དཔལ་ཁ་གྲོང་རྡལ་ཁྱུང་སེང་སྡེ་བའི་ཁྱད་ལྡན་ཐོན་ལས་ཀྱིས་གྲོང་གསེབ་དར་སྤེལ་གྱི“གསེར་གྱི་མིང་བྱང”བསྐྲུན།

        སྟོན་ཟླ་བཅུ་པར་ཞིང་ས་ཡོད་ཚད་གསེར་མདོག་གིས་བརྒྱན་ཡོད་པ་དང་། བྲག་དཀར་རྫོང་དཔལ་ཁ་གྲོང་རྡལ་ཁྱུང་སེང་སྡེ་བའི་སྡེ་དམངས་ཡོངས་བྲེལ་འཚུབ་ཀྱིས་ཁེངས་ཤིང་། ལོ་ཏོག་བསྡུ་བ་དང་ཉི་མར་སྐེམ་པ། གསོག་ཉར་བྱེད་པ། ལས་སྣོན་བྱེད་པ་བཅས་ཀྱི་བྱ་བ་གོ་རིམ་ལྡན་པའི་ངང་བསྒྲུབས་ཏེ་ལོ་ལེགས་ཀྱི་རྣམ་པ་གསལ་བོར་མངོན།         སྡེ་བའི་འགྱུར་ལྡོག་སྡེ་དམངས་ཡོངས་ཀྱིས་མངོན་གསལ་གྱིས་མཐོང་ཐུབ་པ་དང་། སྡེ་དམངས་རྣམས་ཀྱི་ཕྱིའི་རྣམ་འགྱུར་ལའང་འགྱུར་ལྡོག་ཆེན་པོ་བྱུང་སྟེ་ཚང་མས་གདོང་ལ་དགའ་སྤྲོའི་འཛུམ་མདངས་མངོན་ཞིང་མ་འོངས་པའི་འཚོ་བར་རེ་བས་ཁེངས། “དཔལ་ཁ་གྲོང་རྡལ་ནི་རྒྱལ་ཡོངས་ཀྱི་ཐོན་ལས་སྟོབས་ཆེའི་གྲོང་རྡལ་ཡིན་པས་གོ་སྐབས་དང་འགྲན་རྩོད་གཉིས་ཀ་ཡོད། “ང་ཚོས‘ཏང་ཨུས་གཙོ་ཁྲིད་བྱེད་པ་དང་ཀྲི་པུའུ་ཡིས་སྣེ་ཁྲིད་བྱེད་པ། མཉམ་ལས་ཁང་གིས་སྟོབས་ཤུགས་སྒྲིལ་བ། ཐོན་ཁུངས་གཅིག་སྡུད་བྱེད་པ། ཐོན་ལས་སྟོབས་ཆེན་དུ་གཏོང་བ། མཉམ་དུ་འཕེལ་རྒྱས་སུ་འགྲོ་བ་དང་རྒྱལ་ཁ་ལེན་པའི’སྤྱིའི་བསམ་ཕྱོགས་ལྟར། ཐོན་ཁུངས་ཀྱི་ལེགས་ཆ་རྨང་གཞིར་བཟུང་སྟེ་རང་ས་གནས་དང་འཚམ་པའི་འཕེལ་རྒྱས་ཀྱི་ལམ་ཕྱོགས་གཏོད་པ་དང་། སྐྱེ་ཁམས་སྐྱེ་ལྡན་ཞིང་ཕྱུགས་ལས་དང་ནུས་ཁུངས་གཙང་མ། ཡུལ་སྐོར་ཐོན་ལས་སོགས་འཕེལ་རྒྱས་སུ་གཏོང་བ། སྐྱེ་ཁམས་ཁོར་ཡུག་དང་རྨང་གཞིའི་སྒྲིག་བཀོད་ཀྱི་ཞན་ཆ་ཁ་གསབ་བྱེད་པ། གཞི་རིམ་ཏང་རྩ་འཛུགས་ཀྱི་ཆབ་སྲིད་ཀྱི་ནུས་པ་མུ་མཐུད་དུ་ཇེ་མཐོར་གཏོང་བ། ལས་བྱེད་པ་དང་མང་ཚོགས་ཀྱི་ནང་སྐྱེས་སྒུལ་ཤུགས་ཇེ་ཆེར་གཏོང་བ་སོགས་ཀྱི་ཕྱོགས་ལ་ཤུགས་བསྣན་ཏེ་དཔལ་ཁའི་འཕེལ་རྒྱས་ཀྱི་ཚ་རླབས་གསར་པ་ཞིག་འཕྱུར་རྒྱུ་བརྩོན་ལེན་བྱ་རྒྱུ་ཡིན”ཞེས་དཔལ་ཁ་གྲོང་རྡལ་གྱི་ཏང་ཨུའི་ཧྲུའུ་ཅི་མགོན་པོ་རྒྱལ་གྱིས་བཤད།
        ནམ་མཁའ་སྔོ་ཞིང་གཡའ་དག་ལ་བསིལ་འཇམ་གྱི་རླུང་བུ་དལ་གྱིས་གཡུག་པའི་སྟོན་ཟླ་འདིར། དཔལ་ཁ་གྲོང་རྡལ་གྱི་ཁོར་ཡུག་ཀུན་ནི་རི་མོ་མཁན་གྱི་སྨྱུག་རྩེ་ནས་ཐོན་པའི་མཛེས་སྡུག་ལྡན་པའི་ཡུལ་ལྗོངས་ཀྱི་ཚོན་རིས་ཤིག་དང་འདྲ་ཞིང་། རོང་འབྲོག་མང་ཚོགས་གྲོང་གསེབ་དར་སྤེལ་གྱི་རྗེས་སུ་འབྲངས་ཏེ་མ་འོངས་བའི་འཚོ་བར་རེ་བས་ཁེངས།