དཔའ་རིས་གཉེན་སྟོན་དང་དམངས་གླུའི་སྐོར་གྱི་དེབ་གསར་གཉིས།

       ཉེ་ཆར། དཔའ་རིས་རྫོང་བོད་སྐད་ཡིག་ཁྲིད་སྟོན་ལྟེ་བས་བསྒྲིགས་པའི་དེབ་གསར«དཔའ་རིས་གཉེན་སྟོན་བཀྲ་ཤིས་ཀུན་འཛོམས»དང«དཔའ་རིས་དམངས་གླུའི་སྙན་ཚིག་གཅེས་བཏུས»ཞེས་པ་གཉིས་སི་ཁྲོན་མི་རིགས་དཔེ་སྐྲུན་ཁང་ནས་པར་སྐྲུན་འགྲེམས་སྤེལ་བྱས།

       དེ་ཡང་མདོ་སྨད་ས་ཡི་ཐིག་ལེ་རྨ་ཀླུང་རིང་མོའི་བྱང་རྒྱུད་དཔའ་རིས་དཀར་པོ་ཞེས་པའི་གནས་འདིར་གཉེན་གྱི་རྟེན་འབྲེལ་སྐྱོང་ལུགས་རབ་དང་རིམ་པ་ཚང་ཡོད་ལ་གཉེན་གྱི་བཤད་པ་དང་གླུའི་རྣམ་གྲངས་མུ་ཏིག་ཕྲེང་བརྒྱུས་བཞིན་ནར་མར་བསྐྱངས་ཡོད། དཔའ་རིས་གཉེན་སྟོན་བཀྲ་ཤིས་ཀུན་འཛོམས་ཞེས་པའི་དཔེ་དེབ་འདི་ནི་དཔའ་རིས་དམངས་སྲོལ་རིག་གནས་དཔེ་ཚོགས་ཀྱི་བྱེ་བྲག་ཅིག་ཡིན། ཐེངས་འདིར་དཔེ་སྐྲུན་བགྱིས་ནས་རྒྱ་ཆེ་ཀློག་པ་པོའི་མིག་ལམ་དུ་ཕུལ་བའང་རིག་གནས་ཉིང་བཅུད་འདི་ཉིད་སྲུང་སྐྱོབ་དང་རྒྱུད་འཛིན་གྱི་དམིགས་ཡུལ་འབའ་ཞིག་བཅངས་པ་དེ་ཡིན། དེབ་འདིར་རྒྱ་བོད་ཤན་སྦྱར་དང་ཡིག་རིས་ཟུང་འབྲེལ་གྱི་སྒོ་ནས་དཔའ་རིས་གཉེན་སྟོན་གྱི་རྟེན་འབྲེལ་སྐྱོང་ལུགས་ཆ་ཚང་འཁོད་ཡོད་དོ། །

       དགའ་སྤྲོ་རྒྱས་པར་བྱེད་པའི་ངོ་མཚར་གཏམ། །བློ་གྲོས་སྐྱེད་པར་མཁས་པའི་ངག་གི་རྩལ། །དོགས་གཞི་རྣམ་པར་གཅོད་པའི་སྨྲ་བའི་མཚོན། །བརྗོད་བྱ་སྟོན་པའི་ཚིག་གི་ཁྱད་པར་ཡིན། །ཞེས་དེང་རབས་བོད་ཀྱི་བརྡ་སྤྲོད་སྨྲ་བའི་ཁྱུ་མཆོག །རྒྱ་བོད་སྐད་གཉིས་ཀྱི་ལོ་ཙཱ་ལ་གཞན་དྲིང་མི་འཇོག་པའི་དོན་གྱི་མཁས་པ་ཆེན་པོ་དཔའ་རིས་སངས་རྒྱས་མཆོག་གིས་དཔའ་རིས་དམངས་གླུའི་བརྗོད་བྱ་དང་ཡོན་ཏན་གྱི་ཆེ་བ་བརྗོད་པ་ཇི་བཞིན། དཔའ་རིས་དམངས་གླུའི་སྙན་ཚིག་གཅེས་བསྡུས་ཞེས་པ་འདིའི་ནང་དོན་ནི་དཔའ་རིས་དམངས་ཁྲོད་རྩོམ་རིག་དམངས་གླུའི་ཁོངས་གཏོགས་ཤིག་ཡིན་ལ། དེ་ནི་ལོ་ངོ་སྟོང་ཕྲག་གི་རིང་ལ་དཔའ་རིས་དམངས་ཚོགས་ཀྱིས་ཐོན་སྐྱེད་འཚོ་བའི་ཁྲོད་ནས་ནང་བསམ་པའི་ཀུན་སློང་མཚོན་པ་དང་། རང་བྱུང་ཁམས་དང་རྩྭ་ཐང་། རི་ཆུ་ནགས་གསུམ་ལ་བརྟེན་ནས་དངོས་ཡོད་འཚོ་བ་བརྗོད་ཅིང་། རང་བྱུང་ཁམས་ཆེན་མོ་ལ་བསྟོད་ཅིང་བསྔགས་པ་དང་། མ་འོངས་པའི་བདེ་སྐྱིད་ཀྱི་འཚོ་བ་གསར་བར་རེ་སྨོན་སོགས་བྲིས་ཡོད། རྗོད་བྱེད་ཀྱི་ཚིག་ནི་དཔའ་རིས་པའི་ཁ་སྐད་ཀྱི་སྒྲ་གདངས་སམ་ཟེར་སྒྲོས་དང་མཐུན་པ་དང་། ས་གནས་ཀྱི་ཁྱད་ཆོས་ལྡན་པའི་དབྱངས་རྟ་རྣལ་མའམ། དཔའ་རིས་ཡུལ་སྐད་ལས་གྲུབ་པའི་གནའ་གླུ་དག་གང་ཐུབ་ཅི་ཐུབ་ཀྱིས་བསྡུས་ཏེ་བསྒྲིགས་ཤིང་དམངས་ཁྲོད་རྩོམ་རིག་གི་ཁྱད་ཆོས་མ་ཉམས་སོར་བཞག་དང་དེའི་ཁྱད་ཆོས་འབུར་དུ་ཐོན་ཡོད་དོ། །