མཚོ་ལྷོ་ཁུལ་སྲིད་གྲོས་སྐབས14བའི་གྲོས་ཚོགས་ཐེངས་བཞི་བ་མཇུག་བསྒྲིལ།

ལིས་ཀང་དང་ཀརྨ་ཕུན་ཚོགས། མཱ་ཅན་ཧུང་བཅས་ཚོགས་འདུར་ཞུགས་ཤིང་། ཚེ་རིང་གིས་མགོ་འཛིན་བྱས་པ།
 

       ཟླ2པའི་ཚེས4ཉིན། ཁུལ་སྲིད་གྲོས་སྐབས་བཅུ་བཞི་བའི་གྲོས་ཚོགས་ཐེངས་བཞི་བའི་གྲོས་རིམ་ཁག་བདེ་བླག་ངང་ལེགས་འགྲུབ་བྱུང་ནས་ཁུལ་གྲོས་ཚོགས་ལྟེ་གནས་སུ་རྒྱལ་ཁའི་ངང་མཇུག་བསྒྲིལ་བ་རེད། གྲོས་ཚོགས་ལས་ཁུལ་ཡོངས་ཀྱི་རིམ་པ་སོ་སོའི་སྲིད་གྲོས་རྩ་འཛུགས་དང་སྲིད་གྲོས་ནང་ཞུགས་པའི་ལས་ཁུངས་སོ་སོ། རྒྱ་ཆེའི་སྲིད་གྲོས་ཨུ་ཡོན་བཅས་ཀྱིས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་དབྱང་གི་མཐའ་འཁོར་དུ་མཐུན་སྒྲིལ་དམ་ཟབ་བྱེད་པ་དང་། ཀྲུང་གུང་མཚོ་ལྷོ་ཁུལ་ཨུའི་འགྱུར་མེད་སྣེ་ཁྲིད་འོག ནུས་ཤུགས་ཡོད་རྒུས་གུང་ཧོ་གཤོངས་ས་ཆེན་པོ་ལྗང་མདོག་དར་རྒྱས་ཡོང་བར་སྐུལ་འདེད་གཏོང་བའི་བྱ་བའི་ཁྲོད་ཧུར་ཐག་སྒོས་ཞུགས་པ་དང་། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་ལྷོ་གསར་པ་འཛུགས་སྐྲུན་བྱེད་པར་ཤུགས་སྣོན་པ། སྲིད་གྲོས་ཀྱི་འགན་འཁྲི་གསར་པ་མངོན་པ། སྲིད་གྲོས་ཀྱི་བྱས་རྗེས་གསར་པ་མངོན་པ། སྲིད་གྲོས་ཀྱི་སྣང་བརྙན་གསར་པ་འཛུགས་པ། སྲིད་གྲོས་ཀྱི་བྱས་རྗེས་གསར་པ་བཅས་འཇོག་དགོས་པའི་འབོད་སྐུལ་བཏང་།

       གྲོས་ཚོགས་དེ་ཁུལ་སྲིད་གྲོས་ཀྱི་ཀྲུའུ་ཞི་ཚེ་རིང་གིས་མགོ་འཛིན་བྱས་ཤིང་། ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་ཀྲའོ་ཀུའེ་ལེན་དང་ཅིན་ཡུང་ཅེ། བསོད་ནམས་སྐྱིད། ཀུན་བཟང་པདྨ་རྣམ་རྒྱལ། ཧུའོ་ཆིང་། དྲུང་ཡིག་ཆེན་མོ་སེང་ཁྲེང་ཡེ་བཅས་ཀྲུའུ་ཞིའི་སྟེགས་བུའི་མདུན་གྲལ་དུ་བཞུགས་ཡོད།

       གྲོས་ཚོགས་ལ་ཐོན་དགོས་པའི་ཨུ་ཡོན251ཡོད་ལ། དངོས་སུ་ཐོན་ཡོད་པའི་ཨུ་ཡོན206ཡོད་པས་གཏན་འཁེལ་གྱི་མི་གྲངས་དང་མཐུན།

