དཀར་མོ་གཡང་འཁྱིལ་ཆུ་གློག་ས་ཚུགས་འཛུགས་སྐྲུན་དང་སྡོད་དམངས་གནས་སྤོར་བྱ་བའི་སྐུད་འདེད་ཚོགས་འདུ་བསྡུས་པ།

       ཉེ་སྔོན། དཀར་མོ་གཡང་འཁྱིལ་ཆུ་གློག་ས་ཚུགས་འཛུགས་སྐྲུན་དང་དེའི་མཐའ་འཁོར་གྱི་སྡོད་དམངས་གནས་སྤོར་བྱེད་པའི་བྱ་བའི་སྐུལ་འདེད་ཚོགས་འདུ་དེ་ཟི་ལིང་དུ་བསྡུས། ཁུལ་ཨུའི་ཧྲུའུ་ཅི་ལིས་ཀང་ཚོགས་འདུར་ཞུགས་ནས་འབྲེལ་ཡོད་ཀྱི་བྱ་བའི་ཐད་ནས་གཏམ་བཤད་གནང་། ཚོགས་འདུ་ལས་ཞིན་ཧེ་རྫོང་སྲིད་གཞུང་དང་རྨ་ཆུ་ཀུང་སི་གཉིས་ཀྱིས་བསྒྲུབས་ཟིན་པའི་བྱ་བའི་གཙོ་གནད་དག་གི་གནས་ཚུལ་ཡར་ཞུ་བྱས་པར་མ་ཟད་གོམ་སྟབས་རྗེས་མའི་བྱ་བའི་འཆར་འགོད་ལེགས་སྒྲིག་བྱས། གཞན་ཡང་། ཁུལ་སྲིད་གཞུང་དང་རྨ་ཆུ་ཀུང་སི་གཉིས་ཀྱིས་ཞིན་ཧེ་རྫོང་ཐང་ནག་ཤང་དང་དཀར་མོ་གཡང་འཁྱིལ་ཆུ་གློག་ས་ཚུགས་ཀྱི་ཉེ་འཁོར་གྱི་སྡོད་དམངས་གནས་སྤོར་དང་གནས་གཞི་འཛུགས་སྐྲུན་བྱེད་པའི་བྱ་བའི་སྒྲོམ་གཞི་བཟོ་ཚུལ་ལ་གྲོས་བསྡུར་ཀྱང་བྱས་པ་རེད།

       ཚོགས་འདུ་ལས་བསྟན་དོན། དཀར་མོ་གཡང་འཁྱིལ་ཆུ་གློག་ས་ཚུགས་ནི་ཞིང་ཆེན་ཡོངས་ཀྱི་སྐྱེ་ཁམས་དཔལ་ཡོན་གྱི་མཐོ་ས་ལེགས་པར་བསྐྲུན་རྒྱུ་དང་། འགྲོས་མགྱོགས་པའི་སྒོ་ནས་རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་འཛུགས་སྐྲུན་བྱེད་པར་གལ་འགངས་ཆེ་བའི་ལས་གཞི་ཞིག་ཡིན་པར་མ་ཟད། རྨ་ཆུའི་བཞུར་རྒྱུན་གྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་དོན་སྙིང་གལ་ཆེན་ལྡན། 