མཚོ་ལྷོ་ཁུལ་དམངས་ཆེན་སྐབས་བཅོ་ལྔ་པའི་གྲོས་ཚོགས་ཐེངས་བཞི་བ་མཇུག་སྒྲིལ།

       ཟླ3པའི་ཚེས3ཉིན་གྱི་སྔ་དྲོར། མཚོ་ལྷོ་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་སྐབས་བཅོ་ལྔ་བའི་ཚང་འཛོམས་གྲོས་ཚོགས་ཐེངས་བཞི་བའི་གྲོས་རིམ་ཁག་བདེ་བླག་གིས་ལེགས་འགྲུབ་བྱུང་སྟེ་ཚོགས་འདུ་རྒྱལ་ཁའི་ངང་མཇུག་སྒྲིལ། ཚོགས་ཆེན་གྱི་ལག་བསྟར་ཀྲུའུ་ཞི་ལིས་ཀང་དང་མཱ་ཅན་ཧོང་། གསེར་མཚོ། དཔལ་ལྡན། ཏིང་རུའེ་ཡུང་། མཱ་ཧྲུའུ་ཧྥུའུ། ལའེ་སུང་སེན་བཅས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས། མཱ་ཅན་ཧོང་གིས་ཚོགས་ཆེན་ལ་མགོ་འཛིན་མཛད།

       ཁུལ་ཨུའི་འབྲེལ་ཡོད་མགོ་ཁྲིད། ཁུལ་ཨུའི་པུའུ་ཨུ་སོ་སོ་དང་མི་དམངས་ཚོགས་པའི་འགན་འཁུར་བ་སོ་སོ། ཁུལ་མི་དམངས་སྲིད་གཞུང་གི་ཚོགས་མི། ཁུལ་སྲིད་གཞུང་འབྲེལ་ཡོད་སྡེ་ཁག་དང་ལས་དོན་སྡེ་ཁག་གི་འགན་འཁུར་བ། མཚོ་ལྷོའི་ཡན་ལག་དམག་ཁུལ་གྱི་འབྲེལ་ཡོད་མགོ་ཁྲིད། ཁུལ་ལྟ་ཞིབ་ཨུ་ཡོན་ལྷན་ཁང་གི་ཀྲུའུ་རེན་གཞོན་པ། ཁུལ་འབྲིང་རིམ་མི་དམངས་ཁྲིམས་ཁང་གི་མགོ་གཙོ་གཞོན་པ། ཁུལ་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་གཞོན་པ། ཁུལ་མི་དམངས་འཐུས་མི་ཚོགས་ཆེན་གྱི་འཐུས་མི་མིན་པའི་ཞིང་ཆེན་གྱི་འཐུས་མི་ཁ་ཤས་དང་ཞིང་ཆེན་གྱི་ཁུལ་དུ་ཡོད་པའི་ལས་ཁུངས། ཞིང་ཆེན་དང་ཁུལ་གྱི་བཟོ་ཚོང་ཁེ་ལས་འབྲེལ་ཡོད་ཀྱི་འགན་འཁུར་བ་བཅས་ཚོགས་འདུར་ཟུར་ཞུགས་བྱས།

       གྲོས་ཚོགས་ལས2023ལོའི་མཚོ་ལྷོ་ཁུལ་གྱི་དོན་དངོས་དམངས་ཚིས་ལས་གཞིར་འདེམས་ཤོག་འཕངས་བའི་མཇུག་འབྲས་བསྒྲགས། གྲོས་ཚོགས་ལས་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་ཞུ་དང་ཁུལ་མི་དམངས་སྲིད་གཞུང་གི་ལས་དོན་སྙན་ཞུ། མཚོ་ལྷོ་ཁུལ་གྱི2022ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་འགོད་ལག་བསྟར་གནས་ཚུལ། 2023ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་འགོད། མཚོ་ལྷོ་ཁུལ་གྱི2022ལོའི་ནོར་སྲིད་སྔོན་རྩིས་ལག་བསྟར་གནས་ཚུལ་དང2023ལོའི་ནོར་སྲིད་སྔོན་རྩིས། ཁུལ་འབྲིང་རིམ་མི་དམངས་ཁྲིམས་ཁང་གི་ལས་དོན་སྙན་ཞུ་དང་ཁུལ་མི་དམངས་ཞིབ་དཔྱོད་ཁང་གི་ལས་དོན་སྙན་ཞུའི་གྲོས་ཆོད། «མཚོ་ལྷོ་བོད་རིགས་རང་སྐྱོང་ཁུལ་གྱི〈ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང〉ལས་གཉེན་སྒྲིག་ལོ་ཚོད་གཏན་འབེབས་ལག་བསྟར་བྱ་རྒྱུའི་སྐོར་གྱི་གྲོས་ཆོད(འཆར་ཟིན)»བཅས་ལ་གྲོས་འཆམ་བྱུང་བ་རེད།

