ཞི་ཅིན་ཕིང་གི་ཤིས་ཚིག་ནང་ནས་ཁོལ་དུ་ཕྱུང་བའི་སྙིང་བཅུད་བཀའ་མོལ།

       ལོ་གསར་གྱི་སྔ་ནུབ་ཏུ། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་དང་དྲ་སྦྲེལ་བརྒྱུད་སྤྱི་ལོ2024ལོའི་ལོ་གསར་གྱི་ཤིས་ཚིག་སྤེལ་གནང་ཡོད། གཤམ་གསལ་ནི་ལོ་གསར་ཤིས་ཚིག་ནང་ནས་ཁོལ་དུ་ཕྱུང་བའི་སྙིང་བཅུད་བཀའ་མོལ་ཁག་གཅིག་རེད།

       2023ལོར། ང་ཚོས་རྒྱུན་མཐུད་འབད་འཐབ་དང་དཀའ་སྤྱད་མདུན་སྐྱོད་བྱས་ཤིང་། ཆར་རླུང་གི་ཉམས་སད་ཐེག་ཡོད་པ་དང་། དེའི་རིང་མཛེས་སྡུག་ལྡན་པའི་ཡུལ་ལྗོངས་མཐོང་ཡོད་ལ། ལྗིད་ཏིག་ཏིག་གི་གྲུབ་འབྲས་ཀྱང་ཐོབ་ཡོད། ཚང་མས་ལོ་འདི་ལས་སླ་པོ་ཞིག་མིན་པ་བློ་ལ་ངེས་ཡོད་ལ། མ་འོངས་པར་ཡང་ཡིད་ཆེས་ཀྱིས་ཁེངས་ཡོད།

       ལོ་འདིར་ང་ཚོས་གོམ་སྟབས་ཧ་ཅང་བརྟན་པོའི་ངང་སྤོས་ཡོད།
       ལོ་འདིར་ང་ཚོས་གོམ་སྟབས་ཧ་ཅང་ཤུགས་དང་ལྡན་པའི་ངང་སྤོས་ཡོད།
       ལོ་འདིར་ང་ཚོས་གོམ་སྟབས་ཧ་ཅང་ཉམས་དང་ལྡན་པའི་ངང་སྤོས་ཡོད།
       ལོ་འདིར་ང་ཚོས་གོམ་སྟབས་ཧ་ཅང་བློ་གདེང་དང་ལྡན་པའི་ངང་སྤོས་ཡོད།

       ཀྲུང་གོས་རང་སྟོབས་རང་སྤེལ་གྱི་སྙིང་སྟོབས་ཐོག་ནས་འབད་པས་ཡང་རྩེར་འཛེགས་ཤིང་། གང་སར་མཐོང་རྒྱུ་ཡོད་པ་ནི་ཉིན་རེ་བཞིན་འགྱུར་ལྡོག་འགྲོ་བའི་གསར་གཏོད་རེད།

       ཡངས་པའི་ཀྲུང་ཧྭ་ཡི་ལོ་རྒྱུས་ནི་ཅི་འདྲའི་ཡུན་རིང་བ་དང་ཤེས་དཔལ་ནི་ཇི་འདྲའི་འབྱམས་ཀླས་པ་ཞིག་རེད་ཨང་། འདི་ནི་ང་ཚོའི་བློ་སྤོབས་ཀྱི་རྨང་གཞི་དང་སྟོབས་ཤུགས་ཀྱི་འབྱུང་ཁུངས་ཡིན།

       འཛམ་གླིང་ལ་འགྱུར་ལྡོག་གང་འདྲ་བྱུང་ཡང་རུང་། ཞི་བདེ་དང་གོང་འཕེལ་ནི་ཐོག་མཐའ་བར་གསུམ་དུ་དབྱངས་རྟ་གཙོ་བོ་ཡིན་པ་དང་། མཉམ་ལས་མཉམ་རྒྱལ་ནི་ཐོག་མཐའ་བར་གསུམ་དུ་གནས་ལུགས་ངོ་མ་དེ་ཡིན།

       མདུན་སྐྱོད་ཀྱི་ལམ་བུའི་ཐོག་ཆར་རླུང་ནི་རྒྱུན་རྣམ་ཡིན། ཁེ་ལས་ཁག་གཅིག་ལ་ཁེ་གཉེར་ཐད་ཀྱི་གནོན་ཤུགས་འཕྲད་པ་དང་། མང་ཚོགས་ཁག་གཅིག་ལ་ལས་ཞུགས་དང་འཚོ་བའི་ཐད་ཀྱི་དཀའ་ངལ་འཕྲད་པ། ས་ཁུལ་འགའ་ཤས་སུ་ཆུ་ལོག་དང་རྒྱ་མཚོའི་རླུང་འཚུབ། ས་ཡོམ་སོགས་རང་བྱུང་གནོད་འཚེ་ཕོག་ཡོད། འདི་དག་ཚང་མ་ནི་ང་རང་ནས་སེམས་ཁུར་བྱེད་ས་ཡིན། ཚང་མས་ཆར་རླུང་ལ་མི་སྐྲག་པར་ཕན་ཚུན་རོགས་རེས་བྱེད་པ་དང་། དཀའ་ཉེན་གྱི་མདུན་བསུས་ནས་འགག་གཏོར་དཀའ་སེལ་བྱེད་པ་མཐོང་སྐབས། ང་རང་སེམས་འགུལ་ཆེན་པོ་ཐེབས་ཀྱི་འདུག

