«འབྲུ་བཞིའི་ཚིག་མཛོད»དཔེ་སྐྲུན་འགྲེམ་སྤེལ་བྱས།

       ད་ཐེངས་ལྷག་བསམ་ཅན་གྱི་སློབ་གྲོགས་ཧོར་སྐྱེས་སྒྲོལ་མ་སྐྱབས་ཀྱིས་རོགས་དངུལ་གྱི་མཐུན་རྐྱེན་ལ་གང་དགོས་མ་སྐུལ་དང་བླང་གིས་སྦྱར་བའི་སྐུ་དྲིན་ལས། ཆ་རིས་པ་མགོན་པོ་ཚེ་རིང་གི་བརྩམས་ཆོས་མང་པོའི་ནང་ནས་འབྲུ་བཞིའི་ཚིག་མཛོད་ཅེས་པ་ཀན་སུའུ་མི་རིགས་དཔེ་སྐྲུན་ཁང་ནས་པར་བསྐྲུན་ཐུབ་པའི་དོན་སྙིང་ནི་འབྲུ་བཞིའི་ཚིག་མཛོད་ཐོག་མ་དང་། རྩོམ་པ་པོའི་བརྩམས་ཆོས་ཡོངས་ཀྱི་སྤྱན་སྔར་བསྟར་ཐུབ་བྱུང་བ་འདི་ཡིན་པས། ཧོར་སྐྱེས་སྒྲོལ་མ་སྐྱབས་ཀྱིས་མཚོན་པའི་རྣམ་དཀར་གྱི་ལས་ལ་རྒྱབ་རོགས་བྱེད་མཁན་དག་ལ་ཡང་བཀའ་དྲིན་ཆེ་ཞུ།
       འབྲུ་བཞིའི་བདག་ཉིད་ཅན་གྱི་ཚིག་གི་ཁྱད་ཆོས་གཙོ་བོ་ནི་ཚིག་སྣ་ཐུང་ཞིང་ཟོར་ཡང་བ། དོན་གྱི་འདུ་ཡུལ་ཆེ་ཞིང་གནད་འདུས་པ། ཚིག་ལྷག་མང་པོ་མི་དགོས་པར་དོན་གནད་གསལ་བར་སྟོན་ཐུབ་པ་ཞིག་དང་། དེ་དང་དེ་དག་ཐ་སྙད་དང་ཚིག་གི་རྒྱ་མཚོར་འཐོར་ནས་ཡོད་པར། ཆ་རིས་པ་མགོན་པོ་ཚེ་རིང་གིས་མི་ལོ་མང་པོའི་རིང་དཔེ་དེབ་མང་པོའི་གསེང་ནས་གཅེས་སྒྲུག་གིས་ཚིག་མཛོད་འདི་ཉིད་བསྒྲིགས་ཤིང་པར་བསྐྲུན་བྱས་པ་སྐལ་བ་བཟང་ཞིང་ཡོན་ཏན་དུ་མས་ཕྱུག་གོ །
       མ་འོངས་པར་འབྲུ་བཞི་བའི་ཚིག་འགྲེལ་དང་བཅས་པས་ཐོག་དྲངས། རྩོམ་པ་པོའི་བརྩམས་ཆོས་གཞན་རྣམས་ཀྱང་ལུ་གུ་རྒྱུད་དུ་དཔེ་སྐྲུན་འགྲེམ་སྤེལ་ཐུབ་པའི་སྨོན་འདུན་དང་བཅས།