རང་རྒྱལ་གྱིས་སློབ་སྔོན་སློབ་གསོའི་བཅའ་ཁྲིམས་བཟོ་རྩིས་ཡོད།

       སློབ་སྔོན་སློབ་གསོའི་བཅའ་ཁྲིམས་འཆར་ཟིན་དེ་ཟླ8པའི་ཚེས28ཉིན་སྐབས་བཅུ་བཞི་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་ལྔ་པའི་ཐོག་ཐེངས་དང་པོར་གྲོས་ཞིབ་བྱ་རྒྱུར་ཕུལ། འཆར་ཟིན་དེར་ཁྱོན་བསྡོམས་ལེའུ8དང་དོན་ཚན74ཡོད་པ་དང་། དེའི་ཁྲོད་དུ་སྤྱིའི་རྩ་དོན་དང་། འཆར་འགོད་དང་འཛུགས་སྤེལ། གསོ་སྐྱོང་དང་སློབ་གསོ། དགེ་རྒན་དང་ལས་དོན་མི་སྣ་གཞན་པ། དངུལ་འཇོག་དང་འགན་ལེན། དོ་དམ་དང་ལྟ་སྐུལ། ཁྲིམས་ལུགས་འགན་འཁྲི། ཞར་བྱུང་བཅས་ཚུད་ཡོད།
       འཆར་ཟིན་དེ་གཙོ་བོ་སློབ་སྔོན་སློབ་གསོའི་ངེས་གནས་ཁ་གསལ་བཟོ་བ་དང་། སློབ་གསོའི་ཞན་ཆ་ཁ་གསབ་བྱེད་པ། འཆར་འགོད་གཉེར་སྐྱོང་ལམ་སྲོལ་འཐུས་ཚང་བཅས་སུ་བཏང་ནས་ཐོན་ཁུངས་མཁོ་སྤྲོད་ལ་སྐུལ་འདེད་གཏོང་བ། སློབ་སྔོན་སློབ་གསོ་ལག་བསྟར་ཚད་ལྡན་དུ་བཏང་ནས་སློབ་གསོའི་སྤུས་ཚད་ལ་འགན་ལེན་བྱེད་པ། དགེ་རྒན་དང་ལས་བཟོ་བའི་དཔུང་སྡེ་འཛུགས་སྐྱོང་བྱེད་ཤུགས་ཆེ་རུ་བཏང་ནས་དགེ་རྒན་གྱི་བྱང་ཚད་མཐོ་རུ་གཏོང་བ། དེ་མིན་མ་དངུལ་འཇོག་པའི་ལམ་སྲོལ་འཐུས་ཚང་དུ་གཏོང་བ་དང་གྲོན་དངུལ་འགན་སྲུང་བྱེད་ཤུགས་ཆེ་རུ་གཏོང་བ། ལྟ་སྐུལ་དོ་དམ་སྒྲིག་སྲོལ་འཐུས་ཚང་དུ་གཏོང་བ། ལྟ་སྐུལ་དོ་དམ་ལ་ཤུགས་སྣོན་པ་སོགས་ཕྱོགས་དྲུག་གི་ཐད་ནས་གཏན་འབེབས་བྱ་རྒྱུ་རེད།
       འཆར་ཟིན་ཁྲོད་སློབ་སྔོན་སློབ་གསོ་འཕེལ་རྒྱས་གཏོང་བར་སྲིད་གཞུང་གིས་གཙོ་ཁྲིད་བྱ་རྒྱུ་རྒྱུན་འཁྱོངས་བྱེད་པ་དང་། སྲིད་གཞུང་གིས་གཙོ་གཉེར་བྱེད་པ། ཀུན་ཕན་རང་བཞིན་གྱི་སློབ་སྔོན་སློབ་གསོའི་ཐོན་ཁུངས་འཕེལ་རྒྱས་ལ་ཤུགས་ཆེན་བཏང་ནས་སྤྱི་ཚོགས་ཀྱི་སྟོབས་ཤུགས་ཟབ་ཞུགས་བྱ་རྒྱུར་ཁྲིད་སྟོན་དང་ཚད་ལྡན་དུ་གཏོང་བ་དང་། བུ་བཅོལ་ཁང་གིས་སློབ་སྔོན་སློབ་གསོའི་བྱིས་པའི་ལུས་སེམས་འཕེལ་རྒྱས་ཀྱི་ཆོས་ཉིད་དང་ལོ་ཚོད་ཀྱི་ཁྱད་ཆོས་ལ་གཞིགས་ཏེ། ཚན་རིག་དང་མཐུན་པའི་སྒོ་ནས་གསོ་སྐྱོང་དང་སློབ་གསོའི་བྱེད་སྒོ་སྤེལ་དགོས་པ་མ་གཏོགས། སློབ་ཆུང་སྐབས་ཀྱི་སློབ་ཚན་གྱི་ནང་དོན་དང་སློབ་ཆུང་ཅན་གྱི་སློབ་གསོ་གཏོང་སྟངས་སྤྱད་མི་ཆོག བུ་བཅོལ་ཁང་གིས་སློབ་སྔོན་སློབ་གསོའི་བྱིས་པའི་བདེ་འཇགས་སྲུང་སྐྱོང་བྱ་རྒྱུ་དེ་ཨང་དང་པོར་བཞག་ནས་བདེ་འཇགས་འགན་འཁྲིའི་ལམ་ལུགས་ཀྱི་འབྲེལ་ཡོད་གཏན་འབེབས་དོན་འཁྱོལ་བྱ་དགོས་ལ། རྒྱལ་ཁབ་ཀྱིས་དཔལ་འབྱོར་ཐད་དཀའ་ངལ་ཡོད་པའི་ཁྱིམ་ཚང་གི་སློབ་ལོ་རན་པའི་བྱིས་པ་སོགས་ཀྱིས་ཀུན་ཕན་རང་བཞིན་གྱི་སློབ་གསོ་དང་ལེན་བྱེད་པར་རྒྱུ་ཆ་མཁོ་འདོན་བྱ་དགོས་པ་བཅས་གཏན་འབེབས་བྱ་རྩིས་ཡོད།