ཞི་ཅིན་ཕིང་དང་ཨ་རིའི་ཙུང་ཐུང་པའེ་ཏེང་གཉིས་པ་ལི་གླིང་ཕྲན་དུ་མཇལ་མོལ་གནང་།

       ཞི་ཅིན་ཕིང་གིས་ཐའེ་ཝན་གནད་དོན་གྱི་འབྱུང་ཁུངས་དང་ཀྲུང་གོའི་ཕྱོགས་ཀྱི་རྩ་དོན་དང་ལངས་ཕྱོགས་གོ་རིམ་ལྡན་པའི་ངང་ཞིབ་མོར་གསུངས། ཞི་ཅིན་ཕིང་གིས་ནན་གྱིས་བསྟན་དོན། ཐའེ་ཝན་གནད་དོན་ནི་ཀྲུང་གོའི་སྲོག་ཤིང་ཁེ་ཕན་ཁྲོད་ཀྱི་སྲོག་ཤིང་ཡིན་པ་དང་། ཀྲུང་ཨའི་འབྲེལ་བའི་ཆབ་སྲིད་རྨང་གཞིའི་ཁྲོད་ཀྱི་རྨང་གཞི་ཡིན་ལ། ཀྲུང་ཨའི་འབྲེལ་བའི་ཁྲོད་ཀྱི་བརྒལ་མི་ཆོག་པའི་དམར་ཐིག་དང་པོ་ཡིན། ཐའེ་ཝན་གྱི་གནད་དོན་ཐག་གཅོད་པ་ནི་ཀྲུང་གོ་པ་རང་གི་དོན་དག་ཡིན་ལ། ཀྲུང་གོའི་ནང་སྲིད་ཡིན། མེས་རྒྱལ་གཅིག་གྱུར་དང་མངའ་ཁོངས་ཆ་ཚང་ལ་སྲུང་སྐྱོང་བྱེད་རྒྱུ་ནི། ཀྲུང་གོ་མི་དམངས་དང་ཀྲུང་ཧྭ་མི་རིགས་ཀྱི་ཐུན་མོང་གི་རེ་འདུན་ཡིན། སུ་ཞིག་གིས་ཐའེ་ཝན་ཀྲུང་གོ་ནས་ཁ་བྲལ་དུ་བཅུག་ཚེ། དེས་ཀྲུང་གོའི་མི་རིགས་ཀྱི་བདེན་དོན་དང་རྒྱབ་འགལ་བྱས་པ་ཡིན་པས། ཀྲུང་གོ་མི་དམངས་ཀྱིས་ཁས་མི་ལེན་ཁོ་ཐག་ཡིན། ང་ཚོས་ཐའེ་ཝན་མཚོ་འགག་གི་ཞི་བདེ་བརྟན་བརླིང་ཡོང་བ་སྲུང་འཛིན་བྱེད་པ་མཐོང་འདོད་ཆེ་བར་མ་ཟད་དུས་དང་རྣམ་པ་ཀུན་ཏུ་ཤུགས་རྒྱག་གིན་ཡོད་མོད། འོན་ཀྱང“ཐའེ་ཝན་རང་བཙན”བྱེད་པ་དེ་ཐའེ་ཝན་མཚོ་འགག་ཞི་བདེ་བརྟན་བརླིང་ཡོང་བ་དང་མེ་དང་ཆུ་གཉིས་བཞིན་དུ་མཐུན་པོ་ཡོང་ཐབས་བྲལ། རེ་བ་ཡིན་ན་ཨ་རིའི་གཏམ་སྤྱོད་གཉིས་ཀ་མཐུན་པར་བྱས་ནས། ཀྲུང་གོའི་སྲིད་ཇུས་གཅིག་དང་ཀྲུང་ཨའི་བར་གྱི་མཉམ་འབྲེལ་སྤྱི་བསྒྲགས་གསུམ་པོ་བརྩི་སྲུང་བྱེད་དགོས། སྐུ་ཞབས་ཙུང་ཐུང་གིས་ཐེངས་གང་མང་ལ“ཐའེ་ཝན་རང་བཙན”ལ་རྒྱབ་སྐྱོར་མེད་པ་དང་། ཐའེ་ཝན་བརྩོན་ལེན་བྱས་ནས་ཀྲུང་ཧྭ་དང་ལེགས་ཆ་འགྲན་རྩོད་བྱེད་པ་དང་ཀྲུང་གོར་བཀག་འགོག་བྱེད་པའི་ལག་ཆ་རུ་བརྩི་འདོད་མེད་ཅེས་བཤད་ཅིང་། ཨ་རིས་སྐུ་ཞབས་ཙུང་ཐུང་གི་དམ་བཅའ་དོན་ཐོག་ཏུ་འཁྱོལ་བར་བྱེད་པའི་རེ་བ་ཞུ།        ཞི་ཅིན་ཕིང་གིས་ནན་གྱིས་བསྟན་དོན། ཀྲུང་གོ་དང་ཨ་རི་ནི་ལོ་རྒྱུས་རིག་གནས་དང་སྤྱི་ཚོགས་ལམ་ལུགས། འཕེལ་རྒྱས་བགྲོད་ལམ་བཅས་མི་འདྲ་བའི་རྒྱལ་ཁབ་ཆེན་པོ་གཉིས་ཡིན། འདས་ཟིན་པ་དང་ད་ལྟ་གང་ཡིན་རུང་ཧེ་བག་དང་རྩོད་གཞི་ཡོད་མྱོང་ལ། སླར་ཕྱིན་ཀྱང་ཡོད་ངེས་ཡིན། ཡིན་ཡང་དེ་ནི་ཀྲུང་གོ་དང་ཨ་རིའི་བར་གྱི་འབྲེལ་བ་འཕེལ་རྒྱས་འགྲོ་བའི་འགོག་རྐྱེན་དུ་འགྱུར་མི་རུང་། འཛམ་གླིང་ལ་དུས་ནམ་ཡིན་ཡང་འགྲན་རྩོད་ཡོད་མོད། འོན་ཀྱང་འགྲན་རྩོད་ནི་ཕན་ཚུན་དཔྱད་གཞིའི་མེ་ལོང་དུ་འཛིན་པ་དང་ཕན་ཚུན་གཅིག་རྗེས་གཅིག་གིས་སྙེག་པ། མཉམ་དུ་ཡར་ཐོན་ཡོང་བ་བཅས་ཡིན་དགོས་པ་ལས། ཁྱོད་ཕམ་ང་རྒྱལ་དང་ཁྱོད་ཤི་ང་གསོན་བྱེད་དགོས་པ་ཞིག་མིན། ཀྲུང་གོར་གནའ་ནས་འབད་བརྩོན་ལྷོད་མེད་ཀྱི་གཟི་བརྗིད་ལྡན་པའི་སྲོལ་རྒྱུན་ཡོད་ལ། གཉའ་གནོན་དང་བཀག་འགོག་བྱས་ཚེ་ཀྲུང་གོའི་མི་དམངས་ཀྱི་བློ་སྤོབས་དང་དཔའ་ངར་བསླང་བ་ལས་འོས་མེད། ཉོ་འཚོང་དམག་འཐབ་དང་ཚན་རྩལ་དམག་འཐབ་རྒྱག་པ་དང་། མིའི་ཐབས་ཀྱིས“གྱང་བརྩིགས་མཁར་འཛུགས”བྱེད་པ་དང་། བཙན་ཤེད་ཀྱིས“འབྲེལ་ཐག་གཅོད་པ”བཅས་ནི་ཚོང་རའི་དཔལ་འབྱོར་གྱི་རྩ་དོན་དང་ཡོངས་སུ་འགལ་ཏེ་རྒྱལ་སྤྱིའི་ཉོ་འཚོང་སྒྲིག་སྲོལ་ལ་གཏོར་བརླག་བཏང་བ་ཡིན་པས། གཞན་ལ་གནོད་ཅིང་རང་ལ་མི་ཕན་པ་ཁོ་ན་ཡིན། ང་ཚོས་དཔལ་འབྱོར་ཉོ་འཚོང་གི་ཚན་རྩལ་སྤེལ་རེས་ཆབ་སྲིད་ཅན་དང་མཚོན་ཆ་ཅན་དུ་འགྱུར་བར་ངོ་རྒོལ་བྱེད་ཀྱི་ཡོད། མིག་སྔའི་གནས་བབ་འོག ཀྲུང་གོ་དང་ཨ་རི་གཉིས་ཀྱི་ཐུན་མོང་གི་ཁེ་ཕན་ཇེ་ཉུང་དུ་སོང་བ་མིན་པར་ཇེ་མང་དུ་སོང་ཡོད། ཀྲུང་གོ་དང་ཨ་རིའི་བར་ལ་འགལ་རྐྱེན་དང་འགྲན་རྒོལ་ཅི་ཡང་མ་བྱུང་བར་ཞི་མཐུན་མཉམ་གནས་ཡོང་རྒྱུ་ནི་རྒྱལ་ཁབ་གཉིས་ཀྱི་རྩ་བར་གྱུར་པའི་ཐུན་མོང་གི་ཁེ་ཕན་ཡིན། ཀྲུང་གོ་དང་ཨ་རི་གཉིས་ཀྱི་དཔལ་འབྱོར་ལ་མཉམ་འདྲེས་ཟབ་མོ་འབྱུང་བར་འཕེལ་རྒྱས་ཀྱི་ལས་འགན་གསར་པར་འཕྲད་ཡོད་པས། ཕ་རོལ་པོའི་འཕེལ་རྒྱས་ཁྲོད་ནས་ཁེ་ཕན་ཐོབ་པར་བྱ་རྒྱུ་དེ་ཡང་ཐུན་མོང་གི་ཁེ་ཕན་ཡིན། གོ་ལ་ཧྲིལ་པོའི་དཔལ་འབྱོར་རིམས་ནད་ཀྱི་རྗེས་སུ་སློར་གསོ་འབྱུང་བ་དང་། གནམ་གཤིས་ཀྱི་འགྱུར་ལྡོག་ལ་ཁ་གཏད་འཇལ་བ། ས་ཁུལ་གྱི་གླེང་གནད་གཙོ་བོར་གྱུར་པའི་གནད་དོན་ཐག་གཅོད་པ་བཅས་ཀྱང་ཀྲུང་ཨའི་མཐུན་སྦྱོར་མཉམ་ལས་དང་འབྲལ་ཐབས་མེད་ལ། འདི་ཡང་ཐུན་མོང་གི་ཁེ་ཕན་ཡིན། ཕྱོགས་གཉིས་ཀས་ཕན་ཚུན་བརྩི་འཇོག་དང་ཕན་ཚུན་ཁེ་ཕན་བསྐྲུན་པ་དང་། སྤྱི་ཡོངས་ལ་དམིགས་ཏེ་ཕྱོགས་གཉིས་ཀའི་མཉམ་ལས་ལ་ཁོར་ཡུག་བཟང་པོ་དང་བརྟན་བརླིང་གི་འབྲེལ་བ་འདོན་སྤྲོད་བྱེད་དགོས།        རྒྱལ་ཁབ་གཉིས་ཀྱི་གཙོ་བདག་གིས་ད་དུང་ཡུག་རེན་གྱི་ཉམས་ཉེན་སོགས་ཀྱི་གནད་དོན་ཐད་དགོངས་འཆར་བརྗེ་རེས་གནང་བ་རེད། ཞི་ཅིན་ཕིང་གིས་བསྟན་དོན། ཀྲུང་གོ་ཕྱོགས་ཀྱིས་མིག་སྔའི་ཡུག་རེན་གྱི་གནས་བབ་ལ་དོ་ཁུར་ཆེན་པོ་བྱེད་ཀྱི་ཡོད།
