འཛམ་ཐང་རྫོང་འཛམ་ཐང་སྟོད་མ་ཡུལ་ཚོས་ཕྱུགས་ལས་ཐོན་ལས་གོང་དུ་སྤེལ།

འཛམ་ཐང་རྫོང་འཛམ་ཐང་སྟོད་མ་ཡུལ་ཚོར་རྩྭ་སའི་རྒྱ་ཁྱོན་མུའུ་ཁྲི་47.92 （དེ་ལས་མུའུ་ཁྲི་13དུ་འཚོ་བཀག་བྱས་ཡོད།）ཡོད་པ་དང་། སྤྱིའི་ཁོངས་གཏོགས་ཁུལ་གྱི་རྒྱ་ཁྱོན་གྱི་བརྒྱ་ཆ་68.7ཟིན། ཡུལ་ཚོ་ཡོངས་སུ་སྒོ་ཕྱུགས་36000ལྷག་ཡོད་པ་དང་། བཤས་རར་བཏང་བའི་སྒོ་ཕྱུགས་2000ལྷག་ཡོད་ལ། ཕྱིར་ཚོང་གི་ཁེ་སྤོགས་སྒོར་ཁྲི་1000ལྷག་ཟིན་ཡོད། ཕྱུགས་ལས་ཐོན་ལས་སྟོབས་ཆེར་གཏོང་ཆེད། ཉེ་བའི་ལོ་ཤས་རིང་། འཛམ་ཐང་སྟོད་མ་ཡུལ་ཚོས་བྱ་ཐབས་སྣ་ཚོགས་སྤྱད་དེ་ཕྱུགས་ལས་གོང་དུ་སྤེལ།
ནོར་གནག་འཚོ་སྐྱོང་བྱས། ནོར་གནག་འཚོ་སྐྱོང་མཉམ་ལས་ཁང་གི་ནུས་པ་འདོན་སྤེལ་གང་ལེགས་བྱས་ཏེ་མཉམ་ལས་ཁང་གི་འགན་ཁུར་བའི་ལས་འགན་ཁག་བགོས་ཤིང་། སྲོལ་རྒྱུན་གྱི་འཚོ་སྐྱོང་དང་དེང་རབས་ཅན་གྱི་གཟན་ཆས་གསོ་སྐྱོང་ཟུང་དུ་སྦྲེལ་ནས། མཉམ་ལས་ཁང་གི་གསོ་སྐྱོང་གཞི་ཁྱོན་སྲ་བརྟན་དུ་བཏང་ལ། ད་ལོར། ཡུལ་ཚོ་དེས་རྒྱུད་བཟང་ནོར་གནག་50ལྷག་ཉོས་ཏེ། ནོར་རྒྱུད་ལེགས་སུ་བཏང་བ་དང་ཆབས་ཅིག རྒྱ་ཆེའི་འཚོ་སྐྱོང་ཁྱིམ་ཚང་གི་འཚོ་སྐྱོང་ཆུ་ཚད་མཐོ་རུ་བཏང་ནས་ནོར་གནག་གི་གསོན་ཚད་ཇེ་མཐོར་འགྲོ་བར་འགན་ལེན་བྱས།
ཏང་འཛུགས་སྐྱོང་དང་ཐོན་ལས་ཅན་གྱི་ཐུན་མོང་དཔལ་འབྱོར་སྟོབས་ཆེར་ཕྱིན། དབུལ་སྐྱོར་གནད་འཁེལ་དཔེ་སྟོན་རྣམ་གྲངས་དང་། ཕྱུག་འགྱུར་སྣེ་ཁྲིད་པ། འཚོ་སྐྱོང་ཁྱིམ་ཚང་བཅས་ཀྱི་ནུས་པ་འདོན་སྤེལ་བྱས་ཤིང་། ཀྲི་པུའུ་དང་མཉམ་ལས་ཁང་། གོང་འབུལ་ཁེ་སྤོགས། དབུལ་ཁྱིམ་བཅས་སྦྲེལ་བའི་ཁེ་སྤོགས་བགོ་བཤའི་རྣམ་པ་སྤྱད། ལོ་རེར་ཁེ་སྤོགས་སྒོར་ཁྲི་50ལྷག་གོང་འབུལ་བྱས་པ་དང་། དབུལ་བོ་1169ལ་ལོ་རེར་ཁེ་སྤོགས་སྒོར་480རེ་བགོས།
རོགས་སྐྲུན་དང་རིག་ནུས་ཅན་གྱི་ཕྱིར་འཚོང་བྱེད་ཐབས་རྒྱ་ཆེར་བསྐྱེད། ནུབ་ཕྱོགས་ཀྱི་ནོར་གནག་ཤར་ཕྱོགས་སུ་འཚོ་བ་སོགས་དམིགས་བསལ་གྱི་ཐབས་ལམ་སྤྱད་པ་དང་། ན་མདའ་བཤས་ར་དང་གཅིག་སྡུད་ཕྱིར་ཚོང་ས་ཚིགས་སོགས་དང་འབྲེལ་ནས་དྲྭ་ཐོག་ཚོང་དོན་ལས་སྟེགས་བཙུགས་ནས་ཕྱི་ལ་བཙོང་།
ནུས་པ་མཐོར་གཏོང་དང་ཞིབ་ལས་ཅན་གྱི་ཤེས་ལྡན་མི་སྣ་གསོ་སྐྱོང་བྱས། གྲོང་སྡེ་སོ་སོ་རུ་འདོད་མོས་དང་ཤེས་ཡོན་ཅན། འགན་ཁུར་ཕོད་པ་བཅས་ཀྱི་ན་གཞོན་ཤེས་ལྡན་པ་2ནས་5ཙམ་བདམས་ནས། ཐོན་རྫས་ཕྱིར་འཚོང་དང་ལག་རྩལ་ཁྲིད་སྟོན་བཅས་ཀྱི་འགན་ཁུར་བ་བྱས་སོ། །