མཚོ་ལྷོ་ཁུལ་ཐད་གཏོགས་ལས་ཁུངས་སོ་སོས་ཚོགས་ཆེན་གཉིས་ཀྱི་དགོངས་དོན་ལ་སློབ་སྦྱོང་དང་དོན་འཁྱོལ་བྱས་པ།

       མཚོ་ལྷོ་ཁུལ་ཡོངས་ཀྱི་ཚོགས་ཆེན་གཉིས་བདེ་བླག་གིས་མཇུག་བསྒྲིལ་རྗེས། ཁུལ་ཐད་གཏོགས་ལས་ཁུངས་སོ་སོས་ཚོགས་ཆེན་གཉིས་ཀྱི་དགོངས་དོན་ལ་སློབ་སྦྱོང་དང་དོན་འཁྱོལ་བྱ་རྒྱུ་ནི་མིག་སྔའི་ཆབ་སྲིད་ཀྱི་འགན་འཁྲི་གལ་ཆེན་ཞིག་ཏུ་བརྩིས་ཏེ། གཅིག་གྱུར་གྱིས་བཀོད་འདོམས་ཞིབ་ཚགས་བྱས་ནས་ཚང་འཛོམས་གྲོས་ཚོགས་དང་ཚོགས་ཆེན་གཉིས་ཀྱི་དགོངས་དོན་ལ་སློབ་སྦྱོང་དང་དོན་འཁྱོལ་གང་ལེགས་བྱས།
       ཚོགས་ཆེན་མཇུག་བསྒྲིལ་རྗེས་ཁུལ་མི་དམངས་ཞིབ་དཔྱོད་ཁང་གིས་ཚོགས་ཆེན་གཉིས་ཀྱི་དགོངས་དོན་དུས་ཐོག་ཏུ་བརྒྱུད་སྒྲོག་དང་སློབ་སྦྱོང་བྱས་ཏེ། ཁུལ་ཡོངས་ཀྱི་ཞིབ་དཔྱོད་ལས་ཁུངས་ཀྱིས་བསམ་བློ་དང་བྱ་སྤྱོད་གཉིས་ཚོགས་ཆེན་གཉིས་ཀྱི་དགོངས་དོན་སྟེང་གཅིག་གྱུར་བྱ་དགོས་པའི་བླང་བྱ་བཏོན། ངོས་འཛིན་ཆེར་བསྐྱེད་དང་སློབ་སྦྱོང་ཇེ་ལེགས། ལག་ལེན་དམ་འཛིན་བཅས་བྱས་ནས་ཞིབ་དཔྱོད་ལས་དོན་གྱི་སྤྱི་ཡོངས་ལ་ཞབས་འདེགས་ཞུ་བའི་མགོ་རྩོམ་ས་དང་ཟུང་འབྲེལ་གྱི་གནད་འགག་འཚོལ་བ། ཞིབ་དཔྱོད་ཀྱི་འགན་ནུས་ལ་གཞི་བཙུགས་ནས་མཚོ་ལྷོའི་ཞིབ་དཔྱོད་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། ཀྲུང་གོའི་ལུགས་ཀྱི་མཚོ་སྔོན་གྱི་ལེའུ་ཁྲོད་མཚོ་ལྷོའི་ཞིབ་དཔྱོད་ཀྱི་ལས་དོན་ཐད་བྱས་རྗེས་འཇོག་གང་ཐུབ་བྱ་དགོས།
       དམངས་སྲིད་ལས་དོན་གྱི་དོན་དངོས་དང་ཟུང་འབྲེལ་བྱས་ཏེ་རང་ཁུལ་གྱི་ཚོགས་ཆེན་གཉིས་ཀྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱ་དགོས་ཤིང་། སྒོས་སུ་དམངས་ཚིས་ལེགས་བཅོས་བྱས་ཏེ་མང་ཚོགས་ཀྱི་སྐྱིད་སྣང་ཆེ་རུ་གཏོང་བའི་ཐད་ནུས་ཤུགས་བཏོན་ནས་བྱེ་བྲག་གི་བྱ་བའི་ལག་ལེན་