       ཉམས་ཉེན་བསླངས་རྗེས། ངས“འོས་པ་བཞི”བཏོན་པ་ཡིན་ལ། ཡར་སྔོན་ངས་ཡང་བསྐྱར“ཐུན་མོང་བཞི”བཏོན་པ་ཡིན། ཡུག་རེན་གྱི་ཉམས་ཉེན་ལྟ་བུའི་གོ་ལ་ཧྲིལ་པོའི་རང་བཞིན་དང་མཉམ་འདུས་རང་བཞིན་གྱི་ཉམས་ཉེན་ལ་དམིགས་ཏེ། དོན་ཚན་འདི་དག་ལ་བསམ་གཞིགས་ནན་ཏན་བྱེད་དགོས་པ་སྟེ། གཅིག་ནི་འགལ་ཟླ་བྱུང་ནས་དམག་འཁྲུག་བརྒྱབ་པར་རྒྱལ་ཁ་ཐོབ་མཁན་ཞིག་མེད་པ་དང་། གཉིས་ནི་རྙོག་འཛིང་ཆེ་བའི་གནད་དོན་ལ་ཐག་གཅོད་ཐབས་སླ་མོ་ཞིག་མེད་པ། གསུམ་ནི་རྒྱལ་ཁབ་ཆེན་པོའི་བར་དུ་ཅིས་ཀྱང་འགྲན་རྒོལ་མི་ཡོང་བ་བྱེད་པ་བཅས་སོ།། ཀྲུང་གོའི་ཕྱོགས་ཀྱིས་དུས་ནམ་ཡང་ཞི་བདེའི་ཕྱོགས་སུ་ལངས་ནས་མུ་མཐུད་དུ་འདུམ་འགྲིག་དང་གྲོས་མོལ་ལ་སྐུལ་འདེད་གཏོང་རྒྱུ་དང་། ཨུ་རུ་སུ་དང་ཡུག་རེན་ཕྱོགས་གཉིས་ཀྱིས་ཞི་བའི་གྲོས་མོལ་སླར་གསོ་བྱ་རྒྱུར་རྒྱབ་སྐྱོར་དང་རེ་བ་བྱེད་པའི་མཚུངས་སུ། ཨ་རི་དང་བྱང་ཆིངས་རྒྱལ་ཁབ། ཡོ་རོབ་མནའ་འབྲེལ་བཅས་ཀྱིས་ཨུ་རུ་སུ་དང་ཕྱོགས་ཡོངས་ནས་གླེང་མོལ་བྱ་རྒྱུའི་རེ་བ་བཟུང་ཡོད།
       རྒྱལ་ཁབ་གཉིས་ཀྱི་གཙོ་བདག་གིས་གཅིག་མཐུན་དུ་ངོས་བཟུང་དོན། ཐུག་འཕྲད་ནི་ལྷག་བསམ་ཟོལ་མེད་ཡོང་བ་དང་དགེ་མཚན་ལྡན་པ་ཞིག་ཡིན་ལ། རྒྱལ་ཁབ་གཉིས་ཀྱི་བྱ་བའི་ཚོགས་པས་དུས་ཐོག་རྗེས་འབྲངས་དང་རྒྱལ་ཁབ་གཉིས་ཀྱི་གཙོ་བདག་བར་བྱུང་བའི་ཐུན་མོང་གི་ངོས་ཟིན་གལ་ཆེན་དོན་འཁྱོལ་བྱས་ཏེ། བྱ་སྤྱོད་དངོས་ཀྱིས་ཀྲུང་ཨའི་འབྲེལ་བ་སླར་ཡང་བརྟན་པོའི་ངང་འཕེལ་རྒྱས་འགྲོ་བའི་ལམ་དུ་བགྲོད་པར་སྐུལ་འདེད་གཏོང་དགོས་པར་སྙམ། རྒྱལ་ཁབ་གཉིས་ཀྱི་གཙོ་བདག་རྒྱུན་ལྡན་རང་བཞིན་གྱི་འབྲེལ་བ་མུ་མཐུད་དུ་རྒྱུན་འཁྱོངས་བྱ་རྒྱུར་འཐད་པ་བྱུང་། །
       ཏིང་ཞུའེ་ཞང་དང་། ཝང་དབྱི། ཧོ་ལི་ཧྥེང་སོགས་མཇལ་འཕྲད་ནང་ཞུགས།