       གྲོས་ཚོགས་ལས་སྲིད་གྲོས་སྐབས་བཅུ་བཞི་བའི་མཚོ་ལྷོ་བོད་རིགས་རང་སྐྱོང་ཁུལ་ཨུ་ཡོན་ལྷན་ཁང་གི་གྲོས་ཚོགས་ཐེངས་བཞི་བའི་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུའི་སྐོར་གྱི་གྲོས་ཆོད་དང་། སྲིད་གྲོས་སྐབས་བཅུ་བཞི་བའི་མཚོ་ལྷོ་བོད་རིགས་རང་སྐྱོང་ཁུལ་ཨུ་ཡོན་ལྷན་ཁང་གི་གྲོས་ཚོགས་ཐེངས་བཞི་བའི་གྲོས་ཆོད། སྲིད་གྲོས་སྐབས་བཅུ་བཞི་བའི་གྲོས་ཚོགས་ཐེངས་གསུམ་པ་འཚོགས་ཚུན་གྱི་གྲོས་གཞིའི་བྱ་བ་བསྒྲུབས་ཚུལ་གྱི་སྙན་ཞུའི་སྐོར་གྱི་སྲིད་གྲོས་སྐབས་བཅུ་བཞི་བའི་མཚོ་ལྷོ་བོད་རིགས་རང་སྐྱོང་ཁུལ་ཨུ་ཡོན་ལྷན་ཁང་གི་གྲོས་ཚོགས་ཐེངས་བཞི་བའི་ཆབ་སྲིད་གྲོས་ཆོད་བཅས་ལ་རིམ་པ་བཞིན་གྲོས་འཆམ་བྱུང་།

       ཚེ་རིང་གིས་གཏམ་བཤད་ཁྲོད་བསྟན་དོན། གྲོས་ཚོགས་འདི་ལ་མཐུན་སྒྲིལ་དམངས་གཙོ་དང་འབད་འབུངས་ཡར་བརྩོན་གྱི་རྣམ་པས་ཁེངས་ཡོད་ལ། དར་ཆ་མཐོན་པོར་སྒྲེང་བ་དང་སེམས་ཤུགས་གཅིག་སྒྲིལ་གྱི་ཚོགས་ཆེན་ཐེངས་ཤིག་ཀྱང་ཡིན། གྲོས་ཚོགས་སྐབས་སུ། ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པའམ་ཀྲུང་གུང་མཚོ་ལྷོ་ཁུལ་ཨུའི་ཧྲུའུ་ཅི་ལིས་ཀང་དང་ཀྲུང་གུང་མཚོ་ལྷོ་ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀརྨ་ཕུན་ཚོགས་སོགས་མགོ་ཁྲིད་བློ་མཐུན་མཇུག་བསྒྲིལ་ཚོགས་འདུར་ཞུགས་པར་མ་ཟད། ཚོ་ཆུང་གི་གྲོས་བསྡུར་ནང་ཞུགས་ཏེ་ཨུ་ཡོན་རྣམས་དང་མཉམ་དུ་འཕེལ་རྒྱས་ཀྱི་ཇུས་ཆེན་དང་ཕྱུག་འགྱུར་ཐབས་ཇུས། བྱ་གཞག་དར་རྒྱས་སུ་གཏོང་བའི་བྱ་བའི་ཐད་མཉམ་དུ་བསམ་ཚུལ་བརྗེ་རེས་བྱས་ཏེ། མགོ་ཁྲིད་ལས་བྱེད་ཀྱི་དམངས་གཙོ་དར་སྤེལ་དུ་གཏོང་བའི་སྤྱོད་ཚུལ་བཟང་པོ་མཚོན་ཡོད། སྲིད་གྲོས་ཨུ་ཡོན་ཡོངས་ཀྱིས་རྒྱལ་ཁབ་ཀྱི་རླབས་ཆེན་བྱ་གཞག་དང་ཞིང་ཆེན་གྱི་འཆར་བཀོད་ཆེན་མོ། ཁུལ་གྱི་དོན་དག་གལ་ཆེན་དང་དམངས་ཀྱི་རེ་འདུན་བཅས་སེམས་ལ་ཉར་ཏེ། ཁུལ་སྲིད