       མི་ཕལ་པ་མི་རེ་ངོ་རེས་སྤྱིར་བཏང་མ་ཡིན་པའི་ལེགས་སྐྱེས་ཕུལ་ཡོད། མི་དམངས་ནི་དུས་ནམ་ཡང་ང་ཚོ་དཀའ་ངལ་མཐའ་དག་ལས་རྣམ་པར་རྒྱལ་བར་བྱེད་པའི་རྒྱབ་རྟེན་ཆེ་ཤོས་དེ་རེད།

       བསྒྱུར་བཅོས་སྒོ་དབྱེ་ཁྱོན་ཡོངས་ནས་གཏིང་ཟབ་ཏུ་བཏང་ནས། གོང་འཕེལ་གྱི་སེམས་ཤུགས་སྔར་བས་ཆེ་རུ་གཏོང་བ་དང་། དཔལ་འབྱོར་གྱི་གསོན་ཤུགས་ཆེ་རུ་གཏོང་བ། ཤུགས་ཚད་དེ་བས་ཆེ་བའི་ཐོག་ནས་སློབ་གསོ་གཉེར་བ་དང་། ཚན་རྩལ་དར་སྤེལ་གཏོང་བ། ཤེས་ལྡན་མི་སྣ་གསོ་སྐྱོང་བཅས་བྱ་དགོས།

       ཤང་ཀང་དང་ཨའོ་མོན་ནས་རང་ངོས་ཀྱི་བཟང་ཆ་འདོན་སྤེལ་བྱས་ཐོག རྒྱལ་ཁབ་གོང་འཕེལ་གྱི་གནས་བབ་ཆེན་པོའི་ཁྲོད་དེ་བས་ལེགས་པའི་སྒོ་ནས་ཞུགས་ཏེ་ཡུན་རིང་དར་རྒྱས་བརྟན་ལྷིང་ཡོང་བ་བྱ་རྒྱུར་མུ་མཐུད་རྒྱབ་སྐྱོར་བྱ་དགོས། མེས་རྒྱལ་གོང་བུ་གཅིག་གྱུར་ནི་ལོ་རྒྱུས་ཀྱི་ལྡོག་མེད་ཆོས་ཉིད་ཅིག་རེད། མཚོ་འགག་གཡས་གཡོན་གཉིས་ཀྱི་སྤུན་ཟླས་ལག་སྦྲེལ་སེམས་མཐུན་ངང་མི་རིགས་བསྐྱར་དར་གྱི་གཟི་བརྗིད་རླབས་པོ་ཆེ་མཉམ་སྤྱོད་བྱ་དགོས།

       ང་ཚོའི་དམིགས་འབེན་ནི་ཧ་ཅང་བརྗིད་ཆེ་བ་ཞིག་ཡིན་ལ། ཧ་ཅང་བབ་ཆགས་པ་ཞིག་ཀྱང་ཡིན། མཐར་གཏུགས་ནས་བཤད་ན་མང་ཚོགས་རྣམས་འཚོ་བ་དེ་བས་ཡག་པ་སྐྱེལ་རྒྱུ་ཡོང་བ་བྱ་རྒྱུ་དེ་རེད།

       ཕྲུ་གུའི་གསོ་སྐྱོང་དང་སློབ་གསོ། ན་གཞོན་གྱི་ལས་ཞུགས་དང་འཇོན་ཐང་ཆེ་རུ་གཏོང་རྒྱུ། རྒན་རྒོན་གྱི་སྨན་བཅོས་དང་རྒན་གསོ་བཅས་ནི་ཁྱིམ་དོན་ཡིན་ལ་རྒྱལ་དོན་ཡང་ཡིན་པས། ཚང་མས་མཉམ་དུ་འབད་པ་བྱས་ནས་དོན་དག་འདི་དག་ཡག་པོ་བསྒྲུབ་དགོས།

       ཚང་མ་ཐུགས་སེམས་སྤྲོ་པོ་དང་མི་ཚེ་སྐྱ་ནམ་རྒྱས་པོ། བསམ་འདུན་ལྷུན་འགྲུབ་ཡོང་བ་བྱ་དགོས།

       ཀྲུང་གོའི་མི་དམངས་ཀྱིས་ཞི་བདེ་ནི་ཧ་ཅང་རྩ་ཆེ་བ་ཞིག་ཡིན་པ་ཤེས་ཀྱི་ཡོད། ང་ཚོས་རྒྱལ་སྤྱིའི་སྤྱི་ཚོགས་དང་ལྷན་དུ་མིའི་རིགས་ཀྱི་མདུན་ལམ་སེམས་ལ་འཆང་བ་དང་། མི་དམངས་ལ་བདེ་སྐྱིད་བསྐྲུན་རྒྱུ་ཡིད་ལ་ངེས་ཐོག མིའི་རིགས་ཀྱི་ལས་དབང་གཅིག་མཐུན་མ་ལག་གཏོད་རྒྱུར་སྐུལ་འདེད་བཏང་སྟེ། དེ་བས་མཛེས་སྡུག་ལྡན་པའི་འཛམ་གླིང་བསྐྲུན་འདོད་ཡོད།

       ང་ཚོས་མཉམ་དུ་མེས་རྒྱལ་དར་རྒྱས་མངའ་ཐང་རྒྱས་པ་དང་། འཛམ་གླིང་ཞི་བདེ་དང་ལྷིང་འཇགས་ཡོང་བའི་སྨོན་འདུན་ཞུ། ལྷན་རྒྱས་དུས་དང་རྣམ་པ་ཀུན་ཏུ་བདེ་སྐྱིད་ལྡན་པ་དང་སྐུ་འཚོ་གསལ་ཐང་ཡོང་བའི་སྨོན་འདུན་ཞུ།