ཁྲོད་ནས་མི་དམངས་བླ་ན་མེད་པ་དང་དམངས་ལ་ཕན་བདེ་བསྐྲུན་པའི་འགན་འཁྲི་མཚོན་དགོས། ཁུལ་དམངས་སྲིད་ཅུའུ་ཡི་ཅུའུ་ཀྲང་གཞོན་པ་ལི་ཡུས་ཆིན་གྱིས་བཤད་རྒྱུར། གཞི་རྩའི་དམངས་ཚིས་འགན་སྲུང་དང་སྤྱི་ཚོགས་ཞབས་ཞུ་ལེགས་བསྒྱུར། སྤྱི་ཚོགས་བཅོས་སྐྱོང་གསར་གཏོད་བཅས་བྱ་རྒྱུ་དེ་བྱ་བའི་གཙོ་གནད་དུ་བཟུང་སྟེ། ནུས་ཤུགས་ཡོད་རྒུས་དམངས་ཚིས་འགན་ལེན་དང་། མ་མཐའི་ཚད་གཞི་དང་། དཀའ་ཁག་སེལ་བ། གཏན་འཇགས་ལ་སྐུལ་འདེད་བྱེད་པ། དམངས་སྲིད་བྱ་གཞག་འཕེལ་རྒྱས་ཀྱི་གསོན་ཤུགས་དང་བསྒྱུར་བཅོས་གསར་གཏོད་ཀྱི་སྒུལ་ཤུགས་ཆེ་རུ་བཏང་སྟེ། ཁུལ་ཡོངས་ཀྱི་དཀའ་ངལ་ཡོད་པའི་མང་ཚོགས་ཀྱི་ཐོབ་སྣང་དང་སྐྱིད་སྣང། བདེ་སྣང་བཅས་མཐོར་འདེགས་སུ་གཏོང་དགོས།
       ལོ་སར་རྗེས་ཀྱི་ལས་ཞུགས་ཀྱི་ཉིན་དང་པོར། ཁུལ་འགྲིམ་འགྲུལ་སྐྱེལ་འདྲེན་ཅུའུ་ཡིས་ཏང་ཙུའུ་ཡི་རྒྱ་བསྐྱེད་གྲོས་ཚོགས་བསྡུས་ཤིང་། ཁུལ་ཡོངས་ཀྱི་ཚོགས་ཆེན་གཉིས་ཀྱི་དགོངས་དོན་སློབ་སྦྱོང་དང་བརྒྱུད་སྒྲོག་བྱས་ཏེ་ད་ལོར་གུང་ཧོའི་གནམ་གྲུ་ཐང་གི་འཛུགས་སྐྲུན་ལ་ཤུགས་བསྣན་ནས་གུང་ཧོའི་བདེ་སྐྱིད་ཐང་བར་གྱི་འགྲིམ་འགྲུལ་དང་། ཁྲི་ཀ་ནས་ཐུན་ཏེ་བར་གྱི་རིམ་པ་དང་པོའི་གཞུང་ལམ། ཞིན་ཧེའི་ལྷོ་རྒྱུད་ཤང་གསུམ་གྱི་གཞུང་ལམ་རིམ་སྤར་སོགས་ཀྱི་ལས་གཞི་ལག་བསྟར་ཡག་པོ་བྱས་ཏེ་འགྲིམ་འགྲུལ་བཟོ་སྐྲུནལ་སྐུལ་འདེད་ནུས་ལྡན་གཏོང་དགོས། རང་བྱུང་སྡེ་བ10ཡི་སྲ་ལམ་དང་ལམ་ལུགས་ཅན་གྱི་སྡེ་བ4ཡི་གཞུང་ལམ། ཤང་གྲོང་གཉིས་ཀྱི་རིམ་པ་གསུམ་པའི་གཞུང་ལམ་བཅས་ལས་གཞི་ལེགས་འགྲུབ་ཡོང་བར་བྱས་ནས་སྟབས་བདེ་དང་ནུས་ལྡན་ཡིན་པའི་འགྲིམ་འགྲུལ་དྲ་བ་བསྐྲུན་ཏེ། ཞིང་ཆེན་ཡོངས་ཀྱི་བཟང་བོ་བཞིའི་ཞིང་སྡེ་གཞུང་ལམ་དཔེ་སྟོན་ཁུལ་བརྩོན་ལེན་བྱ་དགོས།
