ལིས་ཀང་དང་ཀརྨ་ཕུན་ཚོགས་གཉིས་ཀྲུའུ་ཁྲང་པོ་དང་ཐུག་འཕྲད་གནང་བ།

        ཟླ7པའི་ཚེས6ཉིན། ཁུལ་ཨུའི་ཧྲུའུ་ཅི་ལིས་ཀང་དང་ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀརྨ་ཕུན་ཚོགས་གཉིས་ཀྱིས་ཀྲུའུ་གོའི་མཉམ་འགུལ་མཚོ་སྔོན་ཡན་ལག་ཀུང་ཟིའི་ཏང་ཨུའི་ཧྲུའུ་ཅིའམ་སྤྱི་གཉེར་བ་ཀྲུའུ་ཁྲང་པོ་འཁོར་དང་བཅས་པར་ཐུག་འཕྲད་གནང་། ཕྱོགས་གཉིས་ཀས5Gརིག་ལྡན་གྲོང་ཁྱེར་དང་། མཐོ་སྒང་མཛེས་སྡུག་ལྡན་པའི་གྲོང་ཁྱེར་དང་གྲོང་རྡལ་འཛུགས་སྐྲུན་ཐད་གྲོས་མཐུན་བཞག་པ་དང་། ཐེངས་འདིའི་མཉམ་ལས་ནང་གཙོ་བོ་མཚོ་ལྷོ་ཁུལ་དང་ཁོངས་གཏོགས་རྫོང་སོ་སོའི་གྲངས་འཛིན་ཆ་འཕྲིན་གྱི་རྨང་གཞིའི་སྒྲིག་བཀོད་དང་རྨང་གཞིའི་ཆ་འཕྲིན་མཛོད་འཛུགས་སྐྲུན་ལ་ཤུགས་སྣོན་བྱས་ནས། ཆ་འཕྲིན་བདེ་འཇགས་འགན་ལེན་བྱེད་ཤུགས་ཆེ་རུ་གཏོང་བ་དང་ཆ་འཕྲིན་ཐོན་ཁུངས་སྔོག་འདོན་དང་བེད་སྤྱོད་གཏིང་ཟབ་བྱས་ཏེ། ཆ་འཕྲིན་ཞབས་ཞུའི་ཐོན་རྫས་ཞིབ་འཇུག་གསར་སྤེལ་ཐད་ཤུགས་སྣོན་བྱེད་པ་དང་། ཆ་འཕྲིན་ཅན་གྱི་ལག་རྩལ་ལ་བརྟེན་ནས་ཞིང་ཆེན་ཡོངས་ཀྱི་གྲངས་འཛིན་ཐོན་ལས་ཅན་དང་ཐོན་ལས་གྲངས་འཛིན་ཅན་དུ་འགྱུར་བའི་རིགས་སྒྱུར་རིམ་སྤར་ལ་སྐུལ་འདེད་བཏང་།