ལིས་ཀང་གིས“དུས་ཆེན་གཉིས”ཀྱི་སྐབས་སུ་སྨན་བཅོས་སྲོག་སྐྱོབ་དང་སྨན་རྫས་གསོག་འཇོག་སོགས་ཀྱི་བྱ་བར་རྟོག་ཞིབ་བྱས།

       སྤྱི་ལོ་གསར་ཚེས་ཀྱི་སྐབས་སུ། ཁུལ་ཨུའི་ཧྲུའུ་ཅི་ལིས་ཀང་སོགས་ཁུལ་དང་རྫོང་། ཤང་གྲོང་བཅས་རིམ་པ་བཞི་ཡི་སྨན་བཅོས་ལས་ཁུངས་སུ་བསྐྱོད་དེ་ཏོག་དབྱིབས་ནད་དུག་གི་སྨན་བཅོས་སྲོག་སྐྱོབ་དང་སྨན་རྫས་གསོག་འཇོག་སོགས་ཀྱི་བྱ་བར་རྟོག་ཞིབ་བྱས་པར་མ་ཟད། སྡེ་བའི་ནང་ཁུལ་དུ“དུས་ཆེན་གཉིས”ཀྱི་རིང་ལ་འཚམས་འདྲི་བྱེད་པའི་བྱ་འགུལ་ཡང་སྤེལ་བ་རེད། ཁོང་གིས་ཏང་གི་ཚོགས་ཆེན་ཐེངས་ཉི་ཤུ་བའི་དགོངས་དོན་མཛུབ་ཁྲིད་དུ་བྱས་ནས་མི་དམངས་དང་ཚེ་སྲོག་ནི་བླ་ན་མེད་པ་ཡིན་པའི་ལྟ་ཚུལ་མཐའ་འཁྱོངས་ཀྱིས་དུས་དང་རྣམ་པ་ཀུན་ཏུ་མང་ཚོགས་ཀྱི་བདེ་སྡུག་སེམས་སུ་བཟུང་ནས། ཤུགས་ཡོད་རྒུས་མང་ཚོགས་ཀྱི་དཀའ་སྡུག་སེལ་བ་དང་ཉེ་བར་མཁོ་བའི་བྱ་བ་དངོས་སྒྲུབ་རོགས་བྱས་ནས་དུས་བདེ་འཆམ་མཐུན་གྱི་དཔྱིད་དཔལ་གསར་བའི་དུས་ཆེན་ཞིག་རོལ་ཏུ་འཇུག་དགོས་པར་བསྟན།

       ཁུལ་ཨུའི་ཧྲུའུ་ཅི་ལིས་ཀང་སྔ་གཞུག་ཏུ་ཁུལ་མི་དམངས་སྨན་ཁང་དང་ཁུལ་བོད་སྨན་ཁང་། ཁུལ་གྱི་ཡ་དམིགས་འཛུགས་སྨན་ཁང་། གུང་ཧོ་རྫོང་མཁར་བྱང་ཀྲུང་ལུགས་སྨན་ཁང་། ཆབ་ཆ་གྲོང་རྡལ་འཕྲོད་བསྟེན་ཁང་དང་ཆབ་ཆ་གྲོང་རྡལ་རྒྱ་ར་སྡེ་བའི་འཕྲོད་བསྟེན་ཁང་། དེ་མིན་ཀོས་ནན་རྫོང་མི་དམངས་སྨན་ཁང་བཅས་སུ་བསྐྱོད་དེ།  ཡུལ་དངོས་སུ་ཚ་བ་རྒྱས་པའི་སྒོ་བསྟེན་འཁོར་སྐྱོད་དང་སྨན་རྫས་གསོག་འཇོག་མཁོ་འདོན། ནད་པ་ལྗིད་མོའི་ནད་ཁང་བཀོད་སྒྲིག