བོད་ལྗོངས་འདམ་གཞུང་དུ་བོད་བཙན་པོའི་དུས་ཀྱི་བང་སོ་ཆེ་གྲས་ཤིག་རྙེད།

        འདམ་གཞུང་གི་བང་སོ་འདི་བོད་ལྗོངས་ལྷ་ས་གྲོང་ཁྱེར་གྱི་འདམ་གཞུང་རྫོང་འདམ་ཆུ་ཁ་གྲོང་རྡལ་འདམ་ཆུ་སྡོད་ཁུལ་ཨུ་ལྷན་དང་། རྫོང་སྲིད་གཞུང་ཡོད་སའི་ནུབ་བྱང་ཕྱོགས་ཀྱི་ལེ་དབར་ཧ་ལམ2ཀྱི་མཚམས་ཏེ། གཉན་ཆེན་ཐང་ལྷའི་རི་རྒྱུད་གོ་བ་ནག་པོ་རིའི་ཉིན་གཟར་དུ་བཏབས་ཡོད་པ་རེད། 2020、2021ལོ་གཉིས་ལ་བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་ཁང་གིས་གཞི་རྩའི་ལས་གཞིར་གཞོགས་འདེགས་བྱ་ཆེད།ཀྲེ་ཅིང་ཞིང་ཆེན་གནའ་རྫས་རྟོག་ཞིབ་ཞིབ་འཇུག་ཁང་དང་མཉམ་འབྲེལ་བྱས་ནས་མྱུར་སྐྱོབ་རང་བཞིན་གྱི་གནའ་རྫས་སྔོག་འདོན་བྱས་ལ། སྔོག་འདོན་ཁྲོད་བང་སོ་ཆེ་གྲས6དང་ཆུང་གྲས30རྙེད་པ་དང་། འདམ་གཞུང་རྫོང་རིག་གནས་དང་ཡུལ་སྐོར་ཅུས་སྔོག་འདོན་གྱི་གོ་རིམ་ཡོངས་ལ་ཞུགས།

        བང་སོ་ཆེ་གྲས་ལས་གསེར་དང་དངུལ་ཆས་དང་། ཕྲེང་རྒྱན། རྫ་ཆས། ཟངས་ཆས། ལྕགས་ཆས། ཚ་ཚ། འཐག་སླས། དེ་མིན་རྡོ་ཡི་རྡེའུ་དཀར་ནག་སོགས་གནའ་རྫས་རྙེད། བང་སོ་ཆུང་གྲས་ལས་ཟངས་ཆས་དང་། ལྕགས་ཆས། རྫ་ཆས་ཆག་ཧྲུལ། ཕྲེང་རྒྱུན། ཀོ་ཆས་ཉུང་ངུ་མ་གཏོགས་དུར་རྫས་གཞན་མི་འདུག་ལ། མིའི་རུས་པ་ཐར་ཐོར་ཡོད་པར་གཞིགས་ན་རུས་སྒྲུག་པུར་འཇུག་ཐེངས་གཉིས་བྱས་མྱོང་སྙམ་ཡང་རྗེས་ཤུལ་མ་མཐོང་། གཞན་སྒོ་ཟོག་རྟ་དང་ནོར། ལུག སྒོ་ཁྱིའི་རུས་པ་ཅུང་མང་།

        འདམ་གཞུང་གི་བང་སོ་འདི་སྤྱི་ལོ་དུས་རབས7པ་ནས9བའི་བར་ཐང་རྒྱལ་རབས（བོད་བཙན་པོའི་དུས་སྐབས）ཀྱི་རིག་གནས་ཤུལ་རྫས་སུ་གཏོགས། འདམ་གཞུང་བང་སོར་གནའ་རྫས་རྟོག་དཔྱོད་རིག་པའི་ངོས་ནས་རིག་གནས་ཀྱི་རྣམ་པར་གཞིགས་ན་ནང་ལོགས་ཀྲུང་ཡོན་རིག་གནས་དང་། ཉེ་འཁོར་གྱི་ས་ཁུལ་གཞན་དག་གི་གནའ་རྫས་རྟོག་ཞིབ་ཁྲོད་རྙེད་པའི་རིག་གནས་ཀྱི་ཁྱད་ཆོས་ལྡན་པས། གདོད་མའི་རིག་གནས་འབྲེལ་འདྲིས་དང་མཉམ་བརྗེ་མཉམ་བསྲེས་ཀྱི་རྣམ་པ་མངོན་ཡོད། དེས་བོད་བཙན་པོའི་དུས་ཀྱི་རིག་གནས་དར་སྲོལ་དང་། དུར་འཇུག་ལམ་ལུགས་སོགས་ལ་མིག་ཐོག་ལག་ཟིན་གྱི་རྒྱུ་ཆ་རྡོག་རྡོག་ཅིག་འདོན་སྤྲོད་དང་། ཐང་རྒྱལ་རབས་དང་བོད་བཙན་པོའི་རྒྱལ་ཁབ་བར་གྱི་འབྲེལ་འདྲིས་ལོ་རྒྱུས་ལ་ཞིབ་འཇུག དངོས་པོའི་རིག་གནས་ཀྱི་འབྲེལ་འདྲིས་ལོ་རྒྱུས་ལ་དཔྱད་བསྡུར་བཅས་བྱ་བར་དོན་སྙིང་གལ་ཆེན་ལྡན།