«དགེ་བཤེས་ཤེས་རབ་རྒྱ་མཚོའི་བསམ་བློ་དང་གསུང་རྩོམ་ཞིབ་འཇུག»

       གཞུང་ལུགས་རབ་འབྱམས་རྒྱ་མཚོའི་མངའ་བདག །ལྔ་རིག་སྨྲ་བའི་མ་ཧཱ་པཎྜི་ཏ། རྒྱལ་གཅེས་ཆོས་གཅེས་ཀྱི་སྐྱེས་ཆེན་དམ་པ། མཁྱེན་རབ་ཀྱི་འོད་སྣང་ཕྱོགས་སུ་རྒྱས་པའི་རྣམ་དཔྱོད་ཅན། ཀུན་གྱིས་གུས་ཤིང་བཀུར་བར་འོས་པ་རྗེ་བཙུན་ཤེས་རབ་རྒྱ་མཚོ་འཇམ་དཔལ་དགྱེས་པའི་བློ་གྲོས་དཔལ་བཟང་པོ་མཆོག་ནི། ཀྲུང་གོའི་ཉེ་དེང་གི་བོད་བརྒྱུད་ནང་བསྟན་ཆོས་ལུགས་པའི་བསྟན་འཛིན་ཁྲོད་ཀྱི་སྐད་གྲགས་ཆེས་ཆེ་བའི་མཁས་པའི་དབང་པོ་དང་། ཀྲུང་གོའི་ནང་བསྟན་ལས་རིགས་ཁྲོད་ཀྱི་ཕུལ་དུ་བྱུང་བའི་མགོ་ཁྲིད་པ། ཆེས་ཁྱད་པར་དུ་འཕགས་པའི་བོད་རྒྱ་རིག་གནས་བརྗེ་རེས་པ། རླབས་ཆེན་གྱི་རྒྱལ་གཅེས་རིང་ལུགས་པ་བཅས་ཡིན། དགེ་བའི་བཤེས་གཉེན་ཆེན་པོ་གང་ཉིད་རབ་བྱུང་བཅོ་ལྔ་པའི་ཤིང་སྤྲེལ(1884)ལོར་མཚོ་སྔོན་ཞིང་ཆེན་ཞུན་ཧྭ་རྫོང་རྡོ་སྦིས་ཧོར་གྲོལ་བར་སྐུ་ཡི་མཚན་དཔེའི་མེ་ཏོག་མངོན་པར་བཞད། སྐུ་ན་ཆུང་ངུའི་དུས་ནས་སངས་རྒྱས་ཀྱི་བསྟན་པ་རིན་པོ་ཆེའི་སྒོར་ཞུགས་ཏེ་རབ་ཏུ་བྱུང་ཞིང་། སྔ་གཞུག་ཏུ་རྡོ་སྦིས་གྲྭ་ཚང་དགེ་ལྡན་འཕེལ་རྒྱས་གླིང་དང་། ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ། དབུས་ཀྱི་ཆོས་སྡེ་ཆེན་པོ་དཔལ་ལྡན་འབྲས་སྤུངས་སྒོ་མང་གྲྭ་ཚང་སོགས་སུ་བཅུ་ཕྲག་རིག་པའི་གནས་མཐའ་དག་དང་། ལྷག་པར་བཀའ་པོད་རྣམ་ལྔས་གཙོས་པའི་མདོ་སྔགས་གཞུང་ལུགས་རབ་འབྱམས་ལ་གསན་བསམ་སྒོམ་པ་མཐར་ཕྱིན་མཛད་ནས་མཁས་བཙུན་བཟང་གསུམ་དང་། འཆད་རྩོད་རྩོམ་གསུམ་གྱི་ཡོན་ཏན་ལ་མངའ་བརྙེས་ཤིང་། ཕྱོགས་ཐམས་ཅད་ནས་འགྲན་པའི་ཟླ་དང་བྲལ་བའི་མཁས་པའི་གོ་འཕང་མཐོན་པོར་གཤེགས། དགུང་གྲངས་སོ་གསུམ་པ་སྟེ1916ལོར་དམིགས་བསལ་གྱི་ལྷ་རམས་པ་འཕར་མ་དང་། ནོར་བུ་གླིང་གའི་རྩོད་རྒྱུགས་ཆེན་མོའི་སྐབས་སུ་ལྷ་རམས་ཨང་དང་པོའི་མཚན་གནས་བཞེས་ཤིང་།  