༄༅།།འབྲུག་མོའི་ན་ཇ་རྟགས་ཅན་གྱི་མགོ་ལོག་རྨ་སྟོད་བོད་ཇ་ལ་འཛམ་གླིང་ཆེན་མོའི་ཇི་ཉི་སི་ཟིན་ཐོའི་དཔང་ཡིག་ཐོབ།

      ཐེངས་འདིའི་མཛད་སྒོའི་སྟེང་ཧྲང་ཧེ་འཛམ་གླིང་ཆེན་མོའི་ཇི་ཉི་སིའི་ཀུང་ཟིའི་སྤྱི་གཉེར་བ་གཞོན་པ་ཀོ་བུན་དང་སྐུ་མགྲོན་བརྒྱ་ལྷག་ཞུགས་ཏེ་ཇ་ཡི་རིག་གནས་ལ་ཞིབ་འཇུག་དང་བགྲོ་གླེང་རྒྱ་ཆེར་སྤེལ།
      སྤྱི་གཉེར་ཁང་འདིས་ལོ་ངོ་གང་མང་རིང་མི་རིགས་ཁྱད་ལྡན་ཐོན་རྫས་གསར་སྤེལ་ལ་ཞིབ་འཇུག་དང་ཐོན་སྐྱེད་ལ་ཤུགས་སྣོན་བྱས་ཏེ། ད་ལྟ་མཐོ་སྒང་ཐོན་རྫས་ཀྱི་ཁྱད་ཆོས་འབུར་དུ་ཐོན་པའི་བོད་ཇའི་ཚོང་རྟགས་ཏེ། ༼འབྲུག་མོའི་ན་ཇ༽ཞེས་པའི་ཚོང་རྟགས་གསར་གཏོད་བྱས། མགོ་ལོག་གི་ན་གཞོན་ཁེ་ལས་པ་དང་སྤྱི་གཉེར་ཁང་འདིའི་སྤྱི་གཉེར་བ་བསྟན་པས་ས་གནས་ཀྱི་རྒན་པ་ཚོར་བཅར་འདྲི་དང་ཞིབ་འཇུག་གང་མང་བྱས་མཐར། སྔོན་ཆད་ཕ་ཡུལ་རྨ་སྟོད་དུའང་ཇ་ཡི་ནུས་ཁུངས་ཕུན་སུམ་ཚོགས་ཤིང་ཇ་ཡི་རིག་གནས་ཤིན་ཏུ་དར་བས་ཁོ་ལ༼འབྲུག་མོའི་ན་ཇ༽གསར་གཏོད་བྱེད་པའི་ཀུན་སློང་དང་བསམ་བློ་ཐོག་མ་བྱུང་།
      ཁོས་ཡང་བསྐྱར་ས་གནས་ཀྱི་བོད་ཇ་བཟོ་བའི་ལག་རྩལ་སླར་གསོ་བྱ་ཆེད། ལོ་ངོ་ལྔ་རིང་ཡུན་ནན་དང་སི་ཁྲོན། ཧྥུ་ཅན་སོགས་ཇ་ཐོན་སྐྱེད་བྱེད་པའི་ས་གནས་གྲགས་ཅན་ཁག་ཏུ་ཕྱིན་ཏེ་ཆེད་མཁས་པའི་ཇ་བཟོའི་ལག་རྩལ་ལ་སློབ་སྦྱོང་བྱས་ཤིང་། ཇ་ཡི་རིག་གནས་ལ་ཞིབ་འཇུག་གང་མང་བྱས་མཐར་རྨ་འབྲི་རྫ་གསུམ་གྱི་མགོ་ཁུངས་ནས་འབྲུག་མོའི་ན་ཇ་དངོས་སུ་གསར་གཏོད་བྱས་ཐུབ་པ་བྱུང་། མིག་སྔར་ཆེད་ལས་ལས་ཁུངས་མང་པོའི་བརྟག་དཔྱད་བྱས་པ་བརྒྱུད་འབྲུག་མོའི་ན་ཇ་ཡི་ཇ་འབྲི་རེ་རེའི་གསེང་ན་ཐུན་མིན་གྱི་འཚོ་བཅུད་དང་གྲུབ་ཆ་མང་པོ་ཡོད་ལ་ཇ་འདིས་ལུས་ཕུང་བདེ་ཐང་གི་ཕྱོགས་ལའང་སྔར་མེད་ཀྱི་ཕན་ནུས་གལ་ཆེན་ཐོན་བཞིན་ཡོད་ཟེར།
      2020ལོའི་ཟླ་བཅུ་གཉིས་པའི་ཚེས་བཞི་ཉིན་ཇ་འདི་ལ་འཛམ་གླིང་ཆེན་མོའི་ཇི་ཉི་སི་ཟིན་ཐོ་ལས་བརྒལ་ཏེ། ས་བབ་ཆེས་མཐོ་བའི་ཇ་ཡི་བཟོ་གྲྭ་ལ་བདམས་ཐོན་བྱུང་། 1992ལོར་འཛམ་གླིང་ཆེན་མོའི་ཇི་ཉི་སི་ཟིན་ཐོ་བྱུང་བ་ནས་ད་ལྟའི་བར་རྣམ་གྲངས་མི་འདྲ་བ་ལྔ་སྟོང་སུམ་བརྒྱ་ལྷག་བྱུང་ཞིང་། ཟིན་ཐོ་འདི་དག་གིས་ཀྲུང་གོའི་གསར་གཏོད་ཀྱི་ལམ་ཁ་ལ་སྔར་མེད་ཀྱི་རྨང་རྡོ་བརྟན་པོ་ཞིག་བཏིང་ཡོད།
      ཐེངས་འདིར་འབྲུག་མོའི་ན་ཇ་བཟོ་གྲྭ་ནི་ས་བབ་ཆེས་མཐོ་བའི་ཇ་ཡི་བཟོ་གྲྭ་ལ་བདམས་ཐོན་བྱུང་བ་བརྒྱུད་རྨ་སྟོད་ཀྱི་ཚོང་རྟགས་གྲགས་ཅན་འདི་ཉིད་སྔར་ལས་ལྷག་པའི་རྒྱ་བསྐྱེད་གཏོང་བར་སྐུལ་འདེད་དང་ །  རིག་གནས་དང་ཐོན་ལས་མཉམ་བསྲེས་སྒོས་དཔལ་འབྱོར་འཕེལ་རྒྱས་ཀྱི་ལམ་ཁར་བསྐྱོད་པ་ནི་ཁེ་ལས་ཀྱི་ཆེས་ཐོག་མའི་རྨང་གཞི་དང་རྐང་འཛུགས་ས་ཡིན་ལ། དེ་མ་ཟད་གསར་དུ་བྱུང་མ་ཐག་པའི་ན་ཇ་རྟགས་ཅན་གྱི་བོད་ཇ་ཞིག་རྨ་འབྲི་རྫ་གསུམ་གྱི་མགོ་ཁུངས་ནས་འཛམ་གླིང་ལ་བསྐྱོད་པའི་ཐོག་མའི་སྟ་གོན་འདི་ནི། ཁྱད་ལྡན་ཐོན་རྫས་ཤིག་གི་བླ་ན་མེད་པའི་འབྲས་རྟགས་ཤིག་ཡིན་པའང་སྨོས་མ་དགོས་སོ།