མཚོ་སྔོན་པོའི་འགྲམ་དུ་མི་རིགས་མཐུན་སྒྲིལ་གྱི་མེ་ཏོག་རྣམ་པར་བཞད་པ།

མི་དམངས་ཀྱི་བདེ་སྣང་ཕྲག་ཏུ་འཁུར་བ།
       དཀོན་ལོ་གོང་མ་སྡེ་བར་ཁྱོན་བསྡོམས་ཁྱིམ་ཚང637དང་སྡེ་མི2468ཡོད་པ་དང་། སྡེ་བས་གཙོ་བོ་འབྲོག་ལས་གཉེར་བཞིན་ཡོད་མོད། འོན་ཀྱང་དུས་ནམ་ཡང་གཞི་ཁྱོན་ཆེན་པོར་མ་གྱུར་པས་འབྲོག་ལས་ལ་འཕེལ་རྒྱས་ཀྱི་གཏིང་ཤུགས་ཆེན་པོ་མེད། ད་ལྟ་སྐྱེ་ཁམས་འབྲོག་ལས་ཆེད་ལས་མཉམ་ལས་ཁང་ལ་བརྟེན་ནས་མི་དང་རྒྱུ། དངོས་པོ་གསུམ་དང་། ཐོན་སྐྱེད་དང་མཁོ་འཚོང་བཅས་སྡེབས་སྒྲིག་ཡག་པོ་བྱེད་བཞིན་འདུག ཚོགས་ཁྱུ་གཅིག་གྱུར་དང་། རིགས་སྦྱོར་གཅིག་གྱུར། འོ་གཅོད་གཅིག་གྱུར། དོ་དམ་གཅིག་གྱུར། གསོ་ཚགས་གཅིག་གྱུར། བཤའ་གཏོང་གཅིག་གྱུར་གྱི་ཐོན་སྐྱེད་བྱེད་སྟངས་ཐོག་ནས། ཕན་འབྲས་ཆེ་བའི་གསོ་སྤེལ་དང་ཚན་རིག་དང་མཐུན་པའི་གསོ་སྤེལ་གྱི་དགེ་མཚན་ལྡན་པ་མཚོན་ཡོད་ལ། སྡེ་མིའི་འཚོ་བའི་སྤུས་ཚད་ལ་གནམ་ས་བླ་འོག་ཏུ་སྒྱུར་བ་ལྟ་བུའི་འཕོ་འགྱུར་བྱུང་ཞིང་འཚོ་བའི་ཆ་རྐྱེན་ཇེ་བཟང་དུ་གྱུར་ཡོད། གཞན་ད་དུང་སྔར་ལས་ལྷག་པའི་སྒོ་ནས་འཕེལ་རྒྱས་དང་བདེ་སྐྱིད་ལ་ཧུར་ཐག་གིས་དོན་གཉེར་བྱེད་བཞིན་ཡོད། བདེ་སྐྱིད་དམ་སྲུང་བྱེད་ཐུབ་ལ། མཛེས་ལྗོངས་ཀྱང་གསལ་ལེར་མཐོང་ཐུབ།
       མཛེས་སྡུག་ཡིད་འོང་གི་རང་བྱུང་མཛེས་ལྗོངས་དང་ཐུན་མིན་ཁྱད་འཕགས་ཀྱི་མི་རིགས་རིག་གནས་ནི་དཀོན་ལོ་གོང་མ་སྡེ་བའི་མིང་བྱང་ལྟ་བུ་ཡིན་ཏེ། སྡེ་བ་དེ་མཚོ་སྔོན་པོའི་ལྷ་མོ་མཚོ་ཁུག་དང་བར་ཐག་སྤྱི་ལེ14མ་གཏོགས་མེད་པ་དང་། ཉེ་འཁོར་གྱི་སྐྱེ་ཁམས་ཁོར་ཡུག་ལ་སྲུང་སྐྱོང་ཡག་པོ་བྱ་རྒྱུ་ནི་སྡེ་མི་ཚོའི་འགྱུར་མེད་ཀྱི་འོས་འགན་ཉག་གཅིག་རེད། མིག་སྔར། སྡེ་བ་ཡོངས་ལ་སྐྱེ་ཁམས་བདག་སྐྱོང་པ49དང་། གཙང་སྦྲ་བ59ཡོད་ལ། རི་བོ་དང་མཚོ་མོར་སྐོར་ཞིབ་བྱེད་པ་དང་། གཙང་སྦྲ་བྱེད་པ། གད་སྙིགས་འཐུ་རྒྱུ་བཅས་ནི་འབྲོག་པ་ཚོའི་རྒྱུན་ལྡན་གྱི་ལས་ཀ་རེད། བསོད་ནམས་ཚེ་རིང་གིས་རྒན་རབས་པ་ཚོས་སྐྱེ་ཁམས་ཁོར་ཡུག་གི་སྲུང་སྐྱོང་ལ་ཤིན་ཏུ་མཐོང་ཆེན་བྱེད་དེ། བློ་གཅིག་སེམས་གཅིག་གིས་གནས་འདིའི་རྩྭ་ཉག་མ་རེ་རེ་དང་སྡོང་རྐང་རེ་རེ། མཐོན་པོའི་རི་དང་དམའ་མོའི་མཚོ་ལ་སྲུང་སྐྱོང་བྱ་རྒྱུ་དེ་འབྲོག་པ་མང་ཚོགས་ལ་མཚོན་ན་ཆེས་རྒྱུན་ལྡན་གྱི་དོན་དག་ཙམ་རེད་ཟེར། བློ་སེམས་གཉིས་ཀ་སེ་འབྲུ་བཞིན་གཅིག་ཏུ་སྒྲིལ་བ།
       སྡེ་བའི་འཕོ་འགྱུར་ཐད་ནས་སྡེ་མི་སྒྲོལ་མར་སྤྲོ་དགའི་མྱོང་ཚོར་ཟབ་མོ་ཡོད་དེ། སྡེ་བ་ཐོན་ལས་དར་རྒྱས་ཅན་དང་། སྐྱེ་ཁམས་མཛེས་སྡུག་ཅན། མི་དམངས་བདེ་སྐྱིད་ཅན་གྱི་མཐོ་སྒང་གི་མཛེས་སྡུག་ལྡན་པའི་སྡེ་བ་གསར་བ་ཅན་གྱི་ཕྱོགས་སུ་ཡུན་གྱིས་སྐྱོད་པ་དང་བསྟུན། ཡུལ་སྐོར་ལས་རིགས་ལའང་དུས་བསྟུན་འཕེལ་རྒྱས་བྱུང་། སྔོན་ཆད་རང་ཁྱིམ་ནས་ཁྱིམ་ལས་ཁོ་ན་ལས་བའི་སྒྲོལ་མར་མཚོན་ན། ད་ལྟ་མོ་རང་སྡེ་བའི་རྒྱབ་ཕྱོགས་ཀྱི་ཡུལ་སྐོར་སྤྲོ་གསེང་གནས་མཆོག་གི་ཕོར་པ་བཀྲུ་མཁན་ཡིན་པས་ཟླ་རེར་ཡོང་སྒོ་སྒོར་སུམ་སྟོང་ལྷག་ཡོད། ཁོ་མོས་ཕྱི་ཡུལ་དུ་ཞོར་ལས་ལ་འགྲོ་མི་དགོས་བར་རང་སྡེ་བ་རུ་ཡོང་སྒོ་བཙལ་ཐུབ་པ་འདི་ཤིན་ཏུ་བཟང་ཟེར། ད་ལྟའི་དུས་ཀྱི་འགྱུར་ལྡོག་གླེང་ཚེ་སྒྲོལ་མའི་གདོང་ལ་བདེ་སྐྱིད་ཀྱི་འཛུམ་མདངས་ཀྱིས་ཕྱུག་འོངས།
