ལིས་ཀང་གིས་ཐུན་ཏེ་རྫོང་དུ་བྱ་བར་རྟོག་ཞིབ་བྱས།

       ཟླ8པའི་ཚེས22ཉིན། མཚོ་ལྷོ་ཁུལ་ཨུའི་ཧྲུའུ་ཅི་ལིས་ཀང་གིས་ཐུན་ཏེ་རྫོང་དུ་བདེ་འཇགས་ཐོན་སྐྱེད་དང་འབྲུབ་འགོག གྲོང་གསེབ་ཀྱི་ཐོན་ལས་གོང་སྤེལ། དམངས་ཚིས་འགན་སྲུང་སོགས་ཀྱི་བྱ་བར་རྟོག་ཞིབ་བྱས་ཤིང་། ཁོང་གིས་བདེ་འཇགས་ལ་འགན་སྲུང་དང་གཏན་འཇགས་སྲུང་སྐྱོང་། འཕེལ་རྒྱས་ལ་སྐུལ་འདེད་གཏོང་བ། དམངས་ཕན་ལས་དོན་བཅས་དམ་འཛིན་བྱས་ཏེ། མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་སྲུང་སྐྱོང་ཡག་པོ་བྱས་ནས་དབུལ་ཐར་འགག་སྒྲོལ་དང་གྲོང་གསེབ་དར་སྤེལ་འབྲེལ་མཐུད་ནུས་ལྡན་ཡོང་བའི་མཇུག་བསྡུའི་ལས་དོན་ལེགས་པར་བསྒྲུབ་དགོས་ཞེས་ནན་གྱིས་བསྟན།

       རྫོང་རུའི་ཐང་ཆེན་གྱི་ཕྱོགས་བསྡུས་ཚོང་ར་དང་ཐུན་ཏེ་རྫོང་རྟེན་མཛོད་ཁང་གི་ལས་གཞིའི་འཛུགས་སྐྲུན་ཡུལ་དངོས་སུ། ལིས་ཀང་གིས་ལས་གཞིའི་འཛུགས་སྐྲུན་གནས་ཚུལ་ལ་གསན་པར་མ་ཟད། བདེ་འཇགས་བྱ་ཐབས་ལག་བསྟར་བྱེད་པ་སོགས་ཀྱི་གནས་ཚུལ་ལ་ཡུལ་དངོས་ནས་རྟོག་ཞིབ་བྱས་ཤིང་། ཁོང་གིས་བདེ་འཇགས་ཐོན་སྐྱེད་ལ་དོ་སྣང་བྱས་ཏེ་མི་དམངས་བླ་ན་མེད་པ་དང་ཚེ་སྲོག་བླ་ན་མེད་པའི་འདུ་ཤེས་བརྟན་པོར་བཙུགས་ཏེ་བདེ་འཇགས་ཐོན་སྐྱེད་ཀྱི་འགན་འཁྲི་སྔར་ལས་བརྟན་དུ་གཏོང་བ་དང་། ལས་སྒྲུབ་མི་སྣའི་བདེ་འཇགས་ཐོན་སྐྱེད་སྐོར་གྱི་དྲིལ་བསྒྲགས་དང་གསོ་སྐྱོང་སྦྱོང་བརྡར་བྱེད་ཤུགས་ཆེ་རུ་གཏོང་བ། དམིགས་བསལ་སྒྲིག་ཆས་ལ་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ། ཉེན་ཁའི་མངོན་མེད་རྐྱེན་ངན་གྲལ་བཤེར་བཅོས་སྒྲིག་ལ་དམ་འཛིན་དང་སྒྲིག་འགལ་བཀོལ་སྤྱོད་གཏན་འགོག་བྱས་ནས་བདེ་འཇགས་ཐོན་སྐྱེད་ཐད་ཀྱི་དོན་རྐྱེན་མི་འབྱུང་བར་སྔོན་འགོག་བྱ་དགོས་ཞེས་བསྟན།
       ལིས་ཀང་གིས་ཐུན་ཏེ་རྫོང་འབའ་ལུང་ཤང་སུམ་མདོ་སྡེ་བའི་ཞོད་འགོག་བཟོ་སྐྲུན་གྱི་ཡུལ་དངོས་སུ་ཞོད་འགོག་གནོད་སེལ་འགན་འཁྲི་ལག་བསྟར་སོགས་ཀྱི་གནས་ཚུལ་ལ་རྒྱུས་ལོན་བྱས་ནས་མིག་སྔའི་ཞོད་འགོག་བྱ་བར་དམ་འཛིན་ཡག་པོ་བྱས་ཏེ། ཞོད་འགོག་མྱུར་སྐྱོབ་དང་ས་གཤིས་གནོད་འཚེ་འགོག་བཅོས་སོགས་ཀྱི་ལས་དོན་ཁག་དམ་འཛིན་བྱས་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་ནུས་ཤུགས་ཡོད་རྒུས་འགན་སྲུང་བྱ་དགོས་ཞེས་བསྟན། ཐུན་ཏེ་རྫོང་གི་རྟེན་མཛོད་ཁང་གི་ལས་གཞིའི་མཚམས་སྦྱོར་ལ་གསན་རྗེས་ཁོང་གིས་བསྟན་དོན། རྫོང་རྟེན་མཛོད་ཁང་འཛུགས་སྐྲུན་བྱེད་པའི་གོ་སྐབས་དང་བསྟུན་ནས་རྫོང་རུའི་རིག་གནས་སྔོག་འདོན་དང་། སྲུང་སྐྱོང་། བེད་སྤྱོད་བཅས་བྱེད་པར་སྐུལ་འདེད་བཏང་ནས་ཚན་རིག་དང་མཐུན་པའི་སྒོ་ནས་ལུགས་མཐུན་གྱིས་སྒྲིག་འཛུགས་བྱས་ཏེ་ས་ཁོངས་རང་བཞིན་གྱི་རིག་གནས་ཀྱི་མཚོན་རྟགས་ཤིག་ཧུར་ཐག་སྒོས་བསྐྲུན་དགོས་ཞེས་བསྟན།

