དེབ་གསར«བོད་ཀྱི་སྙན་ངག་གསར་བ་བདམས་དཔྱད»

       ཕྱི་ཡོང་རྩོམ་རིག་གིས་བོད་ཀྱི་རྩོམ་རིག་གི་ཁ་ཚ་དགོས་གཏུགས་སུ་གྱུར་པའི་དགོས་མཁོ་བསྐངས་སྟབས། བོད་ཀྱི་རྩོམ་རིག་དེའང་རྒྱུ་རྐྱེན་རྟེན་འབྲེལ་དུ་མའི་དབང་གིས་དུས་དང་བསྟུན་ནས་འཕོ་འགྱུར་ཆེན་པོ་བྱུང་ཞིང་། དུས་མཉམ་དུ་ཕྱི་ཡོང་རྩོམ་རིག་དང་ལེན་དང་བཀག་འགོག་གཉིས་བར་གྱི་འགལ་འདུའི་ཁྲོད། རིམ་གྱིས་འཕལ་ཀ་འཕྲོད་ནས་དེང་གི་གུ་དོག་པའི་ཁྱབ་ཁོངས་འདི་རུ་སྲོལ་རྒྱུན་གཞན་ཞིག་ཏུ་གྱུར་པར་སྣང་། སྐབས་དེར་འཕལ་ཀ་འཕྲོད་པ་ནི་རྩོམ་རིག་ཁོ་ན་མིན་ལ། དེར་འབྲེལ་གྱི་སྤྱི་ཚོགས་དང་རིག་གནས། དཔལ་འབྱོར་སོགས་ཕྱོགས་གཞན་ཡང་མ་བསྡུས་རང་འདུ་རུ་མངོན། ལོ་རྒྱུས་ཀྱི་རྒྱུན་རིང་བའི་བོད་ཀྱི་རྩོམ་རིག་དང་གདོང་ཐུག་དུས། དེར་སྡུད་ལེན་གྱི་ནུས་པ་བླ་ལྷག་ལྡན་པའི་རྩོམ་རིག་གི་སྲོལ་རྒྱུན་ལྡན་ཞིང་། ཕྱི་ནས་ཡོང་བ་གང་དེར་གསར་གཏོད་ཀྱི་སྟོབས་མངའ་བའི་མཛེས་དཔྱོད་དང་དྲག་སྐྱོད་ཀྱི་འདུ་ཤེས་ལྡན་ཕྱིར། འཕལ་ཀ་འཕྲོད་སྟངས་དང་གདོང་ཐུག་རྒྱག་ལུགས་གང་དེར་སྔར་ལས་མི་སེམས་འགུགས་ཤིང་ན་ཟུག་དང་ལྡན་པ་ཞིག་ཡིན། འདི་ནི་དུས་རབས་ཉི་ཤུའི་ལོ་རབས་བརྒྱད་ཅུའི་སྐབས་སུ་བོད་ཀྱི་རྩོམ་རིག་དང་ཕྱི་ཡོང་རྩོམ་རིག་གི་ངོ་འཕྲོད་སྟངས་ཤིག་ཡིན། དུས་སྐབས་དེའི་སྐྱ་ཟད་སྔོ་གཏུགས་སུ་གྱུར་པའི་བོད་ཀྱི་རྩོམ་རིག་ལ་མཚོན་ན། བསམ་བློ་དང་ལྟ་བ་ཉི་ཚེ་བ་སྣ་ཚོགས་འགལ་འདུ་ཟིང་ལོང་ཁྲོད་ངེས་དང་མ་ངེས་པའི་མི་རབས་དེའི་སྙིང་སྟོབས་སམ་སེམས་ཁམས་ཅི་རིགས་ཀྱི་མཚོན་བྱེད་དུ་གྱུར་པའི་འཐུས་ཚབ་རང་བཞིན་གྱི་བརྩམས་ཆོས་ནི་སྙན་རྩོམ«ལང་ཚོའི་རྦབ་ཆུ»ཡིན།        