མཚོ་ལྷོ་བོད་རིགས་རང་སྐྱོང་ཁུལ་གྱིས་བོད་ཀྱི་གཙགས་དྲུབ་ཐོན་རྫས་སྐོར་ཞིག་ཨ་མེ་རི་ཁར་བཙོང་བ།

               ཉེ་ལམ་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་བི་ཤྭ་ཀརྨ་མི་རིགས་བཟོ་རྩལ་ཐོན་རྫས་ཚད་ཡོད་ཀུང་ཟིས་སྤྱིའི་རིན་ཐང་ཨ་མེ་རི་ཁའི་སྒོར་མོ་དུང་ཕྱུར་གཉིས་དང་བྱེ་བ་བཞིའི་བོད་ཀྱི་ཐང་ཀ་སོ་གསུམ་ཟི་ལིང་སྒོ་ཁྲལ་ལས་ཁུངས་ཀྱིས་སྐྱེལ་རོགས་བྱས་ནས་ཨ་མེ་རི་ཁ་རྒྱལ་ཁབ་ལ་བཙོང་། དེ་ནི་མཚོ་ལྷོ་ཁུལ་གྱི་ལོ་རྒྱུས་སྟེང་ཐེངས་དང་པོར་ཕྱིར་བཙོང་བའི་མི་རིགས་སྲོལ་རྒྱུན་གྱི་ལག་ཤེས་ཐོན་རྫས་ཡིན་པ་དང་། དེས་མཚོ་ལྷོ་ཁུལ་གྱི་མི་རིགས་རིག་གནས་ཐོན་རྫས་ཕྱི་རྒྱལ་དང་འཛམ་གླིང་གི་ཚོང་རར་བསྐྱོད་མགོ་བརྩམས་པ་མཚོན། མཚོ་ལྷོ་བོད་རིགས་རང་སྐྱོང་ཁུལ་གྱི་བི་ཤྭ་ཀརྨ་མི་རིགས་བཟོ་རྩལ་ཐོན་རྫས་ཚད་ཡོད་ཀུང་ཟི་ཉིས་སྟོང་བརྒྱད་ལོར་བཙུགས་པ་དང་། དེར་སྤྱིའི་མ་དངུལ་སྒོར་མོ་ས་ཡ་གསུམ་བཏང་ཞིང་། ཀུང་ཟི་དེར་ལས་བཟོ་བ་གོ་བཞི་ཡོད་པ་དང་། ཐོན་སྐྱེད་ཀྱི་འབྲས་བུ་ལྟར་གླ་ཕོགས་སྟེར་བའི་ལས་བཟོ་བ་ཉིས་བརྒྱ་དང་གོ་བདུན་ཡོད། ཟི་ལིང་གྲོང་ཁྱེར་གྱི་རྒྱལ་བཙུགས་ལམ་དང་། ཁྲི་ཀ་རྫོང་། གུང་ཧོ་རྫོང་བཅས་སུ་བོད་ཀྱི་གཙགས་དྲུབ་ཐོན་སྐྱེད་རྟེན་གཞི་གསུམ་བཙུགས་ཡོད་པ་དང་། ཉིས་སྟོང་བཅུ་གཅིག་ལོར་བོད་ཀྱི་གཙགས་དྲུབ་ཐོན་རྫས་བཙོང་བའི་སྒོར་མོ་ས་ཡ་ལྔ་དང་འབུམ་གསུམ་ལ་བསླེབས། ད་ལོར་ཀུང་ཟི་དེས་གཙགས་གྲུབ་ཐོན་རྫས་ཕྱིར་བཙོང་ནས་ཡོང་སྒོ་སྒོར་མོ་འབུམ་ལྔ་བསྐྲུན་རྩིས་ཡོད།