       སྒྲོལ་མའི་འཚོ་བའི་གནས་ཚུལ་ནི་སྡེ་བ་ཧྲིལ་པོའི་བདེ་སྐྱིད་ཀྱི་བསྡུས་གཟུགས་ཡིན། ལོ་ངོ་གཉིས་ཀྱི་རིང་དུ། དཀོན་ལོ་གོང་མ་སྡེ་བས་སྤྱི་ཚོགས་འགན་སྲུང་མ་ལག་འཛུགས་སྐྲུན་དང་། འོས་འགན་སློབ་གསོ། བདེ་ཐང་གྲོང་གསེབ་འཛུགས་སྐྲུན་བཅས་ལག་བསྟར་དོན་འཁྱོལ་བྱས་ཤིང་། གཞི་རྩའི་སྤྱི་པའི་འཕྲོད་བསྟེན་ཞབས་ཞུའི་རྣམ་གྲངས་དང་ཁ་གསབ་སྲིད་ཇུས་སོ་སོ་དོན་འཁྱོལ་ནན་མོ་བྱས་པ། མཁར་གྲོང་གི་སྤྱི་བའི་ལས་ཞུགས་ཞབས་ཞུའི་མ་ལག་འཐུས་ཚང་དུ་བཏང་བ། སློབ་མཁན་ལ་ཁྲིད་མཁན་ཡོད་པ་དང་། ངལ་རྩོལ་ལ་ཐོབ་བྱ་ཡོད་པ། ནད་པར་སྨན་བཅོས་བྱེད་ཐུབ་པ། རྒན་པ་གཉོར་མཁན་ཡོད་པ། འདུག་མཁན་ལ་སྡོད་ཁང་ཡོད་པ། ཉམས་ཞན་ལ་རོགས་སྐྱོར་ཡོད་པ་བཅས་ལ་ཁྱོན་ཡོངས་ནས་སྐུལ་འདེད་བཏང་པས། སྡེ་བ་ཧྲིལ་པོའི་མང་ཚོགས་ཀྱི་བདེ་རྩ་མངོན་གསལ་གྱིས་ཇེ་བཟང་དུ་གྱུར།        ཇེ་བཟང་ཇེ་ལེགས་ཕྱོགས་སུ་འགྲོ་བའི་འགྱུར་ལྡོག་འདི་དག་སྡེ་མི་རེ་རེའི་མཐུན་སྒྲིལ་མཛའ་བརྩེ་དང་ཕན་ཚུན་གྱི་རོགས་རམ་དང་ཁ་འབྲལ་ཐབས་མེད་དེ། སྡེ་བའི་སྲང་མདོའི་ཐང་ཆེན་དཀྱིལ་དུ་ཁ་ཕྱེ་བའི་དཔེ་དེབ་ཅིག་གི་རྣམ་པ་བཟོས་ཤིང་། ཤོག་ངོས་སུ་ལག་ཟུང་གཅིག་གིས་དམར་མདངས་བཀྲ་བའི་སེ་འབྲུ་ཞིག་བཏེགས་ཡོད་པའི་ཚུལ་དེ་ནི་དཀོན་ལོ་གོང་མ་སྡེ་བས་གསར་སྐྲུན་བྱས་པའི་མཐུན་སྒྲིལ་ཐང་ཆེན་རེད། འདིས་ཀྱང་རིགས་སོ་སོའི་མི་རིགས་དག་སེ་འབྲུ་བཞིན་ཕན་ཚུན་ལ་དམ་པོར་འབྲེལ་ནས་མཐུན་སྒྲིལ་གྱི་མེ་ཏོག་མཉམ་དུ་གསོས་ཤིང་བདེ་སྐྱིད་ཀྱི་ཤིང་འབྲས་མཉམ་དུ་ལོངས་སུ་སྤྱོད་པའི་རྣམ་པ་ཡག་པོ་དེ་རྣམ་པར་མཚོན་ཡོད། །