ནག་ཆུ་གྲོང་ཁྱེར་ཞིང་ཕྱུགས་ཐོན་རྫས་འགྲེམ་འཚོང་སྐབས་བཅོ་ལྔ་བ་བདེ་ལེགས་ངང་མཇུག་བསྡུས།

        གསེར་རྙེད་ཆུས་ཀྱི་ཞིང་ཕྱུགས་ཐོན་རྫས་དང་ལག་ཤེས་ཐོན་རྫས་ཟོང་རྟགས་ཅན་ཕྱི་ཕྱོགས་སུ་འོས་སྦྱོར་བྱས་ནས་ཚོང་ལམ་རྒྱ་བསྐྱེད་དང་། རོང་འབྲོག་མང་ཚོགས་ཀྱི་ཡོང་འབབ་འཕར་སྣོན། ས་གནས་ཀྱི་ཡུན་རིང་འཕེལ་རྒྱས་ལ་རྒྱབ་སྐྱོར་བྱ་ཆེད། གསེར་རྙེད་ཆུས་མི་དམངས་སྲིད་གཞུང་དང་གསེར་རྙེད་ཆུས་ཞིང་ལས་ཞིང་སྡེ་ཅུད་གཉིས་ཀྱིས་ནག་ཆུ་གྲོང་ཁྱེར་ཞིང་ཕྱུགས་ཐོན་རྫས་འགྲེམ་ཚོང་སྐབས་བཅོ་ལྔ་བའི་གོ་སྐབས་དང་བསྟུན་ནས་སྤྱི་ཟླ12པའི་ཚེས11ཉིན་ནས་ཚེས14བར་བསྟུན་མར་ཉིན་ལྔའི་རིང་ལ་ནག་ཆུ་གྲོང་ཁྱེར་ནས་ཞིང་ཕྱུགས་ཐོན་རྫས་འགྲེམ་འཚོང་བྱེད་སྒོ་སྤེལ།

        ཐེངས་འདིའི་བྱེད་སྒོར༼སྤྲིན་སྟེང་འབྲོག་ར། སྤུས་ལེགས་གསེར་རྙེད།༽ཞེས་པ་བརྗོད་དོན་དུ་བྱས་ནས་ནག་ཆུའི་ཁྱད་ཆོས་ལྡན་ལ་སྤུས་ཀ་ལེགས་པའི་ཐོན་རྫས་གཙོ་བོར་བྱས་ནས་ཆུས་ཡོངས་ཀྱི་ཞིང་ཕྱུགས་ཐོན་རྫས་ཟོང་རྟགས་ཅན་དང་ཕྱུགས་ལས་ཐོན་ཁུངས་འོས་སྦྱོར་སྒོས་གསེར་རྙེད་ཆུས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་དང་། རོང་འབྲོག་ཐོན་རྫས་ལེགས་བསྒྱུར། ཁྲོམ་རའི་དགོས་མཁོར་ཕྱོགས་པ། འཛད་སྤྱོད་པའི་སེམས་འདུན་དང་འཚམ་པ། བཀོལ་སྤྱོད་སྟབས་བདེ་བ། བེད་སྤྱོད་རིན་ཐང་ཆེ་བ་བཅས་ཕྱོགས་ཡོངས་ཀྱི་སྤུས་ཚད་མཐོར་འདེགས་བྱེད་པར་བརྩོན་ལེན་བྱས།

        འགྲེམ་ཚོགས་སྟེང་དུ་གསེར་རྙེད་ཆུས་ཀྱི་ཤང་གྲོང་12ནས་ཐོན་པའི་མཉམ་ལས་ཁང་དང་ཁེ་ལས་དག་གིས་ནག་ཆུའི་སྐམ་ཤ། ནང་ཁྲོལ། དབྱར་རྩྭ་དགུན་འབུ། མར་ཕྱུར། ལག་ཤེས་ཐོན་རྫས་སོགས་གསེར་རྙེད་ཆུས་ཀྱི་སྤུས་ལེགས་ཐོན་རྫས་སྣ་ཚོགས་དང་། རོང་འབྲོག་མང་ཚོགས་ཀྱི་བློ་གྲོས་དང་ལག་ཤེས་ལས་ཐོན་པའི་ངལ་རྩོལ་འབྲས་བུ་དག་འགྲེམ་ཚོང་དང་འོས་སྦྱོར་བྱས་པ་བརྒྱུད་ནས་སྒོར་ཁྲི་ལྔ་སྟོང་ལྷག་གི་ཚོང་བྲིན་བྱུང་ངོ་། །