱི་ཆ་རེ་ཡོད་ན་གང་ཞིག་ནས་འགོས་ཡོང་བ་དང་གཞན་ཞིག་གིས་བྱུགས་བཞག་པ་ལས་ང་རང་ནི་ལག་པ་སྟོང་བར་འཇིག་རྟེན་འདིར་འཁྱམས་ཡོང་བ་ཡིན་པས་ང་རྒྱལ་འོས་པའི་དངོས་པོ་གང་ཡང་འཁྱེར་རྒྱུ་མ་བྱུང་ལ། ལྷག་ཏུ་ད་ལྟའི་བཤད་སྲོལ་ལྟར་ན“ཕ་མ་ནི་མིའི་རིགས་ཀྱི་དགེ་རྒན་ཐོག་མ་དང་། ཁྱིམ་ཚང་ནི་མིའི་རིགས་ཀྱི་སློབ་གླིང་ཐོག་མ”རུ་ཟེར་ཆོག་པར་འདུག་ན། ངའི་ཡོད་ཚད་ནས་ཡོད་ཚད་ཀྱང་དྲིན་ཕ་མ་ཟུང་གིས་བདག་རྐྱེན་ཡིན་འདུག་པས། ད་ཐེངས་གུས་པའི་དེབ་ཆུང«གོས་ཆེན་འབྲུག་མ»ཡང་དྲིན་ཆེན་ཕ་མ་ཟུང་ལ་ལེགས་སྐྱེས་ཤིག་ཏུ་བགྲང་ཆོག་པ་འདྲ།
       གཞན་གུས་པའི་དེབ་ཆུང་ཧྲིལ་པོའི་ལྕི་ཡང་དང་དགེ་སྐྱོན་སོགས་ནི་གྲོགས་མཚན་འབར་ལགས་ཀྱིས་སྔོན་ཞིག་ནས་ཞིབ་མོ་རྣམ་འཐག་གིས་བཀྲལ་ཟིན་པ་དེབ་འདིའི་དབུ་ཁྱུད་ཀྱི་དོད་དུ་བཀོད་ཡོད་པས། འདིར་རང་གིས་རང་ལ་འདི་དང་གན་ཞེས་མཛུབ་མོ་འཛུགས་འཆར་མེད་ལ། དེ་བས་ད་ར་ཕོར་བ་གང་ལ་བཤད་པ་མདའ་རྒྱང་ཙམ་བྱེད་པར་སྤོབས་པ་དང་ཡི་གས་ཀྱང་མི་ཆུན་པར་གདའོ། །

---