སློབ་གྲྭ་འབྲིང་ཆུང་གི་བསླབ་གཞིའི་ཐད་སློབ་གསོ་པུས་འདི་ལྟར་གསུངས།

       སློབ་གསོ་པུས་སྤྱི་ཚེས6ཉིན། སྤྱི་ལོ2023ལོའི་སློབ་གྲྭ་འབྲིང་ཆུང་གི་བསླབ་གཞིའི་དཀར་ཆག་ཁྱབ་བསྒྲགས་བྱས་པ་དང་། དེ་དག་སྤྱིར་བཏང་སློབ་གྲྭ་འབྲིང་ཆུང་དང་དམིགས་བསལ་སློབ་གསོའི་སློབ་གྲྭ། ལུས་རྩལ་སློབ་གྲྭ་བཅས་ཀྱི་བསླབ་གཞི་དང་འབྲེལ་བ་ཡོད། བརྡ་ཐོའི་ནང་སློབ་གྲྭ་འབྲིང་ཆུང་གི་བསླབ་གཞིའི་ནང་ཚོང་ལས་བརྡ་ཁྱབ་དང་སློབ་ཁྲིད་ཞོར་ལྟའི་དཔྱད་ཡིག་འབྲེལ་ཐག་དྲ་ཚིགས། རྩ་གཉིས་ཨང་བཤེར་སོགས་ཆ་འཕྲིན་གང་ཡང་བཞག་མི་ཆོག་པ་གསལ་པོ་བཏོན་ཡོད།
       བརྡ་ཐོའི་ནང་། འོས་འགན་སློབ་གསོའི་རྒྱལ་ཁབ་བསླབ་ཚན་གྱི་རིག་ཚན་ཁག་གིས་སྤྱི་ལོ2023ལོའི་འོས་འགན་སློབ་གསོའི་རྒྱལ་ཁབ་བསླབ་ཚན་སློབ་ཁྲིད་སྤྱོད་དེབ་དཀར་ཆག་ཅེས་པའི་ནང་བསླབ་གཞི་བེད་སྤྱོད་གཏོང་དགོས་ཞེས་བཏོན་ཡོད། འོས་འགན་སློབ་གསོའི་རྒྱལ་ཁབ་བསླབ་ཚན་བཀོད་སྒྲིག་ཁོངས་སུ་གཏོགས་ནའང་དཀར་ཆག་ནང་འབྲེལ་ཡོད་བསླབ་གཞི་མེད་ཚེ། ཞིང་ཆེན་རིམ་པའི་སློབ་གསོ་སྲིད་འཛིན་ཚན་པ་ཁག་གིས་བླང་བྱར་གཞིགས་ནས་འབྲེལ་ཡོད་བསླབ་ཚན་ལག་བསྟར་བྱ་ཐབས་དང་སློབ་ཁྲིད་དཔྱད་གཞི་གཏན་འཁེལ་བྱེད་དགོས། གལ་སྲིད་བསླབ་གཞི་བེད་སྤྱོད་གཏོང་དགོས་ཚེ། བསླབ་གཞི་དེ་ངེས་པར་དུ་དཔེ་སྐྲུན་ཁང་ངོ་མས་དཔེ་སྐྲུན་བྱེད་དགོས་པ་དང་སྦྲགས་ཞིང་ཆེན་རིམ་པའི་སློབ་གསོ་ཚན་པས་ཞིབ་བཤེར་གཏན་འཁེལ་བྱེད་དགོས་པ་མ་ཟད་ཞིང་ཆེན་རིམ་པའི་སློབ་གྲྭ་འབྲིང་ཆུང་གི་སློབ་སྤྱོད་དཀར་ཆག་ནང་བཅུག་པ་ཡིན་དགོས། གཞན་ཡང་། སྤྱི་ལོ2023ལོའི་སྟོན་ཀའི་སློབ་དུས་ནས་བཟུང་། སྤྱིར་བཏང་མཐོ་རིམ་སློབ་འབྲིང་གིས་སྤྱི་ལོ2023ལོའི་བསླབ་ཚན་ཚད་གཞིའི་རྩོམ་སྒྲིག་བྱས་པའི་མཐོ་འབྲིང་ལོ་རིམ་དང་པོ་དང་། མཐོ་འབྲིང་ལོ་རིམ་གཉིས་པའི་བསླབ་གཞི་དེ་སྤྱོད་དེབ་དཀར་ཆག་ནང་བཅུག་མེད་པ་རེད།