བདུད་འདུལ་ཕུག་པའི་གནའ་ཤུལ་དེ་ལོ་ཁྲི4ཡར་སྔོན་དུ་ཆགས་པ་ར་སྤྲོད་བྱས།
རྩོམ་པ་པོ།：
ཡོང་ཁུངས།：མཚོ་སྔོན་ཞིང་ཆེན་སྲིད་གཞུང་དྲ་བ།
དུས་ཚོད།：2024-02-28
ཀློག་གྲངས།：
ཉེ་ལམ་མཚོ་སྔོན་ཞིང་ཆེན་རིག་དངོས་རྟོག་ཞིབ་གླིང་ནས་རྒྱུས་ལོན་པ་ལྟར་ན། ཡུལ་ཤུལ་ཁུལ་སྐྱུ་ར་བྲག་བདུད་འདུད་ཕུག་པའི་གནའ་ཤུལ་ལ་གནའ་རྫས་རྟོག་ཞིབ་རབ་དང་རིམ་པ་བྱས་པ་ན། གནའ་ཤུལ་དེ་ནི་ལོ་ངོ་ཁྲི4ཡར་སྔོན་དུ་ཆགས་ཡོད་པ་དང་། འཁྱགས་རོམ་དུས་རིམ་མཐའ་མ་ཉམས་ཆག་བྱུང་བའི་བར་ལ་གནས་ཤིང་། ད་སྔ་མཚོ་སྔོན་ཁོངས་སུ་ཀུན་གྱིས་ཤེས་པའི་གནའ་ཤུལ་ཆེས་སྔ་བར་ཆགས། དེས་མདོ་དབུས་མཐོ་སྒང་འདིར་མིའི་རིགས་འཚོ་སྡོད་བྱས་པའི་དུས་ཚོད་ལོ་ངོ་ཁྲི4.5ཡི་སྔོན་ལ་འདེད་རྒྱུ་བྱུང་།
རྒྱུས་ལོན་པ་ལྟར་ན། 2023ལོའི་ཟླ7པ་ནས་ཟླ10བའི་བར་དུ། མཚོ་སྔོན་ཞིང་ཆེན་རིག་དངོས་རྟོག་ཞིབ་ཁང་གིས་ལན་གྲུ་སློབ་ཆེན་དང་། མཚོ་སྔོན་ཞིང་ཆེན་ཡུལ་ཤུལ་ཁུལ། ཡུལ་ཤུལ་གྲོང་ཁྱེར་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུས་ཀྱིས་མཚོ་སྔོན་ཞིང་ཆེན་ཡུལ་ཤུལ་གྲོང་ཁྱེར་བདུད་འདུལ་ཕུག་པའི་གནའ་ཤུལ་སྔོག་འདོན་གྱི་ལས་གཉེར་ཞིང་། སྔོག་འདོན་གྱི་རྒྱ་ཁྱོན་ལ་སྨི་གྲུ་བཞི་མ10ཡིན་པ་དང་། ད་སྔ་གཏིང་ཚད་སྨི4.5ལས་བརྒལ་བ་སྔོག་ནས་ཡོད་ལ། ས་རིམ་རྙོག་འཛིང་ལྡན། དེ་ལས་མེ་སྤྱད་ཤུལ་ཆེ་ཤོས་ཤིག་དང་། རྡོ་ཆས་དང་སྲོག་ཆགས་ཀྱི་རུས་པ་མང་པོ་རྙེད། རྡོ་ཆས་རིགས་ལ་རྡོ་སྙིང་དང་། རྡོ་ལེབ། གཞོག་ཆས། རྡོ་ཆས་ཀོང་ཀོང་ཆག་སྐྱོན་ཅན། འབིག་ཆས་སོགས་ཡོད་ལ། གཙོ་བོ་རྡོ་སྙིང་དང་རྡོ་ལེབ་ལས་བཟོས་པ་རེད།
མཚོ་སྔོན་ཞིང་ཆེན་རིག་དངོས་རྟོག་ཞིབ་ཁང་ཞིབ་འཇུག་པུའུ་ཡི་ལས་བྱེད་པ་ཀྲེན་ཆིང་གིས་འདི་སྐད། བདུད་འདུད་ཕུག་པའི་གནའ་ཤུལ་གྱིས་མདོ་དབུས་མཐོ་སྒང་གི་སྔ་དུས་ཀྱི་མིའི་རིགས་ཀྱི་སྤྱི་ཚོགས་ངོ་མ་དེ་ཅུང་ཆ་ཚང་བ་ཞིག་མངོན་ཡོད་དེ། སྐབས་དེ་དུས་དེང་གི་མིའི་བྱུང་ཁོངས་ཡར་མར་ལ་མཆེད་པའི་གནད་འགག་གི་དུས་རིམ་ཤིག་ཏུ་གནས་པར་འཁེལ་ཡོད་པས། མཚོ་སྔོན་ཡུལ་ཤུལ་ས་ཁུལ་དུ་ལོ་ཁྲི་ཚོ་ཡར་སྔོན་ལ་གནའ་མི་གནས་པའི་ལོ་རྒྱུས་ཀྱི་སྟོང་ཆ་བསྐང་ཐུབ་པར་མ་ཟད། མདོ་དབུས་མཐོ་སྒང་གི་སྔ་དུས་ཀྱི་གནའ་མིའི་རིག་གནས་དང་། འགུལ་སྐྱོད་ལོ་རྒྱུས། དུས་དང་བར་སྟོང་གི་མཆེད་ཚུལ་དང་གོ་རིམ། འཚོ་ཐབས། ས་བབ་མཐོ་བའི་ཁོར་ཡུག་ཏུ་གནས་ཐུབ་པའི་རྐྱེན་སྲོལ་སོགས་ལ་ཞིབ་འཇུག་བྱེད་པར་རིན་ཐང་ཆེན་པོ་ལྡན།
འབྲེལ་ཡོད་འོས་སྦྱོར།