་གཞུང་བྱ་བའི་སྙན་ཞུ་དང་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ། དེ་མིན་སྙན་ཞུ་གཞན་དག་དང་ཆོད་ཡིག་ལ་ནན་གྱིས་གྲོས་ཞིབ་བྱས་ནས་འདེམས་བསྐོའི་འགན་འཁྲི་ལེགས་འགྲུབ་བྱུང་བས། རྒྱལ་ཁབ་དང་དམངས་ཀྱི་ཆེད་དུ་ཡོད་ཚད་ཕྲག་ཏུ་འཁུར་ཐུབ་པ་མཚོན་ཡོད།

       ཚེ་རིང་གིས་བཤད་རྒྱུར། ད་ལོ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་མི་དམངས་སྲིད་གྲོས་དབུ་བརྙེས་ནས་ལོ་ངོ75ལོན་པའི་ལོ་ཡིན་ལ། ལོ་ལྔའི་འཆར་གཞི་བཅུ་བཞི་བའི་འཆར་འགོད་ལག་བསྟར་གཏིང་ཟབ་བྱེད་པའི་གནད་འགག་གི་ལོ་ཞིག་ཀྱང་ཡིན་པས། ད་ལོའི་ལས་དོན་ཁག་ལེགས་པར་བསྒྲུབ་པར་དོན་སྙིང་གལ་ཆེན་ལྡན། ཀྲུང་གུང་མཚོ་ལྷོ་ཁུལ་ཨུའི་སྐབས་བཅུ་བཞི་བའི་ཚང་འཛོམས་གྲོས་ཚོགས་ཐེངས་བརྒྱད་པས་གུང་ཧོ་གཤོངས་སའི་ལྗང་མདོག་དར་རྒྱས་ཡོང་བར་སྐུལ་འདེད་དང་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་ལྷོའི་འཛུགས་སྐྲུན་བྱེད་ཚད་ཇེ་མགྱོགས་སུ་བཏང་སྟེ། ཁུལ་ཡོངས་ཀྱི་གོང་འོག་ཚང་མར་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་བྱེད་པར་སྟོབས་ཤུགས་བསྩལ། ཁུལ་ཡོངས་ཀྱི་རིམ་པ་སོ་སོའི་སྲིད་གྲོས་དང་སྲིད་གྲོས་ལ་ཞུགས་པའི་ལས་ཁུངས་སོ་སོ། རྒྱ་ཆེའི་སྲིད་གྲོས་ཨུ་ཡོན་རྣམས་ཀྱིས་དུས་ནམ་ཡང་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་པ་དང་། ཀྲུང་གུང་མཚོ་ལྷོ་ཁུལ་ཨུའི་འགྱུར་མེད་སྣེ་ཁྲིད་འོག ཁུལ་ཡོངས་ཀྱི་ཚོགས་ཆེན་གཉིས་ཀྱི་བཀོད་འདོམས་གཞིར་བཟུང་སྟེ་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་ལྷོ་གསར་བར་སྲིད་གྲོས་ཀྱི་བློ་གྲོས་དང་སྟོབས་ཤུགས་འབུལ་དགོས་ཏེ། གཅིག་ནས་ཆབ་སྲིད་ཀྱི་ལངས་ཕྱོགས་ཇེ་བརྟན་དུ་བཏང་ནས་བསམ་བློ་གསར་པར་སློབ་སྦྱོང་དང་སྲོག་ཤིང་གི་རྗེས་སུ་དམ་པོར་འབྲངས་དགོས། ཀྲུང་གོའི་ལུགས་ཀྱི་དེང་རབས་ཅན