       གྲོས་ཚོགས་ལས་བསྟན་དོན། ཐེངས་འདིའི་གྲོས་ཚོགས་ནི་དར་ཆ་མཐོན་པོར་སྒྲེང་བ་དང་ངར་ཤུགས་འཕེལ་བར་བྱེད་པའི་ཚོགས་ཆེན་ཞིག་དང་། དངོས་ཐོག་བདེན་འཚོལ་དང་གསར་འབྱེད་གསར་གཏོད་ཀྱི་ཚོགས་ཆེན་ཞིག ཡང་ན་ཐུན་མོང་ཐོག་འཕེལ་རྒྱས་དོན་གཉེར་དང་མཐུན་སྒྲིལ་ཡར་བརྩོན་བྱེད་པའི་ཚོགས་ཆེན་ཞིག་རེད། ཚོགས་ཞུགས་འཐུས་མི་རྣམས་ཀྱིས་ཁུལ་ཡོངས་ཀྱི་མི་དམངས་ཀྱི་མངགས་བཅོལ་ཟབ་མོ་གཏོང་ཟད་དུ་མི་གཏོང་བར་འགན་འཁྲི་བློ་ལ་བརྟན་པོར་ངེས་པ་དང་ཁྲིམས་ལྟར་འགན་འཁྲི་བསྒྲུབ་པ། འཕེལ་རྒྱས་ཀྱི་ཇུས་ཆེན་ལ་ཐུན་མོང་ཐོག་གྲོས་བསྡུར་བཅས་བྱས་ནས་འགན་འཁྲི་འཁུར་སེམས་དང་དམངས་ལ་བཅངས་པའི་བརྩེ་དུང་ཟབ་མོ། འབད་འབུངས་ཡར་བརྩོན་གྱི་བསམ་པའི་ཉམས་འགྱུར་མངོན་ཡོད། ཚོགས་ཆེན་སྟེང་གྲོས་འཆམ་བྱུང་བའི་སྙན་ཞུ་དང་གྲོས་ཆོད་ཁག་གི་ནང་འཐུས་མི་ཡོངས་ཀྱི་བློ་གྲོས་གཅིག་ཏུ་འདུས་ཚུལ་དང་ཁུལ་ཡོངས་ཀྱི་མི་དམངས་ཀྱི་འདུན་པ་ཡང་མཚོན་ཡོད། གཞན་ཡང་ཚོགས་ཆེན་སྟེང་གཏན་འཁེལ་བྱུང་བའི2023ལོར་ཁུལ་མི་དམངས་སྲིད་གཞུང་གིས་དམངས་ལ་དོན་དངོས20བསྒྲུབ་རྒྱུ་དེ་ཏང་གི་མགོ་ཁྲིད་དང་མི་དམངས་ཀྱིས་རང་ཁྱིམ་རང་བདག ཁྲིམས་ལྟར་རྒྱལ་ཁབ་སྐྱོང་བར་གཅིག་གྱུར་དམ་ཟབ་བྱེད་པའི་ལམ་ལུགས་ཀྱི་ལེགས་ཆ་གང་ལེགས་མངོན་ཡོད།

       གྲོས་ཚོགས་ལས་བསྟན་དོན། 2023ལོ་ནི་ཏང་གི་ཚོགས་ཆེན་ཐེངས་ཉི་ཤུ་བའི་དགོངས་དོན་ལག་བསྟར་དོན་འཁྱོལ་བྱེད་པ་དང་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་འཛུགས་སྐྲུན་བྱེད་པ། “ལོ་ལྔའི་འཆར་གཞི་བཅུ་བཞི་བའི”འཆར་འགོད་ལག་བསྟར་བྱེད་པའི་འགག་རྩའི་ལོ་ཞིག་ཡིན་པས། ང་ཚོས་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་བྱ་རྒྱུ་རྒྱུན་འཁྱོངས་བྱས་ཏེ། ཐེངས་འདིའི་ཚོགས་ཆེན་གྱི་དགོངས་དོན་དོན་འཁྱོལ་བྱས་ནས་ལས་དོན་སྙན་ཞུ་དང་གྲོས་ཆོད་ཁག་ལག་བསྟར་ཡག་པོ་བྱས་ཏེ། འཐུས་མི་ཡོངས་ཀྱི་ཐུན་མོང་ངོས་འཛིན་དེ་ཁུལ་ཡོངས་ཀྱི་མི་དམངས་ཀྱི་བྱ་སྤྱོད་དངོས་སུ་འགྱུར་བར་བྱས་ནས་རང་སྐྱོང་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་དང་འགན་ལེན་བྱ་དགོས་པར་ནན་བཤད་གནང་།