ཀརྨ་ཕུན་ཚོགས་ཀྱིས་ལྗང་མདོག་རྩིས་ཤུགས་ཐོན་ལས་ཀྱི་ཚོང་འགུག་དངུལ་འདྲེན་ལས་གཞིའི་འཛུགས་སྐྲུན་བྱ་བ་དོན་འཁྱོལ་བྱས་ཚུལ་ལ་རྟོག་ཞིབ་བྱས་པ།

       ཞིང་ཆེན་ཡོངས་ཀྱི་དཔལ་འབྱོར་བརྟན་འཕར་གྱི་ཆེད་དོན་ཚོགས་འདུའི་དགོངས་དོན་ལག་བསྟར་དང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ལྗང་མདོག་རྩིས་ཤུགས་ཐོན་ལས་འཕེལ་རྒྱས་སུ་གཏོང་བའི་བཀོད་སྒྲིག་གསར་བའི་བླང་བྱ་དོན་འཁྱོལ་བྱ་ཆེད། ཟླ10བའི་ཚེས18ཉིན། མཚོ་ལྷོ་ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀརྨ་ཕུན་ཚོགས་མཚོ་ལྷོ་ཁུལ་གྱི་གཞི་གྲངས་ཆེན་མོའི་ཐོན་ལས་གླིང་དུ་སོང་ནས་ལྗང་མདོག་རྩིས་ཤུགས་ཐོན་ལས་ཀྱི་ཚོང་འགུག་དངུལ་འདྲེན་ལས་གཞིའི་འཛུགས་སྐྲུན་བྱ་བ་དོན་འཁྱོལ་བྱས་ཚུལ་ལ་རྟོག་ཞིབ་གནང་སྐབས། ཁོས་ལྗང་མདོག་རྩིས་ཤུགས་ཐོན་ལས་ལས་གཞི་འཛུགས་སྐྲུན་གྱི་མྱུར་ཚད་ཇེ་མགྱོགས་སུ་བཏང་སྟེ་འཕེལ་རྒྱས་ལ་སྒུལ་ནུས་གསར་པ་དང་དགེ་མཚན་གསར་པ་གཏོད་རྒྱུར་ཤུགས་རྒྱག་དགོས་པ་བསྟན།

       ཀརྨ་ཕུན་ཚོགས་འཁོར་དང་བཅས་པ་སྔ་རྗེས་སུ་ཁོའོ་ཧེང་ལྗང་མདོག་རིག་རྩིས་ལྟེ་གནས་དང་། མཚོ་ཟབ་འོད་ནུས་མཚོ་སྔོན་སྔོན་ཐོན་རྩིས་ཤུགས་ལྟེ་གནས། ཕེང་དབྱིན་ཁུ་ནུའི་རིག་རྩིས་ཐོན་ལས་གླིང་། རྣམ་པ་གསར་པའི་གསོག་ནུས་རྩེར་སོན་སྒྲིག་ཆས་བཟོ་སྐྲུན་ལྟེ་གནས་སོགས་ལས་གཞི་ལག་བསྟར་བྱེད་པའི་ཡུལ་དངོས་སུ་སོང་ནས།འཆར་འགོད་ཀྱི་ཇུས་གཞི་དང་མྱུར་ཚད།རྩིས་ཤུགས་ཀྱི་གཞི་ཁྱོན། གློག་སྤྱོད་བསྡོམས་འབོར་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་བ་རེད། ཀརྨ་ཕུན་ཚོགས་ཀྱིས་མཚོ་ལྷོའི་ནུས་ཁུངས་གཙང་མའི་ཐོན་ཁུངས་ཕུན་ཚོགས་པ་དང་། གནམ་གཤིས་འཁྱག་ལ་མཁའ་དབུགས་གཙང་བ། ཁོར་ཡུག་ལ་སྐམ་ཤས་ཆེ་བ་བཅས་ནི་ལྗང་མདོག་རྩིས་ཤུགས་ཐོན་ལས་འཕེལ་རྒྱས་སུ་གཏོང་བའི་རང་བྱུང་གི་བཟང་ཆ་ཞིག་ཡིན་ལ། ཐོན་སྐྱེད་ནུས་ཤུགས་གསར་པ་སྐྱེད་སྲིང་བྱེད་པའི་རང་བྱུང་གི་གནས་མཆོག་ཅིག་ཀྱང་ཡིན། ལྗང་མདོག་རྩིས་ཤུགས་འཕེལ་རྒྱས་ཀྱི་གོ་སྐབས་དམ་འཛིན་དང་ལྗང་མདོག་ཐོན་ལས་ཀྱི་གྲུབ་ཚུལ་རིམ་སྤར་ལ་སྐུལ་འདེད་གཏོང་བ་ནི་མཚོ་ལྷོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་དུས་རབས་ཀྱི་དགོས་མཁོ་ཡིན་ལ། མཚོ་ལྷོས་ནུས་ཁུངས་གཙང་མའི་ཁུལ་གྱི་འགན་འཁྲིའི་འཁུར་སེམས་མངོན་པར་བྱེད་པའི་བརྗོད་གཞི་གལ་ཆེན་ཞིག་ཀྱང་ཡིན་ཞེས་བསྟན།

