«ཀྲུང་གོ་བོད་རིགས་ཀྱི་གནའ་རབས་ཨར་སྐྲུན་ལོ་རྒྱུས»(དབུས་གཙང་དེབ)

       དེབ་གསར་ཡོངས་བསྒྲགས་ཚོགས་འདུའི་སྟེང་། གཙོ་སྐྱོང་བས«ཀྲུང་གོ་བོད་རིགས་ཀྱི་གནའ་རབས་ཨར་སྐྲུན་ལོ་རྒྱུས»(དབུས་གཙང་དེབ)ཅེས་པའི་ནང་དོན་གཙོ་བོ་དང་། དཔེ་དེབ་གྲུབ་པའི་བརྒྱུད་རིམ། གླེང་གཞི་བཅས་ལ་ངོ་སྤྲོད་བྱས། དེབ་འདིའི་ནང་དུ་དབུས་གཙང་གི་གནའ་རབས་ཨར་སྐྲུན་ཀྱི་གནས་ཡུལ་འདེམས་པ་ནས་བཀོད་སྒྲིག འཛུགས་སྐྲུན་རྒྱུ་ཆ་དང་། གྲུབ་ཆའི་བཟོ་རྩལ་བཅས་ཀྱི་དམིགས་བསལ་ཁྱད་ཆོས་རྒྱས་བཤད་བྱས་ཡོད་ལ། ཡུན་ནན་དང་། སི་ཁྲོན། ཀན་སུའུ། མཚོ་སྔོན་སོགས་བོད་འབྲེལ་ཞིང་ཆེན་གྱི་བོད་ལུགས་ཨར་སྐྲུན་གྱི་གནས་ཚུལ་ཡང་རགས་བཤད་བྱས་ཡོད། རྩོམ་པ་པོས་དཔེ་དེབ་ནང་དུ་ཨར་སྐྲུན་ལོ་རྒྱུས་ཀྱི་རྒྱབ་ལོགས་ཀྱི་རིག་གནས་ཀྱི་ནང་སྙིང་སྔོག་འདོན་གཏིང་ཟབ་བྱས་ཤིང་། ཆོས་ལུགས་ཀྱི་དད་པ་དང་། ཡུལ་སྲོལ་གོམས་གཤིས། སྤྱི་ཚོགས་ལམ་ལུགས་སོགས་རྒྱུ་རྐྱེན་གྱིས་ཨར་སྐྲུན་བཟོ་སྐྲུན་ལ་ཐེབས་པའི་ནུས་པ་ལ་བརྒྱུད་རིམ་ལྡན་པའི་ངང་དབྱེ་ཞིབ་བྱས།        བརྩམས་ཆོས་གསར་པ་འདིའི་ནང་དུ་སྐུ་ཞབས་མི་ཉག་ཆོས་ཀྱི་རྒྱལ་མཚན་གྱི་ལོ་མང་རིང་གི་ཐུགས་ནུས་དང་ཞིབ་འཇུག་གི་གྲུབ་འབྲས་འདུས་ཡོད་པར་མ་ཟད། ཡོངས་བསྒྲགས་བྱེད་མྱོང་མེད་པའི་བོད་ལྗོངས་ཀྱི་ཨར་སྐྲུན་གྱི་པར་རྙིང་པ་དང་། ལག་བྲིས་རི་མོ། ངོས་མཉམ་རི་མོ་བཅས་ཁག་གཅིག་ཐོག་མར་བསྡུས་ཡོད། དེབ་ཧྲིལ་པོ་རྒྱ་བོད་སྐད་གཉིས་ཀྱི་ཐོག་ནས་མངོན་པ་དང་། མཁས་དབང་དང་རིག་གནས་ལ་དགའ་ཞེན་བྱེད་མཁན་ཚོས་བོད་རིགས་ཀྱི་གནའ་བོའི་ཨར་སྐྲུན་ལོ་རྒྱུས་ལ་རྒྱུས་ལོན་ཟབ་མོར་བྱེད་པར་ཁུངས་ལྡན་དཔྱད་གཞི་མཁོ་འདོན་བྱས། མི་རིགས་རིག་གནས་རྒྱུན་འཛིན་དང་སྤེལ་རེས་ལ་སྐུལ་མ་ནུས་ལྡན་ཐེབས་པར་མ་ཟད། རང་རྒྱལ་གྱི་མི་རིགས་ཨར་སྐྲུན་ལོ་རྒྱུས་ཀྱི་ཞིབ་འཇུག་ཁྱབ་ཁོངས་ལ་གསོན་ཤུགས་གསར་པ་སྤྲད་ཡོད།        ཐི་ཧུའུ་རིག་གནས་ཡུལ་སྐོར་གྱི་མཉམ་འབྲེལ་སྲོལ་གཏོད་པ་ཧྥང་ཁུན་གྱིས་ཡོངས་བསྒྲགས་ཚོགས་འདུའི་ཐོག་ཤིས་ཚིག་བརྗོད་སྐབས། སྤྱི་ཚོགས་དང་རིག་གནས་ཁྱབ་ཁོངས་སུ་སྐུ་ཞབས་མི་ཉག་ཆོས་ཀྱི་རྒྱལ་མཚན་གྱིས་འགན་གལ་ཆེན་དག་གཅིག་ལྕོགས་སུ་བཞེས་ནས་བོད་རིགས་ཀྱི་སྲོལ་རྒྱུན་ཨར་སྐྲུན་ལག་རྩལ་ལ་སྲུང་སྐྱོང་དང་དར་སྤེལ་གཏོང་བར་ནུས་ཤུགས་ཡོད་རྒུ་བཏོན་ཞིང་། བོད་རིགས་ཀྱི་རིག་གནས་རྒྱུན་འཛིན་དང་འཕེལ་རྒྱས་ཐད་ལ་ནུས་པ་གལ་ཆེན་བཏོན་པ་མངོན་ཡོད་ཅེས་བརྗོད།
       ཡོངས་བསྒྲགས་ཚོགས་འདུ་མཇུག་སྒྲིལ་རྗེས། སྐུ་ཞབས་མི་ཉག་ཆོས་ཀྱི་རྒྱལ་མཚན་གྱིས་ཀློག་པ་པོ་དང་རིག་གཞུང་སྤེལ་རེས་གནང་ཞིང་། ཁོང་གིས་མ་འོངས་པར་མུ་མཐུད་དུ་དེང་རབས་ཀྱི་སྐད་བརྡའི་ཐོག་ནས་བོད་ལྗོངས་ཀྱི་སྲོལ་རྒྱུན་རིག་གནས་བརྒྱུད་སྤེལ་བྱ་རྒྱུ་ཡིན་པ་དང་། གསར་གཏོད་རང་བཞིན་གྱི་གཞན་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ཁྲོད་ཀྲུང་ཧྭའི་རིག་གནས་རྒྱུན་འཛིན་བྱས་ནས་ཀྲུང་གོའི་མི་རིགས་ཨར་སྐྲུན་ལོ་རྒྱུས་ཀྱི་ཞིབ་འཇུག་དང་རྒྱུན་འཛིན་ལ་སྟོབས་ཤུགས་སྐྱེས་སུ་འབུལ་གྱིན་ཡིན་ཞེས་བཤད།