གསུང་ལས་སྐྱེས་པའི་སློབ་བུ་ཡང་། ཡོངས་འཛིན་ཁྲི་བྱང་རིན་པོ་ཆེ་དང་། སྒོ་མང་མཁན་རིན་པོ་ཆེ་ཆོས་འཕེལ་རྒྱལ་པོ། ལྷ་རམས་པ་སྐལ་བཟང་རྒྱ་མཚོ། མཁས་དབང་དགེ་འདུན་ཆོས་འཕེལ། ཤར་གདོང་བློ་བཟང་བཤད་སྒྲུབ་རྒྱ་མཚོ། ང་ཕོད་ངག་དབང་འཇིགས་མེད། ཧོར་ཁང་བསོད་ནམས་དཔལ་འབར། ལོ་ཙཱ་བ་བློ་བཟང་ཆོས་འཕགས། ཀྲོའོ་ཕུའུ་ཁྲུའུ་སོགས་མཁས་པའི་དབང་པོ་མང་དུ་ཡོད། བཅིངས་འགྲོལ་སྔོན་ལ། རྒྱལ་བཙུགས་ཀྲུང་དབྱང་སློབ་གྲྭ་ཆེན་མོ་དང་། པེ་ཅིན་སློབ་གྲྭ་ཆེན་མོ། ཆིན་ཧྭ་སློབ་གྲྭ་ཆེན་མོ། ཝུའུ་ཧན་སློབ་གྲྭ་ཆེན་མོ། ཀྲུང་ཧྲན་སློབ་གྲྭ་ཆེན་མོ་བཅས་སློབ་ཆེན་ལྔ་ཡི་བོད་ཀྱི་རིག་གཞུང་སྟོན་པ་པོ་ཞེས་པའི་སློབ་དཔོན་ཆེན་མོ་དང་། རྒྱལ་ཡོངས་ཚན་ཀྲིན་ཚོགས་པའི་ཚན་ཀྲིན་ཡཱོན། རྒྱལ་བསྟན་རོགས་མགོན་སྒྲོལ་སྟོན་བསམ་གཏན་གྱི་སློབ་དཔོན་ཞེས་པ་སོགས་ཀྱི་མཚན་གྱི་ཅོད་པན་ཡང་གང་མང་ཞིག་བདག་གིར་བཞེས། ཀྲུང་གོ་གསར་པ་དབུ་བརྙེས་རྗེས། སྔ་གཞུག་ཏུ་མཚོ་སྔོན་ཞིང་ཆེན་མི་དམངས་སྲིད་གཞུང་གི་ཀྲུའུ་ཞི་གཞོན་པ་དང་། རིག་སློབ་ཨུ་ཡོན་ལྷན་ཁང་གི་ཀྲུའུ་རིན། ནུབ་བྱང་དམག་སྲིད་ཨུ་ཡོན་ལྷན་ཁང་གི་ཨུ་ཡོན། ནུབ་བྱང་མི་རིགས་ལས་དོན་ཨུ་ཡོན་ལྷན་ཁང་གི་ཀྲུའུ་རིན་གཞོན་པ། རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་དང་པོ་དང་གཉིས་པའི་འཐུས་མི། རྒྱལ་ཡོངས་སྲིད་གྲོས་སྐབས་གཉིས་པ་དང་གསུམ་པའི་རྒྱུན་ལས་ཨུ་ཡོན། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ། ཀྲུང་གོ་ནང་བསྟན་སློབ་གླིང་གི་གླིང་གཙོ་སོགས་ཀྱི་འགན་བཞེས། ཁོང་གི་སྐུ་ཚེ་གང་བོར་རྒྱལ་ནང་དུ་རྒྱལ་ཁབ་དང་མི་རིགས་ཀྱི་ལས་དོན་གང་མང་མཛད་པར་མ་ཟད། རྒྱལ་ཁབ་གཞན་དག་གི་མི་དམངས་དང་ནང་བསྟན་པའི་བར་གྱི་མཛའ་མཐུན་གྱི་ལས་དོན་ལའང་བྱས་རྗེས་མི་ཉུང་བ་ཞིག་བཞག་ཅིང་། བོད་ཀྱི་རིག་གནས་དང་སློབ་གསོའི་ལས་དོན་འཕེལ་རྒྱས་ཐད་ལ་ནུས་ཤུགས་ཡོད་རྒུ་བཏོན་པ་དང་། གཞུང་ཆེན་དུ་མ་ཞུ་དག་དང་རྒྱ་བོད་ཡིག་བསྒྱུར་བཅས་ཀྱི་ཐད་ལ་ཡང་མཛད་རྗེས་བླ་ན་མེད་པ་བཞག །དེ་བས་གཙོ་འཛིན་མའོ་ཙེ་ཏུང་དང་། ཀྲོའུ་ཏེ། ཀྲོའུ་ཨེན་ལེ་བཅས་ཀྱིས་“བོད་རིགས་མཁས་དབང་།” “རྒྱལ་གཅེས་བགྲེས་པོ་”ཞེས་བསྟོད་བསྔགས་མཛད་པ་མ་ཟད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཤེས་རབ་རྒྱ་མཚོ་ནི་བོད་བརྒྱུད་ནང་བསྟན་ལས་རིགས་ཁྲོད་ཀྱི་རྒྱལ་གཅེས་ཆོས་གཅེས་ཀྱི་འཐུས་ཚབ་མི་སྣ་ཡིན་ཞེས་བསྔགས་བརྗོད་མཛད།        བློ་གྲོས་དང་རྣམ་དཔྱོད་མུ་མཐའ་མེད་པའི་བདག་ཉིད་ཆེན་པོ་ཁོང་དང་ཁོང་གི་གསུང་རྩོམ་རྣམས་བརྗོད་བྱ་རྒྱ་ཆེ་ཞིང་གཏིང་ཟབ་པ། དུས་སྐབས་དེའི་ལོ་རྒྱུས་ཡིག་ཐོག་ཏུ་ཕབ་པ་ཉུང་བ། ལྷག་པར་ནང་རིག་པའི་བསྟན་བཅོས་དང་སྙན་ངག་གི་བསྟན་བཅོས་རྣམས་གོ་དཀའ་ཞིང་། རང་ངོས་ནས་ཀྱང་སྐྱེས་སྦྱངས་ཀྱི་ཡོན་ཏན་དམན་པ་དང་དུས་ཚོད་ཀྱི་ཁོམ་སྐབས་མེད་པ་སོགས་ཀྱི་དབང་གིས་རགས་པ་ལས་ཀྱང་ཆེས་རགས་པ་ཙམ་དུ་དཔྱད་བརྗོད་བྱས་པ་མ་གཏོགས། ཁོང་གི་གསུང་རྩོམ་གྱི་དངོས་ཤུགས་བརྒྱུད་གསུམ་གྱི་དོན་དང་དུས་སྐབས་དེའི་ལོ་རྒྱུས་རྣམས་ཞིབ་མོ་ཞིག་འགོད་མ་ནུས་ན་ཡང་། དགེ་བའི་བཤེས་གཉེན་ཁོང་དང་ཁོང་གི་གསུང་རྩོམ་ལ་ཞིབ་འཇུག་བྱེད་པའི་ས་བོན་ལྟ་བུ་ཞིག་འབྲི་ཁུལ་བགྱིས་པ་ཡིན་ནོ། །ཡིན་ན་ཡང་། ཁོ་བོ་ནི་སྲོལ་རྒྱུན་རིག་གནས་ལ་སྦྱངས་པ་ཕྱོགས་ཀུན་ནས་དམན་པས་མ་རྟོགས་པ་དང་། ལོག་པར་རྟོག་པ་དང་། ཕྱོགས་ཙམ་རྟོགས་པ་ལས་བྱུང་བའི་འགལ་འཁྲུལ་ཅི་མཆིས་དག་ཀློག་པ་པོ་རྣམས་ཀྱི་སྤྱན་སྔར་བཟོད་པར་གསོལ་བ་དང་། གལ་ཏེ་ལེགས་པའི་ཆ་ཆུ་ཐིགས་ཙམ་ཞིག་མཆིས་ན་རྗེ་ཉིད་ཀྱི་མཛད་པ་འཕྲིན་ལས་ཀྱི་སྲི་ཞུ་ཙམ་གྱི་རྒྱུ་རུ་འགྱུར་བར་སྨོན་པ་དང་བཅས་ཏེ།
       འདིར་སྨྲས་པ།                               ཅེས2023ལོའི་ཟླ5པའི་ཚེས4ཉིན་ལ་མཚོ་སྔོན་དགེ་འོས་སློབ་ཆེན་གྱི་དགེ་རྒན་ཆེན་མོའི་མིང་ཙམ་འཛིན་པ་གྱི་ན་བ་སུམ་བྷ་རིན་ཆེན་བཀྲ་ཤིས་ཀྱིས་སྦྱར་བ་དགེའོ། །