དེབ་འདིར་ཡང་དུས་ཀྱིས་བཙོ་སྦྱང་ཁྲོད་ས་ལེ་སྦྲམ་གྱི་རང་གཤིས་སྔར་ལས་ཀྱང་མངོན་བཞིན་པའི«ལང་ཚོའི་རྦབ་ཆུ»ལ་གུས་འདུད་དང་བཅས་ཐུན་མོང་ནས་འཐུས་ཚབ་ཏུ་ཁས་འཆེས་པའི་བརྩམས་ཆོས་དག་ལ་གནས་པའི་སྟོབས་རྩལ་རྫོགས་པའི་སྙིང་སྟོབས་དང་ཡིད་སེམས་སྐྱོམ་པའི་ངར་ཤུགས། རྩོམ་མཁན་གྱི་མཁྱེན་དཔྱོད་ལས་གྲུབ་པའི་མཛེས་པ་གང་ཇི་ལྟར་གྲུབ་པའི་གནས་ལུགས་བརྗོད་འདུན་དྲག་མོད། བོད་རང་ལ་སྔར་ནས་ཡོད་པའི་གཞུང་ལུགས་དཔྱིས་ཕྱིན་པ་སྦྱོང་བའི་སྐལ་བ་མ་ལྡན་པས་དེ་ལས་ཅི་དགར་འཕྲོ་བྱེད་ཀྱི་འཇོན་ནུས་བྲལ་ཞིང་། ཕྱི་ཡོང་གཞུང་ལུགས་ལ་ཆེད་ལས་རང་བཞིན་གྱི་སྦྱོང་བརྡར་མ་ཐོབ་པས་གཉིས་ཀ་ལྷན་སྦྲེལ་སྒོས་བརྩམས་ཆོས་ཤིག་གིས་བསྐྱངས་པའི་རྒྱུན་དང་གསར་བའི་ཆ་སྐྲ་རྩེ་འབྱེད་པ་བཞིན་རེ་རེ་བརྗོད་པའི་རིག་པའང་མི་ལྡན་པས་ན། ལོ་ངོ་བཅུ་ཕྲག་ཁ་ཤས་ལ་རྩོམ་རིག་དང་འབྲེལ་བའི་རྩོམ་སྒྲིག་པ་བྱས་པའི་མྱོང་བ་ཙམ་ལ་བརྟེན་ནས། ཚིག་དུམ་དེ་དག་ལྷན་དུ་སྦྲེལ་ན་སྒྱུ་རྩལ་དུ་ཇི་ལྟར་གྱུར་པའི་རྒྱུ་མཚན་ལ་འགྲེལ་རྒྱག་ཨེ་ཐུབ་ཐད་ཤ་འབད་རུས་འབད་དུ་མངོན་ཡོད་པ་ཙམ་དུ་ཟད། ང་ཚོ་ཐུན་མོང་ལ་སྣང་བའི་སྐྱོ་འབྲས་འདི་འབྱུང་བྱེད་ཀྱི་རྒྱུ་རྐྱེན་གཙོ་བོ་ནི། ང་ཚོས་རང་ཉིད་ལ་མངའ་བའི་བརྩམས་ཆོས་འདི་དག་ལ་གཞུང་ལུགས་ཀྱི་ངོས་ཐད་ནས་འགྲེལ་རྒྱག་མི་ཐུབ་པ་དེར་ཐུག་འདུག མྱོང་བ་ཙམ་མམ་རྒྱུན་ཤེས་ཙམ་གྱིས་སོ་ན་གནས་པ་ཙམ་སྲུང་བ་ལས་འཕེལ་བྱེད་ཀྱི་རྒྱུ་ཙམ་དུའང་འགྲོ་ཁག་པས་ན། དེབ་འདིར་རྩོམ་ཐབས་སམ་སྒྱུ་རྩལ་མཚོན་སྟངས་ཀྱི་འཕེལ་འགྱུར་ཞིག་བརྩམས་ཆོས་སྤེལ་བའི་དུས་ཀྱི་སྔ་གཞུག་ལྟར་འགྲེལ་རྒྱག་ཨེ་ཐུབ་ལ་འབད་མོད། འགྲེལ་རྒྱག་པའི་འདུ་ཤེས་དམན་པ་དང་འགྲེལ་རྒྱག་པའི་འཇོན་ནུས་མ་འཛོམས་པས། ཀློག་མཁན་རྣམས་ཀྱི་བློར་འབབ་པ་ཞིག་དང་འཕེལ་འགྱུར་གང་ཇི་ལྟར་འཕེལ་ཞིང་འགྱུར་བའི་གསང་བའི་ཆ་དེ་བཏོན་མེད་ངེས། དེ་ལྟ་ནའང་བརྩམས་ཆོས་གང་དེས་ཅི་ཞིག་མཚོན་གྱིན་ཡོད་པ་དང་རྩོམ་མཁན་གྱིས་ཅི་ཞིག་འཆད་འདོད་ཀྱི་ཆ་དེ་ཅུང་སྟབས་བདེ་བོར་ཕྱུང་ཡོད་སྙམ་སྟབས། ལུས་འདིའི་བརྩམས་ཆོས་ལ་ལྟ་ཀློག་གི་འདུན་པ་ཡོད་མཁན་རྣམས་དེའི་ཁམས་སུ་འཇུག་བདེ་བ་ཙམ་བྱེད་པའི་ཕན་རེ་ཐོགས་སོང་ནའང་གུས་པའི་བསམ་དོན་འགྲུབ་སོང་བ་ཡིན།
       དེང་གི་ཆར་ང་ཚོར་སྔར་བཞིན་ཆད་པ་ནི་སྣང་ཚུལ་ཅི་རིགས་ལ་སྤྱི་བསྡོམས་དབྱེ་ཞིབ་དང་བརྩམས་ཆོས་ལ་འགྲེལ་རྒྱག་མཁན་མེད་པ་དེ་ཡིན། འདུ་ཤེས་འདི་དང་འགྲེལ་རྒྱག་པའི་འཇོན་ཐང་མེད་ཚེ། ང་ཚོས་ཤུལ་བཞག་ཅི་ཡོད་རྒྱུན་འཛིན་བྱེད་མི་ནུས་པར་མ་ཟད། མིག་སྔའི་ལག་ལེན་ལ་ཡང་དག་པར་བརྡར་ཤའང་གཅོད་མི་ནུས། འདི་དག་ཚང་མ་ལེགས་ལམ་དུ་འདྲེན་པ་ལ་ངེས་པར་དུ་གཏིང་ཟབ་ཅིང་ངོས་གསལ་བའི་འགྲེལ་རྒྱག་རྒྱུར་རག་ལས། བོད་ཀྱི་རིག་གནས་འཕེལ་འགྱུར་གྱི་ལོ་རྒྱུས་ཁྲོད་དྲིན་ཆེན་མེས་པོ་དག་གིས་རྩ་འགྲེལ་ཡང་འགྲེལ་ཉིང་འགྲེལ། འབྲུ་འགྲེལ་དོན་འགྲེལ་ལ་སོགས་འགྲེལ་སྣ་ཚོགས་ང་ཚོར་སྐྱེས་སུ་བསྟབས་འདུག་པ་འདིར་ཕུགས་རྒྱང་རིང་བའི་དགོངས་གཞི་ཞིག་མེད་པ་ག་ལ་ཡིན། དེ་ལྟར་ན་ང་ཚོས་ད་གཟོད་རང་ངོ་ཟིན་ཞིང་རང་གི་ལོ་རྒྱུས་དང་ད་ཡོད་ཀྱི་གནས་བབ་རྟོགས་ངེས་ལ། དེར་འབྲེལ་དུ་ཡིད་ཆེས་དང་སྤོབས་པའང་འབྱུང་བར་ངེས། མཐར་བོད་ཀྱི་རིག་གནས་མི་ཉམས་གོང་འཕེལ་དང་ཉམས་པ་སོར་ཆུད་ཤོག་ཅེས་སྨོན་པ་དང་བཅས་ཚེ་གྲུབ་ཏུ་འབོད་པས༢༠༢༣ལོའི་ཟླ༧པའི་ཚེས༢ཉིན་བྲིས།