2021ལོའི་ཟླ11པར་ཆུ་གློག་ས་ཚུགས་ལ་ཞིབ་བཤེར་བྱས་ཏེ་ཆོག་མཆན་ཐོབ་པ་ནས་བཟུང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཡང་དག་པའི་སྣེ་ཁྲིད། ཞིང་ཆེན་ཐད་གཏོགས་ཀྱི་འབྲེལ་ཡོད་ལས་ཁུངས་ཀྱི་རྒྱབ་སྐྱོར། དེ་མིན་ཁུལ་ཡོངས་ཀྱི་གོང་འོག་བར་གསུམ་གྱིས་འགན་འཁུར་གྱི་འདུ་ཤེས་ཇེ་ལེགས་དང་ཉམས་མེད་ཀྱི་སྙིང་སྟོབས་ཆེ་རུ་བསྐྱེད་དེ། ལས་གཞི་འཛུགས་སྐྲུན་གྱི་བརྒྱུད་རིམ་ཁྲོད་བྱུང་བའི་གནད་དོན་གང་ཡོད་དུས་ཐོག་ཏུ་ཐག་གཅོད་བྱས་པར་བརྟེན། སྡོད་དམངས་གནས་སྤོར་བྱེད་པའི་བྱ་བ་དུས་ལྟར་བསྒྲུབ་སྟེ་ཆུ་གློག་ཆུ་ཚུགས་ཀྱི་ནུས་ཁུངས་འཁོར་བསྐྱོད་བྱེད་པར་རྨང་གཞི་ལེགས་པོ་བཏིངས་ཡོད་ཅེས་བསྟན།

       ཚོགས་འདུ་ལས་ནན་གྱིས་བསྟན་དོན། དཀར་མོ་གཡང་འཁྱིལ་ཆུ་གློག་ས་ཚུགས་ནི་དཔལ་འབྱོར་འཕེལ་རྒྱས་དང་དམངས་འཚོ་ཐབས་ཇུས། མི་རིགས་མཐུན་སྒྲིལ་ཡར་བརྩོན་བཅས་ལ་འབྲེལ་བ་ཡོད་པར་མ་ཟད་། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ་དང་། བློ་བརྟན་འགྱུར་མེད་ཀྱིས “སྲུང་སྐྱོང་གཉིས”ལག་ལེན་དུ་བསྟར་བར་བྱ་བའི་ཉམས་ལེན་དང་ཞིབ་བཤེར་ཅིག་ཡིན་པས། “ཆུ་གློག་ས་ཚུགས་བཙུགས་ཏེ་འཕེལ་རྒྱས་ལ་སྐུད་འདེད་གཏོང་བའི”ཐབས་ཇུས་དང་དམིགས་འབེན་དོན་གཉེར་བྱས་ཏེ། 2024ལོའི་ཟླ7པར་ཆུ་གློག་ས་ཚུགས་ཀྱི་རྨ་ཆུ་བསྐྱིལ་བའི་དམིགས་ཡུལ་གཏན་འཁེལ་བྱས་ནས་བྱ་བའི་མྱུར་ཚད་ཇེ་མགྱོགས་སུ་གཏོང་དགོས་པར་ནན་བཤད་གནང་།

       དམིགས་ཚད་དང་སྤུས་ཚད་མཐོན་པོའི་སྒོ་ནས་ཐང་ནག་ཤང་གི་སྡེ་བ་གསུམ་གྱི་གནས་གཞི་བཀོད་སྒྲིག་དང་ཨ་ཚོགས་དགོན་པའི་གནས་སྤོར་འཛུགས་སྐྲུན་སོགས་ཀྱི་བྱ་བ་གཙོ་བོ་ལ་སྐུད་འདེད་བཏང་སྟེ། ཁང་ཀླད་ཀྱི་ཁྱབ་ཚུལ་རྣམ་པའི་འོད་བསྡུ་ཧུར་ཐག་གིས་བཀོལ་སྤྱོད་བྱེད་པ་དང་གྲོང་ཚོ་ཡི་མཛེས་པའི་ལྗང་སྒྱུར་ལ་སྐུད་འདེད་གཏོང་བ། གཞུག་ཕྱོགས་ཀྱི་ཐོན་ལས་འཕེལ་རྒྱས་ལ་རོགས་འདེགས་གང་ལེགས་མཛད་པ་བཅས་བྱས་ཏེ། སྲིད་གཞུང་དང་མི་དམངས་མང་ཚོགས་