སྨན་བཅོས་སྒྲིག་ཆས་བཀོད་སྒྲིག་སོགས་ཀྱི་གནས་ཚུལ་ལ་ལྟ་ཞིབ་བྱས་ཤིང་། གཞན་ཡང་ནད་པ་ཉལ་ཁྲིར་ཤོང་ཚད་དང་ནད་པའི་གྲངས་འབོར། སྨན་བཅོས་བརྒྱུད་རིམ། སྨན་བཅོས་སྲོག་སྐྱོབ་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་བྱས་ཏེ་འཐབ་ཕྱོགས་དང་པོའི་སྨན་བཅོས་མི་སྣར་འཚམས་འདྲི་བྱས་པ་རེད།

       ལིས་ཀང་གིས་བསྟན་དོན། རིམས་ནད་བྱུང་བ་ནས་བཟུང་ཁུལ་ཡོངས་ཀྱི་རྒྱ་ཆེའི་སྨན་བཅོས་མི་སྣས་འགན་འཁྲི་འཁུར་ཕོད་པ་དང་དཀའ་ཚེགས་ལ་མ་འཛེམ་པར་རིམས་ནད་འགོག་རྒོལ་ཐད་ལ་ཧུར་བརྩོན་བྱས་ནས་ལས་འགན་ལེགས་པར་སྒྲུབ་པ་ལ་སྙིང་དབུས་ནས་ཐུགས་རྗེ་ཆེ་ཞུ་རྒྱུ་དང་བླ་ན་མེད་པའི་གུས་འདུད་ཞུས་པ་ཡིན་ཞེས་བཤད། ཁོང་གིས་རིམས་ནད་སྔོན་འགོག་ཚོད་འཛིན་ལས་དོན་གྱི་གཙོ་གནད་དེ་རིམས་ནད་སྔོན་འགོག་ཚོད་འཛིན་བྱེད་པ་ནས་སྨན་བཅོས་སྲོག་སྐྱོབ་བྱ་བར་བསྒྱུར་བས“བདེ་ཐང་འགན་ལེན་དང་ནད་གཞི་ཚབས་ཆེན་འགོག་པ”དེ་མཐའ་འཁྱོངས་བྱས་ནས། རིམ་པ་ཁག་གི་སྨན་བཅོས་སྲོག་སྐྱོབ་ཀྱི་ཆུ་ཚད་ཕྱོགས་ཡོངས་ནས་མཐོ་རུ་བཏང་སྟེ་མི་དམངས་མང་ཚོགས་ཀྱི་ཚེ་སྲོག་གི་བདེ་འཇགས་དང་གཟུགས་པོའི་བདེ་ཐང་ལ་ཚད་གཞི་མཐོ་ཤོས་ཀྱི་སྒོ་ནས་སྲུང་སྐྱོང་བྱེད་དགོས་པདང་། རིམ་པ་ཁག་གི་སྨན་བཅོས་སྒྲིག་ཆས་ཀྱི་རྒྱུ་སྤུས་ཇེ་བཟང་དུ་གཏོང་བ་དང་ཆེད་སྐུད120ཡི་ཤོང་ཚད་ཆེ་རུ་གཏོང་བ། སྨན་བཅོས་སྲོག་སྐྱོབ་ཀྱི་ཉལ་ཁྲི་གྲ་སྒྲིག་སྔར་ལས་ལེགས་སུ་གཏོང་བ། ཚ་རྒྱས་སྒོ་བསྟེན་སྨན་ཁང་དང་མྱུར་སྐྱོབ་བྱེད་ཚད་བཅས་ལ་འགན་ལེན་བཅས་བྱེད་དགོས་པར་བསྟན་པ་དང་། དེ་མིན་སྨན་པ་སྟོན་པའི་བརྒྱུད་རིམ་ཇེ་ལེགས་སུ་གཏོང་བ་དང་སྨན་བཅོས་ཀྱི་བགྲོད་ལམ་ཤར་གཏོང་ཐུབ་པ་བྱས་ནས་མི་དམངས་མང་ཚོགས་ཀྱིས