གླིང་ཚ་སྙིང་རྒྱལ་འབུམ་གྱི་སྙན་དེབ«སྐར་ཚོགས་ཀྱི་ཟིལ་བ»ཞེས་པ་པར་དུ་བསྐྲུན་པ།

       ཉེ་ཆར། གླིང་ཚ་སྙིང་རྒྱལ་འབུམ་གྱི་སྙན་དེབ«སྐར་ཚོགས་ཀྱི་ཟིལ་བ»ཞེས་པ་མཚོ་སྔོན་མི་རིགས་དཔེ་སྐྲུན་ཁང་ནས་ལོ་རེ་བཞིན་པར་སྐྲུན་བྱེད་བཞིན་པའི་སྨིན་དྲུག་དཔེ་ཚོགས་ལས«སྨིན་དྲུག་བོད་ཀྱི་ན་གཞོན་རང་མོས་སྙན་ངག་དཔེ་ཚོགས»ཁྲོད་བདམས་ཏེ་པར་སྐྲུན་འགྲེམས་སྤེལ་བྱས།

       སྙན་དེབ་འདིར་དཔེ་ཚོགས་སྤྱིའི་ཇུས་འགོད་ཀྱི་བླང་བྱ་ལྟར་རང་མོས་སྙན་ངག་ཁོ་ན་བསྡུས་ཡོད་པ་དང་། སྙན་ངག་བྲིས་པའི་དུས་རིམ་ལ་མ་བལྟོས་པར་སྙན་ངག་ཐུང་ངུ་སྔོན་དང་སྙན་ཚོམ་རྗེས་སུ་བཀོད་དེ་གྲུབ་པར་བྱས་ཡོད། སྙན་ངག་གི་བརྗོད་བྱའི་ཐད་ནས་ཀྱང་སྐྱེས་ཡུལ་ཞིང་གྲོང་གི་འཚོ་བ་དང་། སྔ་ཕྱིར་སློབ་གསོ་དང་རྩོམ་སྒྲིག་གི་ལས་ཀ་གཉེར་བ་བཅས་རང་གི་ཆེས་ཉེ་བའི་འཚོ་བ་དང་འབྲེལ་ནས་བརྩེ་དུང་དང་། ཕྱིར་དྲན། དངོས་ཡོད། ཐོབ་ཤོར། འདུ་འབྲལ། འཚོལ་སྙེག ཕུགས་བསམ་སོགས་བརྗོད་གཞིར་བཟུང་སྟེ། དེ་དག་ལ་བཟུང་བའི་ལྟ་སྟངས་དང་། དེ་དག་ལས་བྱུང་བའི་རྟོག་འགྱུ་སྣ་ཚོགས་བྲིས་ཡོད་ཅིང་། ཁྱད་པར་དུ་ལོ་འདི་འགར་བདག་གི་དགའ་ཕྱོགས་གཞན་ཞིག་སྟེ། ས་གནས་ཀྱི་རི་ཆུའི་རིག་གནས་ལ་དོ་སྣང་ངམ་སློབ་སྦྱོང་བྱས་པ་དང་འབྲེལ། སྐྱེ་ཁམས་རྩོམ་རིག་གི་ཟུར་ངོས་ནས་བག་ལ་ཞ་བའི་རིག་གནས་ཀྱི་སྣང་ཚུལ་གང་ཞིག་ལ་ཕངས་སེམས་དང་། རེ་འབོད། བསྐྱར་སྐྲུན་སོགས་ཀྱིས་མཚོན་པའི་སྙན་ངག་ཀྱང་ཚུད་ཡོད།

