ལིས་ཀང་དང་ཀརྨ་ཕུན་ཚོགས་གཉིས་ཀྱིས་མཚོ་ལྷོ་ཁུལ་ཡོངས་ཀྱི་མཐོ་རྒྱུགས་གྲ་སྒྲིག་བྱ་བར་གཟིགས་ཞིབ་གནང་།

       ཟླ6པའི་ཚེས6ཉིན། མཚོ་ལྷོ་ཁུལ་ཨུའི་ཧྲུའུ་ཅི་ལིས་ཀང་དང་། ཁུལ་དཔོན་ཀརྨ་ཕུན་ཚོགས་གཉིས་ཀྱིས་སྣེ་ཁྲིད་དེ་གུང་ཧོ་ས་ཁུལ་གྱི་མཐོ་རྒྱུགས་ལ་ཞིབ་བཤེར་བྱེད་པའི་གྲ་སྒྲིག་ལས་དོན་ལ་གཟིགས་ཞིབ་དང་འབྲེལ་ཡོད་ལས་དོན་མི་སྣར་འཚམས་འདྲི་གནང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སློབ་གསོའི་སྐོར་གྱི་རྣམ་བཤད་གལ་ཆེན་ལ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཏང་གི་ཚོགས་ཆེན་ཐེངས་ཉི་ཤུ་པར་བསྟན་པའི“སློབ་གསོ་དང་། ཚན་རྩལ། ཤེས་ལྡན་མི་སྣ་བཅས་ནི་སྒོ་ཀུན་ནས་སྤྱི་ཚོགས་རིང་ལུགས་དེང་རབས་ཅན་དུ་འགྱུར་བར་འཛུགས་སྐྲུན་བྱེད་པའི་རྒྱལ་ཁབ་ཀྱི་རྨང་གཞིའི་རང་བཞིན་དང་། འཐབ་ཇུས་རང་བཞིན་གྱི་འདེགས་སྐྱོར་ཡིན”ཞེས་པའི་བླང་བྱ་གལ་ཆེན་དམིགས་སུ་བཟུང་ནས་ད་ལོའི་མཐོ་རྒྱུགས་ཀྱི་ལས་དོན་ཡག་པོ་སྒྲུབ་རྒྱུ་ནི་གལ་འགངས་ཆེ་ཚུལ་བསྟན།

       ལིས་ཀང་དང་ཀརྨ་ཕུན་ཚོགས་གཉིས་ཐོག་མར་ཁུལ་རིམ་པའི་རྒྱུགས་ལེན་བཀོད་འདོམས་ལྟེ་གནས་སུ་ཕེབས་ནས་ཁུལ་རིམ་པའི་རྒྱུགས་ལེན་ལས་དོན་ལྟེ་གནས་ཀྱི་འཁོར་སྐྱོད་གནས་ཚུལ་ལ་རྒྱུས་ལོན་དང་། དུས་ལྟར་ཏུ་བཀོད་གཏོང་བྱེད་སྟངས་ལ་བརྟེན་ནས་རྫོང་ཁག་ལྔའི་མཐོ་རྒྱུགས་ཀྱི་ལས་ཀའི་གྲ་སྒྲིག་གནས་ཚུལ་སྙན་སེང་ལ་གསན་པ་དང་། ཞིང་ཆེན་རིམ་པའི་ལྟ་སྐུལ་མཛུབ་ཁྲིད་ཀྱི་ལྡོག་སྐྱེལ་གནད་དོན་དང་ཁུལ་ཐོག་གི་བཀོད་སྒྲིག་ལྟར་རྒྱུགས་མ་བླངས་གོང་དང་། ལེན་བཞིན་པ། བླངས་རྗེས་བཅས་ཀྱི་དུས་རིམ་གསུམ་ལ་དམིགས་ནས་གནད་དོན་སྔོན་ལ་དྲན་པ་དང་། སྔོན་ཇུས་སྔོན་འགོད་བཅས་བྱ་དགོས་པའི་བླང་བྱ་བཏོན།

       ལིས་ཀང་དང་ཀརྨ་ཕུན་ཚོགས་གཉིས་གུང་ཧོ་རྫོང་སློབ་འབྲིང་གི་རྒྱུགས་ར་དང་། བརྙན་རིས་ལྟ་སྐུལ་ཚོད་འཛིན་ཁང་། རྒྱུགས་དཔྱད་ལས་དོན་གསོ་སྦྱོང་བྱ་ཡུལ་བཅས་སུ་བསྐྱོད་དེ་ལས་དོན་ཁག་གི་གྲ་སྒྲིག་གནས་ཚུལ་ལ་རྟོགས་ཞིབ་གནང་སྐབས་བསྟན་དོན། མཐོ་རྒྱུགས་ནི་སློབ་བུ་ཁྲི་སྟོང་མང་པོ་ཞིག་གི་མ་འོངས་མདུན་ལམ་གྱི་འགག་སྒོ་གལ་ཆེན་ཞིག་ཡིན་ཞིང་ཁྱིམ་ཚང་ཁྲི་སྟོང་མང་པོའི་བདེ་རྩར་ཐུག་པའི་ཁེ་ཕན་དང་འབྲེལ་བ་ཡོད་པས། རྒྱ་ཆེའི་མང་ཚོགས་དང་སྤྱི་ཚོགས་ལས་རིགས་ཁག་གིས་དོ་ཁུར་ཆེན་པོ་བྱེད་དགོས། རྒྱལ་ནང་གི་སྔར་གྱི་མཐོ་རྒྱུགས་ནང་ཐོན་པའི་གནད་དོན་དང་། ཛ་དྲག་ཆེ་བའི་གནས་ཚུལ། གློ་བུར་དུ་བྱུང་བའི་དོན་རྐྱེན་ལ་ཕྱོགས་ཡོངས་ནས་གསལ་རྒྱུས་ཡོད་པར་བྱེད་པ་དང་། རྒྱུགས་སྤྲོད་རིང་གི་གནད་དོན་སྣ་ཚོགས་བརྟན་པོའི་སྒོ་ནས་ཐག་གཅོད་བྱས་ཏེ། གློག་ཤུགས་འགན་སྲུང་དང་། བདེ་འཇགས་སྲུང་སྐྱོང་། འགྲིམ་འགྲུལ་དོ་དམ་ཚོད་འཛིན། འཛེར་སྒྲ་ཚོད་འཛིན། སྨན་བཅོས་འགན་ལེན་སོགས་ཀྱི་ལས་དོན་ལ་ཤུགས་སྣོན་བརྒྱབ་ནས་བདེ་འཇགས་དང་། ཞི་འཇགས། སེམས་བདེ་བཅས་ཀྱི་རྒྱུགས་སྤྲོད་ཁོར་ཡུག་བསྐྲུན་ནས་རྒྱུགས་སྤྲོད་སློབ་མ་དང་། ཁྱིམ་བདག སྤྱི་ཚོགས་ཀྱི་བློ་ཡིད་ཚིམ་པོ་ཡོང་བར་བྱ་དགོས། དེ་མིན་དྲང་བདེན་དང་ཞིབ་ཚགས་སྒོས་རྒྱུགས་རའི་དོ་དམ་ལ་ཤུགས་སྣོན་བྱས་ཏེ་གཡོ་ལས་བྱེད་པའི་བྱེད་ཐབས་ནན་འགོག་བཅས་བྱས་ནས་དྲང་པོ་དྲང་གཞག་གི་མཐོ་རྒྱུགས་ཀྱི་མ་མཐའི་ཚད་ཐིག་མཐའ་གཅིག་ཏུ་སྲུང་དགོས་ཞེས་བསྟན།