༄༅། །དངུལ་རྭ་གྲོང་རྡལ་དབུལ་སྐྱོར་ཐོན་ལས་གླིང་གི་ཐོན་རྫས་གསར་སྤེལ་ཚོགས་འདུ་དེ་ཁྲུན་ཏུའུ་གྲོང་ཁྱེར་ནས་བསྡུས།
རྩོམ་པ་པོ།：མི་གསལ།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2020-01-09
ཀློག་གྲངས།：
རྨ་ཆུ་རྗོང་རྫོང་ཨུ་དང་རྫོང་མི་དམངས་སྲིད་གཞུང་གི་རྒྱབ་སྐྱོར་འོག་དངུལ་རྭ་གྲོང་རྡལ་མི་དམངས་ཨུ་ཡོན་ལྷན་ཁང་དང་གྲོང་རྡལ་མི་དམངས་སྲིད་གཞུང་གིས་གཙོ་སྒྲུབ་གནང་ལ་མཚོ་སྔོན་ཕུགས་སྟོན་ཁེ་ལས་བློ་འདྲི་ཚད་ཡོད་སྤྱི་གཉེར་ཁང་གིས་འཆར་འགོད་བྱས་པའི་དངུལ་རྭ་གྲོང་རྡལ་དབུལ་སྐྱོར་ཐོན་ལས་གླིང་གི་2020ལོའི་ཐོན་རྫས་གསར་སྤེལ་ཚོགས་འདུ་དེ་སྤྱི་ཟླ་དང་པོའི་ཚེས་གསུམ་ཉིན་ཁྲུན་ཏུའུ་གྲོང་ཁྱེར་ནས་བསྡུས། 
ཐེངས་འདིའི་ཚོགས་འདུ་ཡིས“ལྗང་མདོག་ཐོན་ལས། རྒྱུན་བསྲིང་འཕེལ་རྒྱས”བརྗོད་གཞིར་བཟུང་ཡོད་ལ་སྤྱི་ཚོགས་སྟེང་གི་ལས་རིགས་སོ་སོའི་གདེང་འཇོག་མཐོན་པོ་ཐོབ། ཚོགས་ཐོག་ཏུ་སློབ་གྲྭ་ཆེན་མོའི་དགེ་རྒན་དང་བོད་ཁུལ་གྱི་ཚོང་བ་གྲགས་ཅན། སྐྱེ་ཁམས་ཁོར་ཡུག་སྲུང་སྐྱོབ་པ་དང་དགོན་སྡེ་ཆེན་མོའི་འགན་འཛིན་པ། མཉམ་ལས་ཁང་གི་འགན་ཁུར་བ་དང་སློབ་ཆེན་པ། གླུ་བ་གླུ་མ་སོགས་ས་ཁུལ་སོ་སོའི་ཚོགས་ཞུགས་མི་སྣ་མང་པོ་མཉམ་གཅིག་ཏུ་འཛོམས་ནས་ཐེངས་འདིའི་དོན་སྙིང་གལ་ཆེན་ལྡན་པའི་ཚོགས་འདུའི་མགོ་རྔ་བར་གསུམ་ལ་བགྲོ་གླེང་གང་མང་བྱས། 
ཟླ་དང་པོའི་ཚེས་གསུམ་ཉིན་གྱི་ཉིན་གུང་དུས་ཚོད་བཅུ་གཉིས་དང་ཕྱེད་ཀའི་ཐོག་ཐོན་རྫས་གསར་སྤེལ་ཚོགས་འདུ་དངོས་སུ་མགོ་བརྩམས་ཤིང་། རྨ་ཆུ་རྫོང་གི་རྫོང་དཔོན་དང་དངུལ་རྭ་གྲོང་རྡལ་གྱི་གྲོང་གཙོ་སོགས་འབྲེལ་ཡོད་འགོ་ཁྲིད་ཀྱིས་དངུལ་རྭ་གྲོང་རྡལ་དབུལ་སྐྱོར་ཐོན་ལས་གླིང་གི་འཕེལ་རྒྱས་གནས་བབ་དང་མ་འོངས་ཁ་ཕྱོགས། ཚོང་ལས་འཆར་གཞི་སོགས་ངོ་སྤྲོད་བྱས། ད་དུང་ཚོགས་འདུའི་སྟེང་དུ་ཐོན་ལས་གླིང་གི་ཁེ་ལས་པའི་ཚབ་བྱེད་མི་སྣས་གཏམ་བཤད་གནང་ཞིང་། ཐོན་རྫས་གསར་བ་འགྲེམ་སྤེལ་བྱས་པ་བརྒྱུད་ནས་མ་རྩ་ཁྲི་བཞི་བརྒྱ་ཟིན་པའི་གན་རྒྱ་དྲུག་ལྷག་བཞག
ཐེངས་འདིའི་གསར་སྤེལ་ཚོགས་འདུ་བརྒྱུད་ནས་སྤྱི་ཚོགས་སྟེང་གི་ལས་རིགས་སོ་སོས་དངུལ་རྭ་གྲོང་རྡལ་དབུལ་སྐྱོར་ཐོན་ལས་གླིང་ལ་རྒྱུས་ལོན་གསལ་བོ་བྱུང་བ་མ་ཟད། ཐོན་རྫས་ཀྱི་ཁྱབ་སྒྲོག་ཀྱང་སྔར་ལས་ཇེ་ཆེར་གྱུར། ཚོང་གཉེར་མཁན་སོ་སོས་ཁེ་ལས་མཉམ་འབྲེལ་ལམ་ལུགས་འཐུས་ཚང་ངམ་ཇེ་ལེགས་སུ་གཏོང་རྒྱུ་ནི་ཐོན་ལས་དབུལ་སྐྱོར་ཚད་མཐོ་བའི་སྒོ་ནས་དབུལ་ཐར་བྱེད་དགོས་པའི་རྩ་བའི་ནང་དོན་ཡིན་ལ། གནད་དོན་འདི་ཐག་གཅོད་བྱེད་པའི་གོ་རིམ་ཁྲོད་རྨ་ཆུ་རྫོང་དངུལ་རྭ་གྲོང་རྡལ་གྱིས་གསར་སྐྲུན་དང་འཚོལ་ཞིབ་བྱས་ཏེ་དངུལ་རྭ་གྲོང་རྡལ་གྱི་གནས་བབ་དང་འཕེལ་རྒྱས་ལ་འཚམ་པའི་ལམ་ཁ་གསར་བ་ཞིག་རྙེད་ཡོད་པས། དེ་ནི་བོད་ཁུལ་གྱི་ས་གནས་གཞན་པས་སློབ་སྦྱོང་བྱ་ཡུལ་གྱི་དཔེ་གཞི་གསོན་པོ་ཞིག་ཏུ་གྱུར།
འབྲེལ་ཡོད་འོས་སྦྱོར།