་སྨན་ཉོ་བ་དང་སྨན་བཅོས་བྱེད་པའི་དགོས་མཁོ་འགན་ལེན་བྱེད་ཐུབ་པར་བྱ་དགོས། ལྷག་པར་དུ་རྒན་རྒོན་དང་སྦྲུམ་མ། བྱིས་པ་སོགས་དམིགས་བསལ་གྱི་མི་སྣར་གོ་རིམ་ལྡན་པའི་ངང་སྨན་བཅོས་བྱ་རྒྱུར་འགན་ལེན་བྱེད་དགོས། འཕྲལ་སྡོམ་སྔོན་ཇུས་སྔར་ལས་འཐུས་ཚང་དུ་བཏང་ནས་སྨན་བཅོས་མི་སྣའི་སྨན་བཅོས་གསོ་སྦྱོང་ལ་ཤུགས་སྣོན་རྒྱག་པ་དང་འབྲེལ་ཞིང་ཆེན་རིམ་པའི་སྨན་བཅོས་སྒྲིག་གཞི་ལ་མཐུན་སྦྱོར་བྱས་ཏེ་ནད་གཞི་ལྕི་བའི་ནད་པ་སྨན་ཁང་ལེགས་ཤོས་ནས་སྨན་བཅོས་བྱེད་པའི་ལམ་སྲོལ་འཛུགས་དགོས། སྨན་བཅོས་ཐོན་ཁུངས་ཕྱོགས་ལ་སྐུལ་འདེད་བཏང་སྟེ་སྐོར་སྐྱོད་སྨན་བཅོས་བྱ་སྤྱོད་སྤེལ་རྒྱུར་དམ་འཛིན་དང་བཀོད་སྒྲིག་བྱས་ནས་སྐོར་སྐྱོད་སྨན་བཅོས་སྒོ་རྩར་བསྐྱོད་དེ་ཞབས་འདེགས་ཞུ་དགོས་པའི་བླང་བྱ་བཏོན་པ་རེད། ཀྲུང་ལུགས་དང་བོད་ལུགས་གསོ་རིག་གི་ཐུན་མོང་མ་ཡིན་པའི་ལེགས་ཆ་མུ་མཐུད་དུ་འདོན་སྤེལ་བྱས་ནས་ཏོག་གསར་ནད་དུག་ལ་ཕྱོགས་བསྡུས་སྒོས་འགོག་བཅོས་བྱེད་དགོས་པ་དང་སྨན་བཅོས་མི་སྣར་སེམས་ཁུར་དང་གཅེས་སྐྱོང་བྱེད་ཤུགས་ཆེ་རུ་གཏོང་བ། ཕུལ་བྱུང་གི་དཔེ་མཚོན་འདེམས་ཤུགས་ཆེ་རུ་གཏོང་བ་བཅས་བྱས་ཏེ་རྒྱ་ཆེའི་སྨན་དཔྱད་ལས་དོན་པས་ནུས་ཤུགས་ཡོད་རྒུ་བཏོན་ནས་སྨན་བཅོས་ཀྱི་བྱ་བའི་ནང་ཞུགས་ཐུབ་པར་བྱེད་དགོས་ཞེས་བསྟན།

       ལིས་ཀང་གིས་གུང་ཧོ་རྫོང་མི་སེར་ཁང་སྨན་རྫས་ཚོང་ཁང་དང་ཀོས་ནན་རྫོང་ཆིན་ཞིན་སྨན་ཁང་ཆེན་མོ་བཅས་སུ་བསྐྱོད་དེ་སྨན་རྫས་དང་ཁ་རས་སོགས་ཀྱི་དངོས་ཟོག་གསོག་ཚད་དང་རིན་གོང་། ཕྱིར་ཚོང་སོགས་ཀྱི་གནས་ཚུལ་ལ་རྟོག་ཞིབ་བྱས་པ་དང་། ཁོང་གིས་སྨན་ཚོང་ཁང་ནི་མང་ཚོགས་ཀྱི་གཞི་རྩའི་སྨན་ཉོ་རྒྱུའི་དགོས་མཁོ་འགན་ལེན་བྱེད་པའི་གནས་ས་གཙོ་བོ་ཞིག་ཡིན་ལ། སྨན་རྫས་ཀྱི་དགོས་མཁོའི་ཆ་འཕྲིན་དུས་ཐོག་ཏུ་གནད་ལ་འཁེལ་པོར་ཁོང་དུ་ཆུད་པ་བྱས་ནས་གཙོ་གནད་སྨན་རྫས་གྲབས་གསོག་བྱེད་ཤུགས་ཆེ་རུ་བཏང་སྟེ་སྨན་རྫས་མཁོ་འདོན་གྱི་ཐབས་ལམ་དང་སྨན་སྐྱེལ་ལྷུ་ཚིགས་ཤར་བགྲོད་ཐུབ་པ་བྱས་ནས། དགོས་མཁོ་ཅུང་ཆེ་བའི“སྨན་རྫས་རིགས་བཞིའི”སྨན་རྫས་མཁོ་སྤྲོད་འདང་ངེས་དང་སྤུས་ཚད་ལ་ཡིད་རྟོན་བྱེད་ཐུབ་པ། རིན་གོང་བརྟན་པོ་བཅས་ཡོང་བར་འགན་ལེན་བྱས་ཏེ་སྨན་རྫས་ཀྱི་དགོས་མཁོ་འགན་ལེན་བྱེད་དགོས་པར་བསྟན།

       ཁུལ་ཨུའི་ཧྲུའུ་ཅི་ལིས་ཀང་ཀོས་ནན་རྫོང་མང་ཆུ་གྲོང་རྡལ་གྱི་གྲོང་ཚོ་ཁ་ཤས་སུ་བསྐྱོད་དེ་དམག་མི་དང་སྔོན་གཤེགས་དཔའ་བོའི་ཁྱིམ་མི། ཏང་ཡོན་རྒན་པ། གནོད་འཚེ་ཚབས་ཆེན་ཐེབས་པའི་ཁྱིམ་ཚང་། དཀའ་ངལ་ཡོད་པའི་ལས་བཟོ་པའི་ཁྱིམ་དུ་བསྐྱོད་ནས་གཟུགས་པོའི་གནས་ཚུལ་དང་ཁྱིམ་ཚང་གི་ཡོང་འབབ། ཕྲུ་གུའི་སློབ་སྦྱོང་དང་འཚོ་བ། འཚོ་བའི་དཀའ་ངལ་སོགས་ཀྱི་གནས་ཚུལ་སོགས་ལ་འདྲི་རྩད་དང་འཚམས་འདྲི་བྱས་པ་དང་། དེ་མིན་རྫོང་དང་ཤང་ཏང་ཨུའི་སྲིད་གཞུང་གི་འགན་འཁུར་བློ་མཐུན་རྣམས་མངགས་བཅོལ་གནང་སྟེ། མང་ཚོགས་ཀྱི་དགོས་མཁོ་གཞིར་བཟུང་སྟེ་སྤྱི་ཚོགས་རོགས་སྐྱོབ་ཀྱི་སྲིད་ཇུས་ཁག་དོན་འཁྱོལ་བྱས་ཏེ་ཐབས་བརྒྱ་ཇུས་སྟོང་གིས་དཀའ་ངལ་ཡོད་པའི་མང་ཚོགས་ལ་དྲོད་སྐྱིད་ལྡན་པའི་དགུན་གྱི་འཚོ་བ་བཟང་བོ་ཞིག་རོལ་ཐུབ་པར་བྱེད་དགོས་ཞེས་བསྟན། རྟོག་ཞིབ་བྱེད་པའི་སྐབས་སུ་ལིས་ཀང་གིས་ད་དུང་ལོ་སར་སྐབས་ཀྱི་ལས་རེས་བྱེད་པའི་གནས་ཚུལ་ལ་ཡང་རྒྱུས་ལོན་བྱས།