ཀྱི་ཡིད་ཚིམ་པའི་གནས་སྤོར་གྱི་བཟོ་སྐྲུན་ལེགས་པོ་སྒྲུབ་དགོས། ཁུལ་དང་རྫོང་སྲིད་གཞུང་། དེ་མིན་འབྲེལ་ཡོད་ཀྱི་སྡེ་ཁག་གིས་གོམ་གང་མདུན་སྤོས་ཀྱིས་ཞིང་ཆེན་ཐད་གཏོགས་ཀྱི་ལས་ཁུངས་དང་རྨ་ཆུ་ཀུང་ཟི་ལ་འབྲེལ་ལམ་ཡག་པོ་བཙུགས་ཏེ། གཏན་འཁེལ་གྱི་དུས་ཚོད་ནང་དུ་ལས་གཞི་མགོ་ཚུགས་ཐུབ་པར་འགན་ལེན་བྱ་ཆེད། བཟོ་སྐྲུན་གྱི་དོ་དམ་ལ་ཤུགས་སྣོན་རྒྱག་པ་དང་དུས་ལྟར་འཆར་འགོད་ལག་བསྟར་བྱེད་པར་ལྟ་རྟོག་བྱེད་པ། འཛུགས་སྐྲུན་བྱེད་པའི་དུས་ཚིགས་དམ་འཛིན་དང་རྒྱུ་སྤུས་ལ་ཁག་ཐེག་བཅས་བྱས་ནས་ལོ་རྒྱུས་ཀྱི་འཚོལ་སྙེག་ཁྲོད་བསུབ་ཏུ་མེད་པའི་བཟོ་སྐྲུན་གྱི་དན་རྟགས་ཤིག་འཇོག་དགོས། ཞིན་ཧེ་དང་ཐུན་ཏེ། ཁྲི་ཀ་བཅས་རྫོང་གསུམ་གྱི་སྲིད་གཞུང་གིས་རྨ་ཆུ་ཀུང་སི་དང་འབྲེལ་ལམ་ཡག་པོ་བཙུགས་ནས།དངོས་རྫས་ལྷག་མའི་དམིགས་ཚད་ཀྱི་ཁ་གསབ་ལ་སྐུལ་འདེད་གཏོང་རྒྱུ་དམ་འཛིན་བྱེད་པ་དང་། གནས་སྤོར་ཡུལ་མིའི་ཐོན་སྐྱེད་ལ་བཀོད་སྒྲིག་བྱེད་པའི་ཇུས་གཞི་གཏན་འབེབས་བྱས་ནས། ཞིང་ཆེན་རིམ་པའི་བླང་བྱ་ལྟར་ལོ་འདིའི་ནང་དུ་དངོས་རྫས་ཀྱི་དམིགས་ཚད་ཁ་གསབ་དང་ཐོན་སྐྱེད་བཀོད་སྒྲིག་གི་ཇུས་གཞི་ཁྱོན་ཡོངས་ནས་ལེགས་འགྲུབ་བྱ་དགོས། ས་ཁོངས་བེད་སྤྱོད་བྱེད་པའི་རེ་ཞུ་དང་ཆོག་མཆན་གྱི་བྱ་བར་སྐུལ་འདེད་གཏོང་བའི་ཐད། རྫོང་རིམ་པ་སྲིད་གཞུང་གིས་ནན་ཏན་གྱིས་འགན་འཁྲི་དང་དུ་ལེན་པ་དང་། ཁུལ་ཐད་གཏོགས་ཀྱི་འབྲེལ་ཡོད་ལས་ཁུངས་ཀྱིས་མཛུབ་སྟོན་ལ་ཤུགས་རྒྱག་པ་དང་སྒོ་ཁར་བསྐྱོད་དེ་ཞབས་འདེགས་ཞུ་བ་བཅས་བྱས་ཏེ། ཞིན་ཧེ་རྫོང་ཐང་ནག་ཤང་གི་སྡེ་བ་ཞོལ་མའི་གནས་གཞི་བཀོད་སྒྲིག་དང་ཐང་ནག་ཟམ་ཆེན་སོགས་ཀྱི་ལས་གཞི་གང་མགྱོགས་ཀྱིས་ལེགས་འགྲུབ་བྱུང་དུ་འཇུག་དགོས་ཞེས་བསྟན།