མཚོ་ལྷོ་ཁུལ་གྱི་ཁུལ་ཨུའི་ཧྲུའུ་ཅུ་ལིས་ཀང་དང་ཁུལ་དཔོན་ཀརྨ་ཕུན་ཚོགས་གཉིས་ཀྱིས་ཁྲི་ཀ་རྫོང་དུ་རྟོག་ཞིབ་གནང་།

       ཟླ5པའི་ཚེས19ཉིན། ཁུལ་ཨུའི་ཧྲུའུ་ཅུ་ལིས་ཀང་དང་ཁུལ་དཔོན་ཀརྨ་ཕུན་ཚོགས་གཉིས་ཀྱིས་ཁྲི་ཀ་རྫོང་དུ་དབུལ་ཐར་འཁྲེགས་གཏོར་གྱི་གྲུབ་འབྲས་དེ་གྲོང་གསེབ་དར་སྤེལ་དང་འབྲེལ་མཐུད་ནུས་ལྡན་ཡོང་བའི་ལས་དོན་ཐད་རྟོག་ཞིབ་བྱ་དུས་བསྟན་དོན། སྤུས་ཚད་མཐོར་འདེགས་དང་ཚད་མཐུན་སྤུས་རྟགས་གཏོད་རྒྱུར་ཤུགས་བརྒྱབ་ནས་གྲོང་གསེབ་ཀྱི་ཐོན་ལས་གཞི་ཁྱོན་ཅན་དང་ལེགས་བསྡུས་ཞིབ་གཉེར་ཅན་དུ་འགྱུར་བའི་འཕེལ་རྒྱས་ལ་སྐུལ་འདེད་གཏོང་བ་དང་། དགེ་མཚན་གསར་པ་ཟམ་མི་ཆད་པར་གཏོད་དགོས། ལས་ཀའི་ཁེབས་རྒྱ་ཆེ་རུ་གཏོང་བ་དང་། ཞིང་འབྲོག་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱས་ཏེ་རང་རྟོགས་ངང་གྲོང་གསེབ་དར་སྤེལ་དང་མཛེས་སྡུག་ལྡན་པའི་ཁྱིམ་གཞིས་འཛུགས་སྐྲུན་བྱེད་དགོས། ཞིང་ཆེན་ཡོངས་ཀྱི་དག་ཐེར་ལེགས་བཅོས་དང་སྐུལ་སློང་བཀོད་སྒྲིག་ཚོགས་འདུའི་དགོངས་དོན་ལ་བསྡུར་ཞིབ་ནན་ཏན་བྱ་དགོས་པ་དང་། གནད་དོན་ཅན་གྱི་རྩིས་ཁྲ་ཞིབ་ཚགས་ངང་གསེད་བཀྲོལ་བྱས་ནས་དག་ཐེར་ལ་དམ་འཛིན་ཡག་པོ་བྱས་ཏེ་དག་ཐེར་ལས་དོན་ཁྱོན་ཡོངས་ནས་མཐར་ཕྱིན་པ་དང་ནུས་ལྡན་ཡོང་བའི་འགན་ལེན་བྱེད་དགོས་ཞེས་བསྟན།