       ཀརྨ་ཕུན་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་དུ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། རང་ངོས་ཀྱི་ཐོན་ཁུངས་དང་རང་བྱུང་སྐྱེ་ཁམས་བཟང་པོར་བརྟེན་ནུས་ཁུངས་གཙང་མའི་དགེ་མཚན་འདོན་སྤེལ་བྱས་ཏེ་ལྗང་མདོག་གློག་ཤུགས་དེ་ལྗང་མདོག་རྩིས་ཤུགས་སུ་འགྱུར་བར་ནུས་ཤུགས་འདོན་དགོས་ལ། ཁ་ཕྱོགས་དང་ངེས་གནས་གནད་ལ་འཁེལ་བ་བྱས་ཏེ་གླིང་ཁུལ་གྱི་ལྗང་མདོག་དགེ་མཚན་འབུར་དུ་ཐོན་པར་བྱེད་པ་དང་འཕེལ་རྒྱས་ཀྱི་ཁ་ཕྱོགས་གསལ་བོར་བཟུང་ནས་ཐཱན་གཉིས་ཀྱི་དམིགས་འབེན་མངོན་འགྱུར་དང་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་རྩོམ་པར་མཚོ་ལྷོའི་སྟོབས་ཤུགས་འབུལ་བ། འཆར་འགོད་འཛུགས་སྐྲུན་གྱི་ནུས་པ་གལ་ཆེན་ལ་ངོས་འཛིན་ཡང་དག་དང་། སྔོན་ཐོན་རང་བཞིན་དང་སྣེ་ཁྲིད་རང་བཞིན། ཆེད་ལས་རང་བཞིན། རྒྱུན་མཐུད་རང་བཞིན་བཅས་འབུར་དུ་ཐོན་པར་བྱས་ཏེ། གླིང་ཁུལ་གྱི་འཆར་འགོད་སྣ་ཚོགས་ཀྱི་སྒྲིག་གཞི་འཐུས་ཚང་དུ་བཏང་ནས། མཚོ་ལྷོ་ཁུལ་གྱི་ལྗང་མདོག་རྩིས་ཤུགས་ཐོན་ལས་འཕེལ་རྒྱས་སུ་གཏོང་བའི་འཆར་གཞི་ཡག་པོ་འགོད་དགོས་ལ། རྒྱུ་རྐྱེན་གཙོ་བོའི་འགན་སྲུང་བྱེད་ཤུགས་ཆེ་རུ་གཏོང་བ་དང་གླིང་ཁུལ་གྱི་རྨང་གཞིའི་སྒྲིག་བཀོད་ལེགས་བཅོས་བྱེད་ཤུགས་ཆེན་གཏོང་བ། ས་ཞིང་གྲོན་ཆུང་དང་ལེགས་བསྡུས་ཞིབ་གཉེར་གྱིས་བེད་སྤྱོད་བྱེད་པའི་ཆུ་ཚད་མཐོ་རུ་གཏོང་བ། ཤེས་ལྡན་མི་སྣ་གསོ་སྐྱོང་དང་། ཤེས་ལྡན་མི་སྣ་གདན་ཞུ། ཤེས་ལྡན་མི་སྣ་བཀོལ་སྤྱོད་བཅས་ཀྱི་བྱ་བ་ལེགས་པོར་བསྒྲུབ་པ། ལྗང་མདོག་རྩིས་ཤུགས་ཐོན་ལས་སྐྱོན་བྲལ་ངང་འཕེལ་རྒྱས་ཡོང་བར་སྐུལ་འདེད་གཏོང་བ་བཅས་བྱ་དགོས་པ་དང་། ལས་གཞིའི་བདག་པོའི་འགན་འཁྲིའི་ལམ་ལུགས་དོན་འཁྱོལ་ནན་པོ་བྱས་ཏེ་ས་གནས་ཀྱི་དོ་དམ་ལ་ཤུགས་སྣོན་རྒྱག་པ་དང་བཟོ་སྐྲུན་གྱི་སྒྲིག་འཛུགས་ཇེ་ལེགས་སུ་བཏང་ནས་བཟོ་སྐྲུན་གྱི་རྒྱུ་སྤུས་དང་བདེ་འཇགས་ནན་མོར་སྲུང་སྟེ། གླིང་ཁུལ་གྱི་ལས་གཞི་འཛུགས་སྐྲུན་སྔ་མོ་ནས་ལེགས་འགྲུབ་བྱུང་སྟེ་འཁོར་བསྐྱོར་ཐུབ་པར་ཁག་ཐེག་བྱ་དགོས་ཚུལ་བསྟན།
       ལི་གོ་ཞུང་གིས་འགྲོ་རོགས་བྱས་པ་རེད།