དེབ་གསར«ཞབས་དཀར་ཚོགས་དྲུག་རང་གྲོལ་གྱི་གསུང་འབུམ»པོད་བཅུ་གཉིས་ཅན་པར་སྐྲུན་བྱས།

       ཉེ་སྔོན། རེབ་གོང་གྲོང་ཁྱེར་མི་རིགས་སྐད་ཡིག་ལས་དོན་ལྟེ་གནས་ཀྱིས་བསྒྲིགས་ཤིང་སི་ཁྲོན་མི་རིགས་དཔེ་སྐྲུན་ཁང་གིས་དཔེ་སྐྲུན་བྱས་པའི་རྣལ་འབྱོར་གྱི་དབང་ཕྱུག་ཆེན་པོ་འགྲོ་མགོན་ཞབས་དཀར་ཚོགས་དྲུག་རང་གྲོལ་གྱི་གསུང་འབུམ་པོད་བཅུ་གཉིས་ཅན་དེ་པར་སྐྲུན་འགྲེམས་སྤེལ་བྱས་འདུག

       གསུང་འབུམ་འདི་ཉིད་ཀྱི་གྲངས་ཚད་ལ། རྣམ་མགུར་བཞི་དང་། སྤྲུལ་པའི་གླེགས་བམ་དགུ། ཆོས་བཤད་གསུམ། ལེགས་བཤད་གསུམ། གདམས་ངག་གསུམ། ལྟ་བའི་མགུར་གསུམ། ཁྲིད་ཡིག་གི་སྐོར། སྣ་ཚོགས་ཀྱི་སྐོར་བཅས་པོད་བཅུ་གཉིས་དང་། དེའི་ཁར་ཁོང་གི་བཀའི་བསྡུ་བ་པོ་ཉང་སྐྱེས་སྣང་མཛད་རྡོ་རྗེས་ཕྱོགས་བསྒྲིགས་གནང་བའི་སློབ་མ་ཡོན་བདག་གིས་ཕུལ་བའི་བསྟོད་བསྔགས་ཀྱི་ཞབས་དཀར་བ་ཚོགས་དྲུག་རང་གྲོལ་གྱི་ཕྱག་དཔེ།སྐོར་དང་ཞབས་དཀར་སྐུ་ཕྲེང་གཉིས་པ་འཇིགས་མེད་ཐེག་མཆོག་བསྟན་པའི་རྒྱལ་མཚན་གྱི་རྣམ་མགུར་བསྣན་ཏེ་བསྡོམས་པས་པོད་བཅུ་གསུམ་གྱི་བདག་ཉིད་ཅན་དུ་གྲུབ་པར་བྱས་ཡོད།