ཞི་ཅིན་ཕིང་གིས“དུས་རབས་གསར་པར་འབད་པས་བསྐྱོད”ཅེས་པའི་བརྗོད་དོན་གྲུབ་འབྲས་འགྲེམ་སྟོན་ལ་གཟིགས་སྐོར་གནང་སྐབས་ནན་གྱིས་བསྟན་དོན།

        ཏང་གི་ཚོགས་ཆེན་ཉི་ཤུ་པ་འཚོགས་ལ་ཉེ་བའི་སྐབས་འདིར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅིའམ་རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་ཚེས27ཉིན་པེ་ཅིན་འགྲེམ་སྟོན་ཁང་དུ་ཕེབས་ཏེ། “དུས་རབས་གསར་པར་འབད་པས་བསྐྱོད”ཅེས་པའི་བརྗོད་དོན་གྲུབ་འབྲས་འགྲེམ་སྟོན་ལ་གཟིགས་སྐོར་གནང་། ཁོང་གིས་ནན་གྱིས་བསྟན་དོན། ཏང་གི་ཚོགས་ཆེན་བཅོ་བརྒྱད་པའི་ཚུན་དུ། ཏང་ཀྲུང་དབྱང་གིས་ཏང་ཡོངས་དང་རྒྱལ་ཡོངས་ཀྱི་རིགས་སོ་སོའི་མི་དམངས་ལ་མཐུན་སྒྲིལ་དང་སྣེ་ཁྲིད་དེ། ཡུན་རིང་ལ་ཐག་མ་ཆོད་པའི་དཀའ་གནད་མང་པོ་བསལ་ཞིང་། ཕུགས་ཡུན་རིང་བའི་དོན་དག་གལ་ཆེན་མང་པོ་བསྒྲུབས་ལ། ཆབ་སྲིད་དང་དཔལ་འབྱོར། འདུ་ཤེས་འཛིན་སྟངས། རང་བྱུང་ཁམས་སོགས་ཀྱི་ཉེན་ཁའི་འགྲན་སློང་དང་ཉམས་སད་ཐེག་པར་བྱས་པ་དང་། ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་བླངས་པ་དང་ལོ་རྒྱུས་རང་བཞིན་གྱི་འཕོ་འགྱུར་འབྱུང་དུ་བཅུག་སྟེ། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་ཡོང་བར་སྔར་ལས་འཐུས་ཚང་བའི་ལམ་ལུགས་འགན་སྲུང་དང་སྔར་ལས་བརྟན་པའི་དངོས་པོའི་རྨང་གཞི། སྔར་ལས་རང་འགུལ་གྱི་བསམ་པའི་སྟོབས་ཤུགས་བཅས་འདོན་སྤྲོད་བྱས། ལོ་ངོ10ཡི་རིང་གི་འཐབ་ཇུས་རང་བཞིན་གྱི་བྱེད་ཐབས་དང་འཕོ་འགྱུར་རང་བཞིན་གྱི་ལག་ལེན། ཐོད་བརྒལ་རང་བཞིན་གྱི་འཕེལ་ཚད། མཚོན་བྱེད་རང་བཞིན་གྱི་གྲུབ་འབྲས་བཅས་རྒྱ་ཆེར་དྲིལ་སྒྲོག་བྱེད་དགོས་པ་དང་། ལོ་ངོ10ཡི་རིང་གི་རླབས་ཆེའི་འགྱུར་ལྡོག་ནི་ཏང་གི་ལོ་རྒྱུས་དང་ཀྲུང་གོ་གསར་པའི་ལོ་རྒྱུས། བཅོས་བསྒྱུར་སྒོ་འབྱེད་ཀྱི་ལོ་རྒྱུས། སྤྱི་ཚོགས་རིང་ལུགས་ཀྱི་འཕེལ་རྒྱས་ལོ་རྒྱུས་དང་ཀྲུང་ཧྭ་མི་རིགས་ཀྱི་འཕེལ་རྒྱས་ལོ་རྒྱུས་བཅས་ཀྱི་སྟེང་ལམ་ཚད་རྡོ་རིང་ལྟ་བུའི་དོན་སྙིང་ལྡན་པ་དྲིལ་སྒྲོག་བྱེད་པ་དང་། ཏང་ཡོངས་དང་རྒྱལ་ཡོངས་རིགས་སོ་སོའི་མི་དམངས་ཀྱིས་ལོ་རྒྱུས་རང་རྟོན་བརྟན་པར་བྱེད་པ་དང་ལོ་རྒྱུས་རང་འགུལ་ཇེ་དྲག་ཏུ་གཏོང་བར་སྐུལ་སློང་བྱས་ཏེ། ངར་སེམས་ཆེར་སྐྱེད་དང་དཔའ་ངར་མདུན་སྐྱོད། མཐུན་སྒྲིལ་འབད་བརྩོན་བཅས་བྱས་ནས། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་བསྐྲུན་པའི་ལེའུ་གསར་པ་བྲིས་ནས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རྒྱལ་ཁ་གསར་པ་ལེན་དགོས།
        ལི་ཁེ་ཆང་དང་ལི་ཀྲན་ཧྲུའུ། ཝང་དབྱང་། ཝང་ཧུའུ་ཉིང་། ཀྲའོ་ལེ་ཅི། ཧན་ཀྲེང་བཅས་ཀྱིས་འགྲེམ་སྟོན་ཁང་ལ་གཟིགས་སྐོར་གནང་།         སྤྱི་པའི་རྒྱལ་ཁབ་ཀྱི་བདེ་འཇགས་ལྟ་བའི་ནང་དོན་ཟབ་མོ་དང་ཏང་ནང་གི་ཁྲིམས་སྲོལ་ལམ་ལུགས་འཛུགས་སྐྲུན་གྱི་གྲུབ་འབྲས་མངོན་པའི་འགྲེམ་པང་དང་དངོས་རྫས། པེ་ཅིན་དང་ཐེན་ཅིན། ཧོ་པེ་བཅས་མཐུན་སྦྱོར་ངང་འཕེལ་རྒྱས་བྱུང་བའི་གྲུབ་འབྲས་གསལ་པོར་མཚོན་པའི་ལངས་གཟུགས་གློག་རྡུལ་ས་ཁྲ་དང་། འཆར་འགོད་འཛུགས་སྐྲུན་དང་བགྲོད་ལམ་འགྲིམ་འགྲུལ། ཚན་རྩལ་གསར་སྐྲུན་སོགས་ཀྱི་ཕྱོགས་སུ་བླངས་པའི་གྲུབ་འབྲས་གཙོ་བོ་སྟེ།ཀོང་ཏུང་དང་ཞང་ཀང་། ཨའོ་མོན་བཅས་ཀྱི་མཚོ་འགག་ཆེན་མོའི་ས་བབ་མཚོན་བྱེད་ཀྱི་གཞོང་པ་སོགས་དངོས་རྫས་དང་འདྲ་དཔེ་རེ་རེ། དེ་མིན་གསོན་ཉམས་ལྡན་པའི་བརྙན་རིས་རེ་རེ་དང་འདྲ་པར། དཔེ་རིས་རེ་རེ་བཅས་ཀྱིས་ཞི་ཅིན་ཕིང་སོགས་མགོ་ཁྲིད་བློ་མཐུན་རྣམས་ཀྱི་མིག་དབང་འཕྲོག་པར་བྱས། ཁོང་ཚོས་སྐབས་སྐབས་སུ་ཕེབས་མཚམས་བཞག་ནས་གཟིགས་པ་དང་འགྲེལ་བཤད་ལ་གསན་ཞིང་། འབྲེལ་ཡོད་གནས་ཚུལ་འདྲི་བར་བྱེད།
        པེ་ཅིན་དུ་ཡོད་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་ནམ་ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ། རྒྱལ་སྲིད་ཨུ་ཡོན། ཆེས་མཐོའི་མི་དམངས་ཁྲིམས་ཁང་གི་ཁྲིམས་དཔོན། ཆེས་མཐོའི་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་དེ་མིན་ཀྲུང་དབྱང་དམག་ཨུའི་ཨུ་ཡོན་སོགས་ཀྱིས་འགྲེམ་སྟོན་ལ་གཟིགས་སྐོར་གནང་།