       ཁྲི་ཀ་རྫོང་རྨ་ནུབ་གྲོང་རྡལ་གྱི་རི་ཁུལ་དྲོད་ཁང་ཆེ་མོའི་འཛུགས་སྐྲུན་ལས་གཞི་དང་། རྨ་ནུབ་གྲོང་རྡལ་གྱི་རིག་ནུས་ཅན་གྱི་ཕག་པ་གསོ་སྤེལ་གཞི་གཅིག་ཏུ་འགྱུར་བའི་རྒྱས་སྐྲུན་ལས་གཞི། རྨ་སྲིབ་གྲོང་རྡལ་གྱི་ཁྱིམ་སྤྱོད་རིག་ནུས་དྲོད་ཁང་ཆེན་མོའི་ལས་གཞི། ཁྲི་ཀ་རྫོང་གི་གྲོང་གསེབ་དར་སྤེལ་དང་ཞིང་ལས་ཐོན་ལས་རུམ་འགྱུར་རྟེན་གཞི་རུ། ལིས་ཀང་དངཀརྨ་ཕུན་ཚོགས་གཉིས་ཀྱིས་ལས་གཞི་ལ་མ་དངུལ་འཇོག་པའི་གནས་ཚུལ་ལ་བཀའ་འདྲི་ཞིབ་ཕྲ་གནང་སྟེ། ཁེ་ལས་ཀྱིས་ཉམས་མྱོང་ཕྱོགས་བསྡོམས་དང་། ས་ཁུལ་གཞན་པའི་སྔོན་ཐོན་ལག་རྩལ་ལ་སློབ་སྦྱོང་དང་དཔྱད་གཞིར་བཟུང་སྟེ། ཚད་གཞི་ཅན་གྱི་ཐོན་སྐྱེད་ལ་སྐུལ་འདེད་གཏོང་བ་དང་། ཚོང་རྟགས་གྲགས་ཅན་དང་ཐོན་ཚད། སྤུས་ཚད་བཅས་ལ་བརྟེན་ནས་འཕེལ་རྒྱས་སྔར་ལས་ཆེ་བ་ཡོང་བར་བྱ་དགོས། ཐོན་ཁུངས་ལེགས་པོར་རྐང་བཙུགས་ཏེ་ཡུལ་སྐོར་ཞིང་ལས་དང་སྤྲོ་གསེང་ཞིང་ལས་འཕེལ་རྒྱས་ཐད་ཤེད་ཤུགས་བཏོན་ནས་ཞིང་པ་དེ་བས་མང་པོའི་འབབ་འཕར་ཕྱུག་འགྱུར་ཡོང་རྒྱུར་སྐུལ་ཁྲིད་བྱ་དགོས་པ་བསྟན།

       རྨ་ཤར་ཤང་སྨད་པ་ཡུལ་ཚོར་ལིས་ཀང་དངཀརྨ་ཕུན་ཚོགས་གཉིས་ཀྱིས་དབུལ་ཕོངས་ལས་ཐར་བའི་མང་ཚོགས་ལ་འཚམ་འདྲི་བྱས་པ་དང་འབྲེལ་དབུལ་པོའི་ཐོན་སྐྱེད་འཚོ་བ་དང་ཡོང་འབབ་ཀྱི་གནས་ཚུལ་ཞིབ་ཕྲར་རྒྱུས་ལོན་བྱས་ནས་ངལ་རྩོལ་པ་ཕྱིར་གཏོང་དང་། སྤྱི་ཕན་རང་བཞིན་གྱི་ལས་གནས་སོགས་ཀྱི་ཐད་ནས་མང་ཚོགས་དབུལ་སྒྲོལ་གྱི་ཡོང་འབབ་ལ་ཞིབ་གཟིགས་བྱས། དེ་མིན་ཁོང་ཚོས་ལས་ལ་ཧུར་བརྩོན་བྱས་ཏེ་ཕྱུག་འགྱུར་ཡོང་བ་བྱས་ནས། སྔར་ལས་བདེ་སྐྱིད་ལྡན་པའི་འཚོ་བ་གསར་པ་སྐྲུན་རྒྱུར་སྐུལ་འདེད་བྱས། དཀར་བརྗིད་ཤང་གཡམ་གྲོང་ཚོར་ལིས་ཀང་དངཀརྨ་ཕུན་ཚོགས་གཉིས་ཀྱིས་གྲོང་གསེབ་ཀྱི་ཐོན་ལས་འཕེལ་རྒྱས་ཀྱི་གནས་ཚུལ་ལ་རྟོག་ཞིབ་གནང་བ་དང་། གྲོང་ཚོའི་ཨུ་ལྷན་གཉིས་དང་མང་ཚོགས་ཀྱིས་ཡིད་ཆེས་བརྟན་པོའི་ངང་འཕེལ་རྒྱས་གཏོང་བ་དང་། གཡམ་གྲོང་ཚོའི་གོ་རེ་ལ་ཚད་མཐུན་སྤུས་རྟགས་གཏོད་གང་ཐུབ་བྱས་ནས་གཉེར་སྐྱོང་བྱེད་སྟངས་ལེགས་བཅོས་ཀྱིས་ཞིང་པར་དོན་ལྡན་གྱི་ཁེ་ཕན་རེག་པར་བྱས་ཏེ་མི་དེ་བས་མང་བ་གྲོང་གསེབ་ཀྱི་ཐོན་ལས་འཕེལ་རྒྱས་ནང་ཞུགས་རྒྱུར་སྐུལ་ཁྲིད་བྱ་དགོས་པ་བསྟན།