       གངས་རིའི་མེ་ཏོག་ཀུང་ཟི་རུ་ལིས་ཀང་གིས་ཐོན་སྐྱེད་དང་འཁོར་སྐྱོད། ཡོང་འབབ་སོགས་ཀྱི་གནས་ཚུལ་ལ་རྒྱུས་ལོན་ཞིབ་མོ་བྱས་རྗེས། ཁོས་གངས་རིའི་མེ་ཏོག་ཀུང་ཟི་སོགས་ཚོང་གཉེར་པས་ལས་གཞིའི་འཕེལ་རིམ་མགྱོགས་སུ་གཏོང་བ་དང་ཐོན་སྐྱེད་ཀྱི་ཚད་གཞི་ནན་མོ། ཐོན་རྫས་ཀྱི་སྤུས་ཀ་མཐོ་རུ་གཏོང་བ། ཚོང་རྟགས་ཀྱི་ཤུགས་རྐྱེན་རྒྱ་ཆེ་རུ་བཏང་ནས་གང་མགྱོགས་སྒོས་གཞི་རྒྱ་ཅན་གྱི་ཐོན་སྐྱེད་གྲུབ་པར་བྱེད་པའི་དུས་མཚུངས་སུ་ཐོན་ལས་ཀྱི་གནས་ཐང་འཕར་བ་དང་ཁེ་ལས་ཀྱི་ཕན་འབྲས་མཐོ་རུ་འགྲོ་བ། མང་ཚོགས་ཀྱི་ཡོང་འབབ་ཇེ་མང་དུ་གཏོང་དགོས་ཞེས་བསྟན།
       རྐ་རྒན་སྦྲ་ནག་སྐྱེ་ཁམས་གླིང་དུ་ལིས་ཀང་གིས་ཐུན་ཏེ་རྫོང་ལ་སྐྱེ་ཁམས་ཡུལ་སྐོར་དང་ཞིང་ཕྱུགས་ཐོན་རྫས་འཕེལ་རྒྱས་གཏོང་བའི་རྨང་གཞི་ལེགས་པོ་ཡོད་ལ། འཛད་སྤྱོད་གསར་པ་དང་། ལས་རྣམ་གསར་པ། དཔེ་དབྱིབས་གསར་པ་དང་ཟུང་འབྲེལ་བྱས་ནས་ཚན་རྩལ་གྱིས་ནུས་པ་འདོན་པ་དང་དྲིལ་བསྒྲགས་ཁྱབ་གདལ་དུ་གཏོང་བ། དགེ་མཚན་ལྡན་པའི་ཐོན་ཁུངས་སྔོག་འདོན། སྤུས་ཚད་མཐོ་བའི་མཁོ་སྤྲོད་མང་དུ་གཏོང་བ། ཁྱད་ཆོས་ལྡན་པའི་ཐོན་རྫས་དང་སྤུས་དག་གི་ཉམས་ལེན་མུ་མཐུད་དུ་ཕུན་སུམ་ཚོགས་པར་གཏོང་དགོས་ཞེས་བསྟན།
       ཐུན་ཏེ་རྫོང་སྤྱི་ཚོགས་ཕན་བདེ་ཞབས་ཞུའི་ལྟེ་གནས་སུ་ལིས་ཀང་གིས་དེར་སྡོད་པའི་རྒན་པ་རྣམས་དང་གླེང་མོལ་བྱས་ནས་ཁོང་ཚོའི་སྐྱིད་སྡུག་དང་རྒྱུན་ལྡན་འཚོ་བའི་ཐད་ནས་རྒྱུས་ལོན་བྱས། ཁོས་རྒན་པ་དང་བྱིས་པའི་ལས་དོན་ལ་དོ་སྣང་བྱས་ཏེ། རྨང་གཞིའི་སྒྲིག་ཆས་ཀྱི་ཆ་རྐྱེན་སྔར་ལས་ལེགས་བཅོས་དང་རྒན་གསོའི་ཚབ་སྐྱོང་ཞབས་ཞུའི་མ་ལག་བསྟུད་མར་འཐུས་ཚང་དུ་གཏོང་བ། རྒན་པའི་འཚོ་གནས་ཁོར་ཡུག་དང་བཟའ་བཏུང་གི་ཆ་རྐྱེན། བསམ་པའི་འཚོ་བ་བཅས་ལེགས་བཅོས་བྱེད་པའི་ཐད་འབད་བརྩོན་བྱས་ནས་རྒན་པ་རྣམས་ལ་བློ་བདེ་བག་ཕེབས་དང་སྤྲོ་སྐྱིད་ལྡན་པའི་འཚོ་བའི་ཁོར་ཡུག་བསྐྲུན་དགོས་ཞེས་བསྟན།
       ཀྲང་ཅི་ཙུང་རྟོག་ཞིབ་བྱེད་སྒོར་ཞུགས།