       ཁུལ་སློབ་གསོ་ཅུའུ་ཡི་ཏང་ཙུའུ་ཧྲུའུ་ཅིའམ་ཅུའུ་ཀྲང་སྒྲོལ་མ་འབུམ་གྱིས་ཀརྨ་ཕུན་ཚོགས་ཀྱིས་སྲིད་གཞུང་བྱ་བའི་སྙན་ཞུའི་ཁྲོད་བཏོན་པའི་སྤུས་ལེགས་སློབ་གསོ་འཕེལ་རྒྱས་སུ་གཏོང་དགོས་ན་དམངས་ཚིས་ལེགས་བཅོས་རྩ་བའི་དམིགས་ཡུལ་དུ་བཟུང་སྟེ། མི་དམངས་ཀྱི་བདེ་སྐྱིད་ཚད་གཞི་མཐོ་རུ་གཏོང་བའི་ཐད་ཐོལ་བརྒལ་གསར་པ་ཡོང་བར་བྱ་དགོས་ཞེས་ང་ཚོར་ཁ་ཕྱོགས་གསལ་སྟོན་བྱས་ཡོད། རྗེས་མར་ང་ཚོས་ཚོགས་ཆེན་གཉིས་ཀྱི་དགོངས་དོན་ལག་བསྟར་དོན་འཁྱོལ་བྱས་ཏེ་སློབ་གྲྭ་ཆུང་འབྲིང་གི་ཏང་རྩ་འཛུགས་ཀྱི་མགོ་ཁྲིད་ལ་སྐུལ་འདེད་གཏིང་ཟབ་གཏོང་བའི་འགན་འཁུར་ལམ་ལུགས་དང་། ཏང་འཛུགས་སྐྱོང་དང་སློབ་གསོའི་སློབ་ཁྲིད་ཀྱི་ལས་དོན་མཉམ་བསྲེས་གཏིང་ཟབ་ཏུ་སྤེལ་ཏེ་སློབ་གྲྭའི་ཏང་འཛུགས་བྱ་བའི་སྤུས་ཚད་མཐོར་འདེགས་སུ་གཏོང་དགོས། བྱིས་སྐྱོང་ཁང་གི་དགེ་རྒན་གྱི་དཔུང་ཁག་འཛུགས་སྐྱོང་ལ་ཤུགས་བསྣན་ནས་བྱིས་སྐྱོང་ཁང་གི་ཆ་རྐྱེན་ཇེ་ལེགས་སུ་བཏང་སྟེ། སློབ་སྔོན་སློབ་གསོ་ཁྱབ་གདལ་དང་ཀུན་ཕན་འགག་སྒྲོལ་བྱ་སྤྱོད་ལ་སྐུལ་འདེད་གཏོང་དགོས། ཀོས་ནན་རྫོང་གི་རྫོང་དོ་དམ་སློབ་གྲྭའི་གདན་ཞུ་བསྒྱུར་བཅོས་བྱ་བའི་ཉམས་མྱོང་ཕྱོགས་བསྡོམས་དང་ཁྱབ་གདལ་དུ་གཏོང་བ། རྫོང་གཙོ་བོར་འཛིན་པའི་དགེ་རྒན་དོ་དམ་སྒྲིག་སྲོལ་དོན་འཁྱོལ་དང་། དགེ་རྒན་དང་ལས་བཟོ་པའི་སྒྲིག་གཞིའི་ཐོན་ཁུངས་གང་འགབ་ཅི་སྤྱོད་བྱེད་པ། སློབ་གྲྭའི་མི་བཀོལ་རང་གཙོ་མངོན་འགྱུར་ཡོང་བར་བྱེད་པ། ཚད་གཞི་མཐོ་བའི་རྩ་འཛུགས་ཀྱིས་ཁུལ་ཡོངས་ཀྱི་སྤུས་མཐོའི་སློབ་གསོའི་འཕེལ་རྒྱས་ཚོགས་ཆེན་འཚོགས་པ། ནུས་ཤུགས་ཡོད་རྒུས་སློབ་གསོའི་འཕེལ་རྒྱས་ཀྱི་འགག་རྩའི་གནད་དོན་ཐག་གཅོད་བྱེད་པ་སོགས་ལ་དམིགས་ནས་ནུས་ཤུགས་ཡོད་རྒུས་མཚོ་ལྷོའི་སྤུས་མཐོའི་སློབ་གསོ་འཕེལ་རྒྱས་ཡོང་བར་སྐུལ་འདེད་གཏོང་དགོས་ཞེས་བཤད།