       སྙན་ངག་འབྲི་བ་ནི་རང་གི་དགའ་ཕྱོགས་ཤིག་ཏུ་གྲུབ་པ་ནས་མགོ་བརྩམས་ཏེ། ད་ལྟ་སྙན་ངག་ཀློག་པའང་ལས་ཀ་ཞིག་ཏུ་གྱུར་པའི་དུས་འདིར། ཡིད་ལ་ཡང་ཡང་འཆར་འོང་བ་ཞིག་ནི། གཅིག་ནས་སྙན་ངག་འབྲི་བ་ལ་ཚོར་བ་ཁོ་ནའི་འཆིང་རྒྱ་ལས་བརྒལ་ཏེ། འཚོ་བ་དངོས་ཀྱི་ཉམས་མྱོང་གི་སྟེང་ནས་དཔེ་ཀློག་མང་དུ་བྱེད་པ་ནི་ཤིན་ཏུ་གལ་ཆེ་བར་སེམས་ལ། ལྟག་ཆུ་ཆད་པའི་རྫིང་བུ་བཞིན་དཔེ་ཀློག་གི་རྩིས་ཀྱིས་ཟིན་མེད་པར། ཨུ་ཚུགས་ཀྱིས་རང་གི་ཚོར་བ་ཁོ་ནར་བརྟེན་པ་ནི་སྨུག་ལོང་ནང་གི་ལམ་འགྲོ་པ་དང་མཚུངས། གཉིས་ནས་མི་རིགས་སོ་སོའི་མཛེས་དཔྱོད་ཀྱི་ལྟ་སྟངས་མི་འདྲ་བར་བརྟེན། སྙན་ངག་གི་ཡིད་བརྙན་གྲུབ་སྟངས་ལའང་ཐུན་མོང་གི་ཆ་ཡོད་ལ་ཐུན་མིན་གྱི་ཆའང་ངེས་པར་ཡོད་སྲིད་པས། ཡིད་བརྙན་དུ་གྲུབ་པ་ཡོད་དོ་ཅོག་རང་རིགས་ཀྱི་མཛེས་དཔྱོད་ལྟ་སྟངས་ཡིན་མིན་ལ་མ་བལྟོས་པར་འཇོལ་ཉོག་ཏུའང་སྤྱོད་མི་རིགས་པར་སེམས། གསུམ་ནས་བོད་རང་གི་མིང་དང་ཚིག་གི་གྲུབ་ཆ་སྟེ། བརྡ་སྤྲོད་ཀྱི་སྤྱིའི་སྒྲིག་གཞི་གཏོར་ནས་གཞན་ཚིག་བོད་ལ་འདྲེན་རྐྱང་བྱེད་པ་སོགས་ཀྱང་སྙན་ངག་འཕེལ་རྒྱས་ཀྱི་གེགས་ཤིག་ཏུ་སྙམ་པས། སྐབས་ལན་རེར་ད་ལྟའི་དུས་འདིར་འཕེལ་རྒྱས་ལས་རྒྱུན་འཛིན་ནི་ཅི་འདྲའི་གལ་ཆེ་བ་ལ་ཨང་སྙམ་པའི་ཚོར་བ་ཞིག་ཀྱང་རྒྱུན་མར་འབྱུང་བ་བཅས་ནི། རང་ཉིད་སྙན་ངག་གསར་རྩོམ་གྱི་ལམ་ཁ་འདིར་ཞུགས་པ་དང་། ལོ་འདི་འགར་སྙན་ངག་རྩོམ་སྒྲིག་གི་བྱ་བའི་ཁྲོད་བྱུང་བའི་ངེས་ཤེས་ཙམ་ཡིན་ཞིང་། བདག་གིས་སྙན་ངག་ལ་བཟུང་བའི་རྣམ་འགྱུར་ཡང་ཡིན།

       གླིང་ཚ་སྙིང་རྒྱལ་འབུམ། སྨྱུག་མིང་ལ་གླིང་བུར་འབོད། 1988ལོར་མཚོ་སྔོན་ཁྲི་ཀར་སྐྱེས། མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་ནས་གནའ་རབས་རྩོམ་རིག་ཆེད་ལས་ཀྱི་རབ་འབྱམས་པའི་བསླབ་གནས་བླངས། སྔ་ཕྱིར«མགོ་དཀྲིས་དམར་པོ་དྲན་པ»དང«མདོ་མཁར་གྱི་སྙན་ཚིག»སོགས་སྙན་ངག་རེ་འགའ«སྦྲང་ཆར»དང«གངས་རྒྱན་མེ་ཏོག»སོགས་སུ་སྤེལ་བ་དང་། «ས་པཎ་དང་པཎ་ཆེན་ཤཱཀྱ་མཆོག་ལྡན་གཉིས་ཀྱི་ང་བརྒྱད་མའི་འབྲེལ་བར་བརྟག་པ»དང«བོད་ཀྱི་གནའ་རབས་རྩོམ་རིག་ལས་རྒྱུན་ཆགས་རྩོམ་ལུས་ཀྱི་བྱུང་འཕེལ་ལ་དཔྱད་པ» «མདོ་སྨད་ཁྲི་ཀའི་རི་ཁྲོད་པའི་སྡེའི་བྱུང་འཕེལ་དང་ད་ལྟའི་གནས་བབ»སོགས་དཔྱད་རྩོམ་བཅུ་ལྷག«མཚོ་སྔོན་མི་རིགས་སློབ་ཆེན་གྱི་རིག་དེབ»དང«མཚོ་སྔོན་དགེ་འོས་སློབ་ཆེན་གྱི་རིག་དེབ» «མཚོ་སྔོན་སྤྱི་ཚོགས་ཚན་རིག»སོགས་རིག་གཞུང་དུས་དེབ་སྟེང་སྤེལ། བསྒྱུར་དེབ«དུས་རབས20པའི་ཚན་རྩལ་འཕེལ་རྒྱས»དང་། སྙན་དེབ«སྐར་ཚོགས་ཀྱི་ཟིལ་བ»གཉིས་པར་དུ་བསྐྲུན། ད་ལྟ་མཚོ་སྔོན་མི་རིགས་དཔེ་སྐྲུན་ཁང་དུ་རྩོམ་སྒྲིག་པའི་ལས་ཀ་གཉེར་བཞིན་ཡོད།