མཚོ་ལྷོ་ཁུལ་གྱིས་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་དངོས་འབེབས་བྱས་ནས་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ཐད་ལ་བྱས་རྗེས་གསར་བ་འཇོག་ངེས་རེད།

       ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་ལས་ཚན་རྩལ་ནི་ཐོན་སྐྱེད་ནུས་ཤུགས་དང་པོ་ཡིན་ལ། འཇོན་མི་ནི་ཐོན་ཁུངས་དང་པོ་ཡིན་པ་དང་། གསར་སྐྲུན་ནི་སྒུལ་ཤུགས་དང་པོ་ཡིན་པ་ཅིས་ཀྱང་རྒྱུན་འཁྱོངས་བྱེད་པ་དང་། ཚན་རིག་སློབ་གསོར་བརྟེན་ནས་རྒྱལ་ཁབ་དར་རྒྱས་སུ་གཏོང་བའི་འཐབ་ཇུས་དང་འཇོན་མིར་བརྟེན་ནས་རྒྱལ་ཁབ་སྟོབས་ལྡན་དུ་གཏོང་བའི་འཐབ་ཇུས། གསར་སྐྲུན་འདེད་སྐུལ་འཕེལ་རྒྱས་འཐབ་ཇུས་བཅས་ལག་བསྟར་ནན་མོ་བྱེད་དགོས་ལ། འཕེལ་རྒྱས་ཀྱི་ཁྱབ་ཁོངས་གསར་བ་དང་བགྲོད་ལམ་གསར་བ་གསར་འབྱེད་བྱས་ནས་མུ་མཐུད་དུ་འཕེལ་རྒྱས་ཀྱི་སྒུལ་ནུས་གསར་བ་དང་ཁྱད་སྟོབས་གསར་བ་གསར་བཟོ་བྱེད་དགོས་ཞེས་བསྟན་ཡོད། རང་ཁུལ་གྱིས་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་མཛུབ་སྟོན་དུ་བཟུང་སྟེ། བརྟན་ཐོག་ཡར་འཕེལ་བྱ་བའི་སྤྱིའི་དགོངས་གཞི་ཁོང་དུ་ཆུད་པར་བྱས་ཤིང་། རང་བདག་གསར་སྐྲུན་དང་བརྒལ་གཏོང་གསར་བ་བྱུང་བ་དང་། འདེགས་ཤུགས་འཕེལ་རྒྱས། མ་འོངས་པར་སྣེ་ཁྲིད་པའི་བྱེད་ཕྱོགས་རྒྱུན་འཁྱོངས་བྱས་པ་དང་། གསར་སྐྲུན་འདེད་སྐུལ་འཕེལ་རྒྱས་འཐབ་ཇུས་ལག་བསྟར་བཟང་བོ་བྱས་པར་མ་ཟད། ཏང་འཛུགས་སྣེ་ཁྲིད་དང་དཔེ་སྟོན་ཁུལ་གསར་སྐྲུན་བྱེད་པ་དང་། གཙོ་གཞི་གསོ་སྐྱོང་། ཚན་རྩལ་ལས་གཞི། སྟེགས་བུ་འཛུགས་སྐྲུན། འཇོན་མི་སྐྱེད་སྲིང་། ཚན་རྩལ་ཞབས་ཞུ་སོགས་བྱ་བ་གཙོ་བོ་བཅས་ལ་དམ་པོར་སྦྲེལ་ཞིང་། ཏན་ཏན་ཏིག་ཏིག་སྒོས་བྱ་བ་སྣ་ཚོགས་ལག་བསྟར་བྱས་ནས། ཁུལ་ཡོངས་ཀྱི་ཚན་རྩལ་གསར་སྐྲུན་བྱ་བའི་ཐད་ནས་གྲུབ་འབྲས་གསར་བ་བླངས།
       ད་ལོའི་ཟླ་བདུན་པའི་ཚེས་བཅུ་ཉིན། རྒྱལ་སྲིད་སྤྱི་ཁྱབ་ཁང་གིས་རང་ཁུལ་དུ་རྒྱལ་ཁབ་རྒྱུན་མཐུད་འཕེལ་རྒྱས་གྲོས་རིམ་གསར་སྐྲུན་དཔེ་སྟོན་ཁུལ་འཛུགས་སྐྲུན་བྱེད་པར་ཆོག་མཆན་བཀོད་ནས་འཐད་པ་བྱུང་། རྗེས་ཕྱོགས་སུ་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་འགུལ་སྐྱོད་ཁྲོད་དུ་དངོས་འབེབས་བྱེད་པ་དང་། འཕེལ་རྒྱས་ཀྱི་རྣམ་པ་གཞི་རྩ་ནས་སྒྱུར་བ་མངོན་འགྱུར་བྱེད་པ་དང་། སྐྱེ་ཁམས་ཁོར་ཡུག་སྤུས་ཚད་རྒྱུན་མཐུད་སྒོས་མཐོར་འདེགས་སུ་གཏོང་བ། སྐྱེ་ཁམས་ཕྱུགས་ལས་ཕྱོགས་ཡོངས་ནས་ཚུལ་སྒྱུར་རིམ་འཕར་བྱེད་པ། དག་གཙང་ནུས་ཁུངས་ཕྱོགས་ཡོངས་ནས་རྒྱུན་མཐུད་ནུས་ལྡན་སྒོས་མཁོ་འདོན་བྱེད་པ། སྐྱེ་ཁམས་རིག་གནས་གནས་སྐོར་ལས་རིགས་ཕྱོགས་ཡོངས་ནས་མཐོར་འདེགས་སུ་གཏོང་བ། གཞི་གྲངས་ཆེན་པོའི་ཐོན་ལས་ཕྲེང་འབྲེལ་ཕྱོགས་ཡོངས་ནས་གྲུབ་པ་དམིགས་འབེན་དུ་བཟུང་སྟེ། རང་ཁུལ་སྐྱེ་ཁམས་ཁོར་ཡུག་ལེགས་པ་དང་སྐྱེ་ཁམས་ཐོན་ལས་མཐུན་སྦྱོར་སྒོས་འཕེལ་རྒྱས་སུ་འགྲོ་བ། དམངས་ཚིས་ལེགས་བཅོས་བྱེད་པའི་མཐོ་སྒང་རྒྱུན་མཐུད་འཕེལ་རྒྱས་ཀྱི་དཔེ་མཚོན་ཞིག་ཏུ་འཛུགས་སྐྲུན་བྱས་ནས། རྨ་ཆུའི་བཞུར་ཁོངས་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་བྱས་རྗེས་ཆེན་པོ་འཇོག་ངེས་ཡིན།