་དུ་འགྱུར་བར་སྐུལ་འདེད་གཏོང་བའི་ཆབ་སྲིད་ཆེ་ཤོས་དེ་བློ་ལ་བརྟན་པོར་ངེས་དགོས་པ་དང་། ཏང་གི་མགོ་ཁྲིད་དང་འཐབ་ཕྱོགས་གཅིག་གྱུར། གྲོས་མོལ་དམངས་གཙོ་ཟུང་འབྲེལ་དམ་ཚགས་བྱ་རྒྱུ་རྒྱུན་འཁྱོངས་བྱས་ཏེ། བསམ་བློ་དང་ཆབ་སྲིད་ཀྱི་ཀུན་སྤྱོད་དུས་ནམ་ཡང་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བར་བྱ་དགོས། བྱ་སྤྱོད་དངོས་ཀྱི་ཐོག་ནས་གཏན་འཁེལ་གཉིས་ལ་བློ་བརྟན་འགྱུར་མེད་ཀྱིས་སྲུང་སྐྱོང་དང་སྲུང་སྐྱོང་གཉིས་བྱེད་ཐུབ་པ། དུས་ནམ་ཡང་ཏང་གི་མགོ་ཁྲིད་དེ་སྲིད་གྲོས་བྱ་བའི་ཕྱོགས་གང་ཅིའི་ཐད་ཀྱི་བརྒྱུད་རིམ་ཧྲིལ་པོར་ཁྱབ་པར་བྱས་ཏེ། ཆབ་སྲིད་ཀྱི་འགན་འཁྲི་སྔར་ལས་དོན་འཁྱོལ་ཡོང་བར་བྱ་དགོས། གཉིས་ནས་འཕེལ་རྒྱས་ཀྱི་སྤྱི་ཡོངས་ལ་དམིགས་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རོགས་བྱེད་པའི་ཁྲོད་འགན་འཁྲི་འཁུར་ཕོད་པ་དང་ལྟེ་བར་ཞབས་འདེགས་ཞུ་དགོས།ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུ་བའི་མི་དམངས་སྲིད་གྲོས་ཀྱི་འགན་འཁྲི་སྒྲུབ་པའི་རྩ་དོན་དང་ཁུལ་ཡོངས་ཀྱི2024ལོའི་འཕེལ་རྒྱས་ཀྱི་དམིགས་འབེན་ལས་འགན་ལ་དམ་པོར་དམིགས་ཏེ། བརྟན་ཐོག་ཡར་འཕེལ་ཡོང་བར་འབད་པའི་སྤྱིའི་བྱ་བར་རྒྱུན་འཁྱོངས་སྒོས་སྐྱེ་ཁམས་ལ་བརྟེན་ནས་ཁུལ་འཛུགས་པ་དང་ཞིང་ཕྱུགས་ལ་བརྟེན་ནས་ཁུལ་སྐྱོང་བ། ནུས་ཁུངས་གཙང་མར་བརྟེན་ནས་ཁུལ་སྟོབས་ལྡན་དུ་བསྒྱུར་བའི་འཐབ་ཇུས་སོགས་ཁུལ་ཡོངས་ཀྱི་ལྟེ་བའི་བྱ་བར་དམིགས་ཏེ། བརྟག་དཔྱད་ཞིབ་འཇུག་དང་ཆབ་སྲིད་གྲོས་མོལ། དམངས་གཙོ་ལྟ་སྐུལ་དང་ཚོང་འགུག་མ་འདྲེན། འཇོན་མི་ནང་འདྲེན། མཉམ་འབྲེལ་སོགས་ཀྱི་ཐད་ཐབས་འདོན་ཤུགས་འདོན་བྱས་ཏེ། སྤུས་ལེགས་ཐོན་ཁུངས་དང་གསར་གཏོད་ཀྱི་གསོན་ཤུགས་རྒྱས་དགོས། གསུམ་ནས་སྟོབས་ཤུགས་གཅིག་ཏུ་སྒྲིལ་བ་རྒྱུན་འཁྱོངས་བྱས་ཏེ། མི་དམངས་སྲིད་གྲོས་ཀྱི་ནུས་པ་འདོན་སྤེལ་གང་ལེགས་བྱ་དགོས། སྤྱི་ཚོགས་ལས་རིགས་ཁག་གི་བློ་གྲོས་སྟོབས་ཤུགས་གཅིག་ཏུ་སྒྲིལ་ནས་སྤྱི་ཚོགས་ཀྱི་ལས་རིགས་ཁག་དང་ཞིང་ཆེན་ཕྱི་ནང་གི་སྲིད་གྲོས་རྩ་འཛུགས་དང་འབྲེལ་འདྲིས་གཏིང་ཟབ་སྒོས་འཕེལ་རྒྱས་ལ་ཐབས་འདོན་ཇུས་འབུལ་བྱ་དགོས།བཞི་ནས་མི་དམངས་གོང་དུ་བཀུར་བ་གཙོར་བཟུང་སྟེ་མཉམ་དུ་ཕྱུག་པོར་འགྱུར་བ་དམིགས་འབེན་དང་དམངས་སེམས་ལ་འཆང་བར་བྱས་ནས།མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཏེ། དུས་ནམ་ཡང་མི་དམངས་མང་ཚོགས་ཀྱིས་བདེ་སྐྱིད་འཚོ་བར་བཅངས་བའི་རེ་བ་དེ་སྲིད་གྲོས་ཀྱི་བྱ་བའི་མགོ་རྩོམ་སར་བཞག་སྟེ། མཉམ་འབྲེལ་བརྒྱད་ཀྱི་བྱ་བའི་ལམ་སྲོལ་དང་རིགས་དྲུག་གི་ཆེད་མཁས་པའི་ཞབས་ཞུ་ཚོགས་པ། “1244+N”དང“དོན་དག་ཡོད་ན་གྲོས་མོལ་བྱ་ཆོག”སོགས་གྲོས་མོལ་སྟེགས་བུའི་ནུས་པ་འདོན་སྤེལ་གང་ལེགས་བྱེད་པ། རིགས་སོ་སོའི་མང་ཚོགས་ཀྱིས་ཡོངས་ཁྱབ་ཏུ་དོ་ཁུར་བྱེད་པའི་ལས་ཞུགས་དང་སློབ་གསོ། སྨན་བཅོས། བདེ་སྡོད་སོགས་དམངས་ཚིས་དོན་དངོས་ལ་དམིགས་ནས་གྲོས་མོལ་གཏིང་ཟབ་བྱས་ཏེ། དམངས་ཀྱི་དོན་དུ་གཏམ་བཤད་པ་དང་དམངས་ཀྱི་དོན་དུ་ཇུས་གཞི་འདོན་པ། དམངས་ཀྱི་དོན་དུ་ཁེ་ཕན་བསྒྲུབ་པ་བཅས་བྱ་དགོས།ལྔ་ནས་འགན་འཁྲི་སྒྲུབ་པའི་རྨང་གཞི་ཇེ་བརྟན་དུ་བཏང་ནས་སྙིང་སྟོབས་ཆེར་སྐྱེད་དང་ཐོག་མའི་བསམ་འདུན་བརྩི་སྲུང་བྱེད་པའི་སྲིད་གྲོས་ཀྱི་སྣང་བརྙན་མངོན་པར་བྱ་དགོས། དུས་ནམ་ཡང་སློབ་སྦྱོང་དང་ལས་སྒོའི་གསོ་སྦྱོང་ལ་ཤུགས་སྣོན་པ། བདེན་འཚོལ་དངོས་གཉེར་དང་དམ་པ་དོན་གཉེར་གྱི་སྤྱོད་ཚུལ་བཟང་པོ་དར་སྤེལ་དུ་གཏོང་བ།ལས་བྱེད་པས་རང་འགུལ་གྱིས་བྱ་བ་སྒྲུབ་པ་དང་།བསམ་ཕྱོགས་གསལ་དགོས་པ། རང་གཅུན་ནན་མོ་བྱེད་པ་བཅས་ཀྱི་བྱ་བའི་བླང་བྱ་ལག་ལེན་དུ་བསྟར་བ། བློ་རྩེ་གཅིག་སྒྲིམ་གྱིས་ལས་དོན་སྒྲུབ་པ་དེ་སྲིད་གྲོས་ཀྱི་ལས་སྟངས་གསར་བ་ཞིག་ཏུ་འགྱུར་དགོས།