སྙན་ངག་པ་ནག་པོའི་སྙན་དེབ«རྡུལ་ཕྲན་གྱི་གླེགས་བམ»པར་དུ་བསྐྲུན་པ།

       ནག་པོ་ལགས་ཀྱི་སྙན་ངག་རྩེ་གྲ་འདི་དག་ཀློག་དུས་འཚོ་བ་དང་འཆི་བ་ལག་འཐབ་བྱས་ནས་འཇིག་རྟེན་འཁོར་བ་དང་རང་ཡུལ་བརྗོད་ཡོད་པའི་སྣང་བ་ཞིག་འཆར་སྲིད། དེ་ཡང་ཞིབ་མོ་ཡིན་པ་འདྲ་པོ། རྩིང་མོ་ཡིན་པ་འདྲ་པོ། འཇམ་རྩུབ་གཉིས་ཀའི་ཆ་ཡོད་པ་འདྲ་པོ། སྐམ་རློན་གཉིས་ཀས་གྲུབ་པ་འདྲ་པའི་དབྱངས་གསལ་སོ་བཞིའི་རྩམ་སྐལ་འདི་དག་གི་ཉིང་བཅུད་ལེན་ན་དེ་དག་ཡང་དང་བསྐྱར་དུ་མྱང་དགོས་འདུག་སྙམ།
       ནག་པོའི་སྙན་ངག་ཁྲོད་ཀྱི་ངོ་རྟགས་གལ་ཆེན་དེ་དག་རྒྱང་རིང་བའི་གཏམ་རྒྱུད་ཅིག་གི་མགོ་ཁུངས་དང་ཐུག་པས། སྒྱུ་རྩལ་འཚོལ་སྙེག་གི་གོ་རིམ་ནི་མཇུག་མཐའི་དར་ཤིང་ལྟར་ཚོར་ཤེས་ཀྱི་ངོས་སུ་བརྗིད་པོར་འགྲེང་བ་དང་། ཚུགས་ཐུབ་ཏུ་གྲུབ་པའི་ངོ་བོའི་བསྐལ་དོན། ངེས་ལ་མི་སྣང་བའི་གདགས་གཞིའི་ཡིད་བརྙན། ཆོས་ཉིད་ཀྱི་ཀློང་དུ་འབྱམས་པའི་གདུང་བ་ལྕི་མོ་སོགས་སྙན་དེབ་འདིའི་ཚིག་ཚོགས་ཀྱི་བར་ན་ཆུ་རླབས་བཞིན་དུ་གསིག་ཅིང་འཕྱོ།
       ནག་པོ་ནི་སྙན་ངག་གི་ལུས་འདིར་ཨ་འཐམ་ཀྱིས་འཇུག་མཁན་ཞིག་ཡིན་པར་མ་ཟད། བོད་རྒྱ་གཉིས་ཀྱི་ལམ་ནས་སྙན་ངག་ཡག་པོ་འབོར་ཆེན་བརྩམས་ཡོད། སྙན་དེབ་འདི་ལས་ཁོང་གི་སྙན་ངག་ནང་རྒྱུན་མར་འབྱུང་གིན་པའི་ཡིད་གཟུགས་ཀྱི་འགྲེམ་སྟོན་དང་ཚོར་བའི་འགྱུ་ཕྱོགས་འདྲ་མིན་གྱིས་བསྐྱེད་པའི་ཐེ་ཚོམ་དང་ངེས་པའི་བློ་སྣ་ཚོགས་ཐབས་རྩལ་སྣ་མང་གིས་བསྟན་འདུག