༄༅།།འབྱོར་ཕྱུག་ལམ་ཆེན་དུ་སྐྱོད་པའི་སྲོལ་རྒྱུན་བོད་ལྷམ་གྱི་རྡོག་སྒྲ།
རྩོམ་པ་པོ།：མི་གསལ།
ཡོང་ཁུངས།：འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས།
དུས་ཚོད།：2020-12-03
ཀློག་གྲངས།：
ཀུང་སིའི་སྤྱི་གཉེར་བ་པདྨ་རིག་འཛིན་ལགས།ལྕང་སྐྱ་སྡེ་བ་ལ་ཟློས་གར་གྱི་ཕ་ས་དང་བོད་ལྷམ་གྱི་ཕ་ས་ཞེས་པའི་མཚན་སྙན་ལྡན་ལ། གནའ་ནས་བཟུང་བོད་ལྷམ་བཟོ་བའི་སྲོལ་རྒྱུན་ཡོད་པས་ད་ལྟའི་བར་དུ་ལོ་ངོ600ལྷག་གི་ལོ་རྒྱུས་ལྡན། མདོ་སྨད་ཕྱོགས་ནས་མིང་དུ་གྲགས་པའི་བོད་ལྷམ་བཟོ་བའི་སྡེ་བ་ཞིག་ཡིན། ལྕང་སྐྱ་སྡེ་བས་བཟོས་པའི་སྲོལ་རྒྱུན་བོད་ལྷམ་ལ་རྐང་བར་ཡང་ཞིང་བདེ་ལ་དྲོ་བ་དང་། བརླན་འགོག་པ། བཀོལ་ཡུན་རིང་བ་སོགས་ཀྱི་ཁྱད་ཆོས་ལྡན་ལ། ལག་བཟོ་རྐྱང་བ་ལ་བརྟེན་པ་ཡིན་པས་མི་རྣམས་ཀྱི་དགའ་བསུ་ཚད་མེད་ཐོབ་བཞིན་ཡོད། མཚོ་སྔོན་དང་ཀན་སུའུ། བོད་ལྗོངས། སི་ཁྲོན། ཡུན་ནན་སོགས་ཀྱི་ས་གནས་སུ་སྙན་གྲགས་ཆེ།
ལས་བཟོ་བས་བོད་ལྷམ་བཟོ་བཞིན་པ།ལག་ཤེས་རྐྱང་རྐྱང་ལ་བརྟེན་ནས་བཟོས་པའི་བོད་ལྷམ་ཞིག་བཟོ་བར་དུས་ཡུན་ཟླ་གཅིག་ལྷག་དགོས་པ་དང་། སྔོན་ཆད་སྟོན་བསྡུས་ཚར་རྗེས་སྡེ་བའི་ནང་གི་དུད་ཁྱིམ་རེ་རེས་ལྷམ་བཟོ་བའི་ལས་ལ་བྲེལ་ཞིང་། ལྷམ་བཟོས་ཚར་རྗེས་རྒན་པ་རྣམས་ཉེ་འགྲམ་གྱི་ས་ཁུལ་དུ་ལྷམ་འཚོང་བར་འགྲོ་དགོས། འོན་ཀྱང་། ལོ་འདི་འགར་ཚོང་ལས་དཔལ་འབྱོར་འཕེལ་རྒྱས་བྱུང་བ་དང་བསམ་བློ་འདུ་ཤེས་འགྱུར་ལྡོག་བྱུང་བས། སྲོལ་རྒྱུན་གྱི་ལག་ཤེས་བཟོ་རྩལ་འདི་རིམ་གྱིས་ཉམས་པ་རེད།
བཟོ་ཁང་དུ་བཤམས་པའི་བོད་ལྷམ་སྣ་ཚོགས།པདྨ་རིག་འཛིན་ནི་ལྕང་སྐྱ་སྡེ་བ་ནས་ནར་སོན་པའི་ན་གཞོན་ཞིག་ཡིན་ལ། མཚོ་སྔོན་དགེ་ཐོན་སློབ་གྲྭ་ཆེན་མོ་དང་པེ་ཅིང་རང་བྱུང་དང་བཟོ་སྐྲུན་རིག་པའི་སློབ་ཆེན། པེ་ཅིང་ཕྱི་རྒྱལ་སྐད་ཡིག་སློབ་ཆེན་སོགས་སུ་སློབ་གཉེར་དང་གསོ་སྦྱོང་བྱས་མྱོང་། སློབ་མཐར་ཕྱིན་རྗེས་རེབ་གོང་ནས་བོད་ཟས་ཀྱི་ཚོང་གཉེར་བྱས། ཚོང་ལས་ཉིན་རེ་བཞིན་ཡར་རྒྱས་གོང་འཕེལ་འགྲོ་བཞིན་པའི་སྒང་ལ་ཁོས་ཚོང་བསྐྱུར་ཏེ་བོད་ལྷམ་ཀུང་སི་འཛུགས་པའི་ལས་ལ་ཞུགས། ཀུང་སི་འཛུགས་པའི་ལས་རིམ་ཁྲོད་སྡེ་བའི་རྒན་གྲས་དག་གིས་ཁོང་ལ་རྒྱབ་སྐྱོར་ཆེན་པོ་བྱས། ཉམས་མྱོང་ཡོད་མཁན་དང་ལག་རྩལ་ཤེས་མཁན་རྣམས་ཁོའི་ཀུང་སིར་ཞུགས་ནས་སྲོལ་རྒྱུན་ལག་རྩལ་རྒྱུན་འཛིན་དང་དར་སྤེལ་ཐད་རང་ནུས་ཅི་ལྕོགས་ཀྱིས་ནུས་པ་བཏོན་ལ། རྒན་པ་རྣམས་ཀྱིས་ལོ་ཆུང་ཁྲིད་སྟོན་དང་གསོ་སྐྱོང་བྱེད་པ་དང་། ཐོན་སྐྱེད་དང་སློབ་སྦྱོང་། ཞིབ་འཇུག གསར་སྤེལ་བཅས་ཀྱི་རྣམ་པ་བརྒྱུད་དེ་ཀུང་སི་གཉེར་མགོ་བརྩམས།
བོད་ལྷམ་བཟོ་བྱེད་ཀྱི་རྒྱུ་ཆ།ཉིན་ཕྱེད་ཀྱི་དུས་ཚོད་ནང་གསར་འགོད་པ་ལྕང་སྐྱ་སྡེ་བའི་བོད་ལྷམ་རིག་གནས་ལ་ཤེས་རྟོགས་དང་རྒྱུས་ལོན་ཅུང་ཙམ་བྱུང་། ད་སྐབས་ཏང་དང་སྲིད་གཞུང་གིས་སྲོལ་རྒྱུན་རིག་གནས་ལ་གཙིགས་མཐོང་ཆེན་པོ་བྱས་ཏེ་རོགས་སྐྱོར་སྲིད་ཇུས་སྣ་ཚོགས་བཏོན་ཡོད་པས། ཕན་ཡོད་སྲིད་ཇུས་སྣ་ཚོགས་ཀྱི་ཁྲིད་སྟོན་འོག ལག་རྩལ་འདི་རྒྱུན་འཛིན་དང་དར་སྤེལ་བཏང་སྟེ། སྡེ་མི་རྣམས་དབུལ་ཐར་དང་ཕྱུག་འགྱུར་ཕྱོགས་སུ་སྐྱོད་བཞིན་ཡོད་པས་དངོས་གནས་དགའ་འོས་པ་ཞིག་རེད།
འབྲེལ་ཡོད་འོས་སྦྱོར།
